މެންޗެސްޓާ ސިޓީގެ އާޖެންޓީނާ ފޯވަޑް ހޫލިއަން އަލްވަރޭޒް ވަނީ، އޭނާ އެ ކްލަބުގައި ދެމިހުރުމާމެދު ގޮތެއް ނިންމާނީ މިހާރު ޕެރިހުގައި ކުރިއަށްދާ އޮލިމްޕިކްސްގެ ފުޓްބޯޅަ އިވެންޓަށްފަހުގައި ކަމަށެވެ.
އަލްވަރޭޒް، 24، ވަނީ މިދިޔަ އަހަރުގެ މާރިޗް މަހުގައި ސިޓީ އާއެކު ހަދާފައިވާ ކޮންޓްރެކްޓް އިތުރު އެއްއަހަރު އާކޮށްފައެވެ. މިއާއެކު، އެ ޓީމާއެކު ހަދާފައިވާ އެއްބަސްވުމުގެ މުއްދަތު ހަމަވާނީ 2028 ވަނަ އަހަރު އެވެ.
އަލްވަރޭޒް ބުނީ، އޭނާގެ މުސްތަގުބަލާ ގުޅޭގޮތުން ގިނަ ވާހަކަތަކެއް ދެކެވެމުންދާ ކަމަށާއި، އެހެންނަމަވެސް މިވަގުތަށް އޭނާގެ ހުރިހާ ސަމާލުކަމެއް ދޭނީ އޮލިމްޕިކްސް އަށް ކަމަށެވެ.
"ވަރަށް ގިނަ ވާހަކަތަކެއް ދެކެވެމުންދޭ،" ޔުކްރޭނާ ދެކޮޅަށް އާޖެންޓީނާ ކުޅުނު މެޗުގެ ކުރީން ސިޓީގެ މުސްތަގުބަލާ ގުޅޭގޮތުން، އަލްވަރޭޒް ބުންޏެވެ.
"މިވަގުތު އަހަރެންގެ ސަމާލުކަންދީފައި މިވަނީ އޮލިމްޕިކްސް އަށް، އެއީ ކުރު މުއްދަތެއްގެ މުބާރާތަކަށްވާތީ. މެންޗެސްޓާ ސިޓީގައި އަހަރެން މިހުރީ އުފަލުން. ކުޅެން ފުރުޞަތުތައް ވެސް ލިބުނު." އަލްވަރޭޒް ބުންޏެވެ.
އަލްވަރޭޒް ބުނީ، އޭނާގެ މުސްތަގުބަލާ ގުޅޭގޮތުން، ގޮތެއް ނިންމާނީ މިހާރު ކުރިއަށްދާ އޮލިމްޕިކްސް ގޭމްސް ނިމުމުން ކަމަށެވެ. އެގޮތުން، އެންމެ ފުރަތަމަ ކުޑަ ބްރޭކެއް ނަގާނީ ކަމަށާއި، ގޮތެއް ނިންމާނީ އޭގެފަހުން ކަމަށް ވެސް އަލްވަރޭޒް ބުނެފައިވެއެވެ.
ސިޓީގެ ޖާޒީގައި އަލްވަރޭޒް އެންމެ ފަހުން ކުޅުނީ މިދިޔަ މެއި މަހުގައި މެންޗެސްޓާ ޔުނައިޓެޑް އަތުން އެފްއޭ ކަޕް ފައިނަލްގައި ބަލިވި މެޗުގައެވެ. އެ މެޗުގައި އޭނާ ކުޅެން ނިކުތީ ބަދަލު ކުޅުންތެރިއެއްގެ ގޮތުގައެވެ.
މީގެ ދެ އަހަރެއްހާ ދުވަސްކުރީން، އާޖެންޓީނާގެ ރިވާ ޕްލޭޓް އިން ސިޓީ އަށް ބަދަލުވެ، އަލްވަރޭޒް ވަނީ އެ ޓީމަށް މިހާތަނަށް 103 މެޗު ކުޅެދީ، 36 ލަނޑުޖަހައިފައެވެ. އަލްވަރޭޒް ވަނީ، ސިޓީ އާއެކު، ޕްރިމިއާ ލީގު ދެ ފަހަރު، ޗެމްޕިއަންސް ލީގާއި އެފްއޭ ކަޕާއި ކްލަބް ވޯލްޑް ކަޕްގެ އިތުރުން ޔުއެފާ ސުޕަ ކަޕް އެއްފަހަރު ކާމިޔާބުކޮށްފައެވެ.
ސިޓީގައި ހޭދަކުރީ މުއްދަތުގައި އަލްވަރޭޒް އަށް ކުރިމަތިވީ އެންމެ ބޮޑު ޗެލެންޖަކީ، ނޯވޭގެ އާލިން ބްރައުޓް ހާލަންޑް ހިމެނޭ އެ ޓީމުގެ ފޯވާޑްލައިންގައި ހިމެނިގެން ގަވާއިދުން ކުޅުމުގެ ފުރުޞަތު ނުލިބުމެވެ. އެގޮތުން، ކުރީ ސީޒަނާ އަޅާބަލާއިރު ނިމިދިޔަ ސީޒަނުގައި ސިޓީގެ ފުރަތަމަ އެގާރައިގައި ކުޅުމުގެ ފުރުޞަތު އަލްވަރޭޒް އަށް ގިނައިން ލިބުނީ އަނިޔާގެ ސަބަބުން ހާލަންޑަށް މެޗުތަކެއް ގެއްލުމުގެ ސަބަބުންނެވެ.
އެހެންކަމުން، ސިޓީ ދޫކޮށްލަން އަލްވަރޭޒް ބޭނުންވާ މައިގަނޑު ސަބަބަކީ ބޮޑެތި، ވަރުގަދަ މެޗުތަކުގައި ބެންޗުގައި އިންނަން ޖެހުން ކަމަށް މީޑިއާ ހަބަރުތައް ބުނެއެވެ. އެކަމަށް އިޝާރާތްކޮށް އަލްވަރޭޒް ބުނީ، ބޮޑެތި މެޗުތަކުގައި ކުޅުމުގެ ފުރުޞަތު އެކަށީގެންވާ ވަރަށް ނުލިބޭތީވެ ހިތްހަމަނުޖެހޭ ކަމަށެވެ. އެއީ ކޮންމެ ކުޅުންތެރިއަކު ވެސް ބޭނުންވާނީ ދަނޑުމަތީގައި ވީހާވެސް ގިނަވަގުތު ހޭދަކޮށް ޓީމަށް އެހީވުމަށް ކަމަށް އަލްވަރޭޒް ބުންޏެވެ. އެހެންނަމަވެސް، ނިމިދިޔަ ސީޒަނާ މެދު ހިތްހަމަޖެހޭ ކަމަށް އަލްވަރޭޒް ފާހަގަކުރިއެވެ.
އޮލިމްޕިކްސްގެ ފިރިހެނުންގެ ފުޓްބޯޅަ އިވެންޓްގައި އަލްވަރޭޒްގެ އާޖެންޓީނާ އަށް ދެން އޮތީ ކުއާޓާ ފައިނަލްގައި ހޯސްޓް، ފްރާންސާ ދެކޮޅަށް ކުޅުމަށް ހަމަޖެހިފައިވާ މެޗެވެ.