ރިޔާދުގައި 92 ހާސް މީހުންގެ ޖާގައިގެ ސްޓޭޑިއަމެއް އެޅުމަށް ރާވާފައިވާ ކަމަށް ސަޢުދީ އަރަބިއްޔާ އިން ބުނެފިއެވެ.
އެގޮތުން، ސަޢުދީ އަރަބިއްޔާ އިން ވަނީ، މި ސްޓޭޑިއަމަކީ ބޮޑެތި ބައިނަލްއަޤްވާމީ އިވެންޓްތައް ބޭއްވުމުގެ ގާބިލްކަން ލިބިގެންދާނެ ތަނެއް ކަމަށް ބުނެފައެވެ. އަދި، 2034 ވަނަ އަހަރުގެ ފީފާ ވޯލްޑް ކަޕް ބޭއްވުމުގެ ބިޑް ކާމިޔާބުކުރުމަށް އެ ގައުމުން ކުރަމުންދާ މަސައްކަތްތަކަށް އެޅިގެންދިޔަ ފުރިހަމަ ފިޔަވަޅެއް ކަމަށް މީޑިއާ ހަބަރުތައް ބުނެއެވެ.
މި ސްޓޭޑިއަމްގެ އެންމެހައި ފަރުމާތަކެއް ސަޢޫދީ ކުޅިވަރު މިނިސްޓްރީން އެޕްރޫވްކޮށް، ހާމަކޮށްފައިވާއިރު، ހުރިހާ މަސައްކަތްތަކެއް ނިންމާލެވޭނެ ކަމަށް ބެލެވެނީ، 2029 ވަނަ އަހަރުގެ ހަތަރުވަނަ ކުއާޓަރުގައި ކަމަށް ވެސް ސައުދީ ސަރުކާރުގެ ނޫސް އެޖެންސީ، އެސްޕީއޭއިން ހާމަކޮށްފައިވެއެވެ.
މި ސްޓޭޑިއަމް ވެގެންދާނީ، ސަޢުދީ އަރަބިއްޔާގެ ޤައުމީ ފުޓްބޯޅަ ޓީމުގެ މައި މަރުކަޒުގެ ގޮތުގައި ބޭނުންކުރެވޭނެ ތަނަށް ކަމަށާއި، މީގެ އިތުރުން، މި ސްޓޭޑިއަމް ހިމެނޭނީ، އިންޑޯ ސްޕޯޓްސް ހޯލަކާއި، އޮލިމްޕިކް ސައިޒުގެ ފެތުމުގެ ޕޫލް އަކާއެކު، އެހެނިހެން ވަސީލަތްތައް ލިބެން ހުރި ސްޕޯޓްސް ކޮމްޕްލެކްސްއެއްގެ ތެރޭގައި ހިމެނޭ އެއް ތަނަށް ކަމަށް ވެސް މީޑިއާ ހަބަރުތައް ބުނެއެވެ. އަދި މިތަނަށް ނަންދެވިގެންދާނީ ސަޢުދީ ރަސްގެފާނު ސަލްމާންގެ ނަންފުޅުން ކަމަށް ވެސް ހަބަރުތައް ބުނެއެވެ.
މި ސްޓޭޑިއަމްގެ ފަރުމާ ހޮވާފައިވަނީ، ބައިނަލްއަގުވާމީ ހަ ކުންފުންޏަކުން ހުށަހެޅި ފަރުމާތަކުގެ ތެރެއިން ކަމަށާއި، އަދި، މިއީ ފީފާގެ ހުރިހާ ޝަރުތެއް ހަމަވާ، ދެމެހެއްޓެނިވި ގޮތެއްގައި ތަރައްޤީކުރުމާއި އިމާރާތްކުރުމުގެ ފަންނުގެ އެންމެ މަތީ ފެންވަރުގެ މިންގަނޑުތަކާ އެއްގޮތްވާ ގޮތުގެ މަތިން ކަށަވަރުކުރެވިފައިވާ ފަރުމާއެއް ކަމަށް ވެސް އެސްޕީއޭއިން ބުނެއެވެ.
މިދިޔަ މާރިޗް މަހުގެ ތެރޭގައި، ސަޢުދީ ޢަރަބިއްޔާއިން ވަނީ 2034 ވަނަ އަހަރުގެ ވޯލްޑް ކަޕް ބޭއްވުމަށް ކެމްޕޭނު ފަށާފައެވެ. އަދި، މިދިޔަ އަހަރުގެ ފަހުކޮޅު ފީފާއިން ކަނޑައެޅި ސުންގަޑިއަށް އެހެން އެއްވެސް ފަރާތަކުން ޝައުޤުވެރިކަން ފާޅުކޮށްފައިނުވާތީ، މި ބިޑު ކާމިޔާބުވާނެކަމުގެ ޔަގީންކަން ބޮޑެވެ.