33 ވަނަ ގައުމީ ކެރަމް މުބާރާތުގެ އެއްވަނަ ޑިވިޝަނުގެ ފިރިހެން ސިންގަލްސް ޗެމްޕިއަންކަން ޖެހިޖެހިގެން ތިންވަނަ ފަހަރަށް އިސްމާއިލް އަޒްމީން ހޯދައިފިއެވެ.
އަޒްމީން ވަނީ ގައުމީ ކެރަމް މުބާރާތުގެ ސިންގަލްސް ޗެމްޕިއަންކަން 2022، 2023، އަދި 2024 ވަނަ އަހަރު ހޯދާފައެވެ.
މިފަހަރުގެ ގައުމީ ކެރަމް މުބާރާތުގެ ފުރަތަމަ ޑިވިޝަނުގެ ފިރިހެން ސިންގަލްސް އިވެންޓްގައި 23 ކުޅުންތެރިން ވާދަކޮށްފައިވެއެވެ.
ހުޅުމާލޭ ސްޕޯޓްސް ކޮމްޕްލެކްސްގައި ކުރިއަށްދިޔަ މި ފަހަރުގެ މުބާރާތުގެ ފިރިހެން ސިންގަލްސް ފައިނަލްގައި އަޒްމީން ވަނީ 2-1 ސެޓުން އިބްރާހިމް ހުޖާން އަލީ ބަލިކޮށްފައެވެ.
މި މެޗުގެ ފުރަތަމަ ސެޓު އަޒްމީން ކާމިޔާބުކުރީ 25-6 އިންނެވެ. ދެންޖެހިގެންއައި ދެވަނަ ސެޓުގެ ކުރީކޮޅު އަޒްމީން 8-0 އިން ކުރީގައި އޮއްވާ، ހުޖާން ވަނީ ވަރަށް މުހިއްމު ޕޮއިންޓްތަކެއް ހޯދައި، ނަތީޖާ 10-8 އަށް ބަދަލުކޮށްލާފައެވެ. އަދި އެއަށްފަހު، އަޒްމީން އަށް އިތުރު ފުރުޞަތެއްނުދީ ހުޖާން ވަނީ 24-8 އަށް ނަތީޖާ ބަދަލުކޮށްލިއެވެ.
އެހެންނަމަވެސް، އަޒްމީން ވަނީ ދެންޖެހިގެން ކުޅެވުނު ފަސްވަނަ ބޯޑުގައި ވައިޓް ސްލޭމް އަށް ހަދައި، ނަތީޖާ 20-24 އަށް ބަދަލުކޮށްލައި، ފަރަގު ކުޑަކޮށްފައެވެ. އަދި އޭގެފަހުން، ދެން ކުޅެވުނު ހަވަނަ ބޯޑުގައި އިތުރު ހަތަރު ޕޮއިންޓް ހޯދައި، އަޒްމީން ވަނީ 24-24 އިން ނަތީޖާ އެއްވަރުކޮށްފައެވެ. އެކަމަކު، ދެން ޖެހިގެންއައި ބޯޑުގައި ހޯދި ޕޮއިންޓާއެކު ހުޖާން ދެވަނަ ސެޓު ކާމިޔާބުކުރީ 25-24 އިންނެވެ.
ނަތީޖާ ނެރުމަށް ކުޅެވުނު ތިންވަނަ ސެޓު ފެށިގެން 2-0 އިން ނެގި ލީޑް ފިޔަވައި، ހުޖާން އަށް އިތުރު ލީޑެއްނެގިޔަނުދީ އަޒްމީން ވަނީ 10-2 އިން ފުރަތަމަ ފަހަރަށް ނެގި ލީޑާއެކު، ނަތީޖާ އަނބުރާލައި ކޮންޓްރޯލް އަތުލާފައެވެ. އަދި އެއަށްފަހު، 16-2 އިން ލީޑް އިތުރަށް ފުޅާކޮށް، އަޒްމީން މެޗު ކާމިޔާބުކުރީ 24-3 އިންނެވެ.