ފަސޭހަކަމާއެކު ޢަދުލު އިންސާފަށް ވާޞިލުވުމުގެ ފުރުޞަތު ފަހިކޮށްދެއްވުމަށް ޝަރުޢީ ދާޢިރާއިން ކުރައްވަމުން ގެންދަވާ މަސައްކަތްތަކުގެ ދަށުން ހުޅުމާލޭގައި ސިވިލްކޯޓްގެ ޑިވިޜަނެއް ޤާއިމުކުރެއްވުމަށް މިދިޔަ އޭޕްރީލްމަހުގެ 13 ވަނަ ދުވަހު ނިންމަވާފައިވާއިރު، މިއީ ރާއްޖޭގެ ތާރީޚްގައިވެސް ފުރަތަމަ ފަހަރަށް މާލެއިން ބޭރުގައި ސުޕީރިއަރ ކޯޓެއްގެ ޑިވިޝަނެއް ޤާއިމުކުރެއްވި ފުރަތަމަ ފަހަރެވެ.
ސުޕްރީމް ކޯޓުގެ ފަނޑިޔާރުންގެ މަޖިލީހުން ނިންމެވި ނިންމެވުމާ އެއްގޮތަށް ހުޅުމާލޭގައި ސިވިލް ކޯޓްގެ ޑިވިޜަން ޤާއިމުކުރެވިފައިވާއިރު އެޑިވިޜަންގެ އިދާރީ މަސައްކަތްތައް މިވަގުތު ކުރައްވަމުންދަނީ މާލޭގައި ހުންނަ ސިވިލްކޯޓްގެ މައި ޢިމާރާތް ކަމުގައިވާ ޖަސްޓިސް ބިލްޑިންގްގައެވެ. ޕަބްލިކް ސަރވިސް މީޑިއާ، ޕީ.އެސް.އެމްއަށް މައުލޫމާތު ދެއްވަމުން ސިވިލްކޯޓްގެ ޤާޟީ އަލްއުސްތާޛް ޢަބްދުﷲ ޢަލީ ވިދާޅުވީ ހުޅުމާލޭގައި ޤާއިމުކުރެއްވި ސިވިލް ކޯޓްގެ ޑިވިޜަންގެ މަސައްކަތަށް ޚާއްޞަކުރައްވައިގެން އަޅުއްވާ ޢިމާރާތުގެ މަސައްކަތް އަންނަ ހަފްތާތެރޭގައި ނިންމާލެވޭނެކަމަށެވެ. މިހާރު ކުރިއަށްދަނީ އެ ޢިމާރާތުގެ ފިނިޝިންގް މަސައްކަތްކަން ޤާޟީ ފާހަގަކުރެއްވިއެވެ. އަދި މިހާރު އިންތިޒާމް ކުރެވިފައިވާގޮތަށް މަސައްކަތްތައް ކުރިއަށްދާނަމަ ރަމަޟާންމަސް ފެށުމުގެ ކުރިން ސިވިލް ކޯޓްގެ ޑިވިޜަން ހުޅުމާލޭގައި ހިންގަން ފެށޭނެކަމަށް ޤާޟީ ޢަބްދުﷲ ޢަލީ ވިދާޅުވިއެވެ.
img:http://s1.psmnews.mv/images/660x400/14617381998657.jpg|ސިވިލް ކޯޓް ހިންގަމުންދާ އިމާރާތް- ފޮޓޯ: ޕީއެސްއެމް
ހުޅުމާލޭގެ ތަރައްޤީއަށް ސަރުކާރުން ގެންގުޅުއްވާ ތަޞައްވުރަށް ބަލާއިރު ކުރިއަށް އޮތް ތަނުގައި ހުޅުމާލެ ވެގެންދާނީ ރާއްޖޭގެ އާބާދީގެ ބޮޑުބައެއް ދިރިއުޅޭ ރަށަކަށެވެ. އެގޮތުން މިހާރުވެސް ހުޅުމާލޭގެ އާބާދީ ފަންސާސް ހާހާ ގާތްކުރެއެވެ. ސިވިލް ކޯޓްގެ ޤާޟީ ޢަބްދުﷲ ޢަލީ ވިދާޅުވީ ހުޅުމާލޭގައި ދިރިއުޅޭ ރައްޔިތުންގެ ފަރާތުންވެސް އެކަށީގެންވާ ގިނައަދަދެއްގެ މައްސަލަތައް ހުށައެޅޭކަމަށެވެ. އަދި ހުޅުމާލޭގައި އެކޯޓްގެ ޑިވިޜަން ޤާއިމުކުރެވި ޝަރީޢަތްތައް ފެށުމުން މައްސަލަތައް ހުށައެޅުމަށް ރައްޔިތުންނަށް ލިބިގެންދާ ލުއިފަސޭހަކަމުގެ ސަބަބުން އިތުރު މައްސަލަތައް ހުށައެޅޭނެކަމަށް ޤަބޫލުކުރައްވާކަމަށް ވިދާޅުވިއެވެ.
ހުޅުމާލޭގައި ޤާއިމުކުރެވޭ ސިވިލް ކޯޓްގެ ޑިވިޜަނަށް ސިވިލްކޯޓްގައި މިހާރު ތިއްބެވި ޤާޟީންގެ ތެރެއިން ސުޕްރީމްކޯޓްގެ ފަނޑިޔާރުންގެ މަޖިލީހުން ކަނޑައަޅުއްވާ 2 ޤާޟީއަކު ޢައްޔަންކުރެވިގެންދާނެއެވެ.
ސިވިލް ކޯޓްގެ ޑިވިޜަނެއް ހުޅުމާލޭގައި ޤާއިމުކުރެއްވުމަށް ނިންމެވި ނިންމެވުމަކީ ތަނަވަސްވެ ފުޅާވަމުންދާ ދިވެހިރާއްޖޭގެ އިޤްތިޞާދީ އަދި އިޖްތިމާޢީ ކުރިއެރުމަށް ބޮޑަށް ފަހި ޝަރުޢީ ނިޒާމެއް ޤާއިމުކޮށްދެއްވުމަށް ކުރެވެމުންދާ މަސައްކަތުގެ ދަށުން އެޅުއްވި މުހިންމު ފިޔަވަޅެއްގޮތުގައި އުއްތަމަ ފަނޑިޔާރު ވަނީ ސިފަކުރައްވާފައެވެ.