ރެއާލް ސޮސިއެޑާޑަށް ކުޅުނު ސްޕެއިނުގެ ޑިފެންޑަރު ރޮބިން ލޭ ނޯމަންޑް ގަތުމަށް އެޓްލެޓިކޯ މެޑްރިޑުން އެ ކްލަބާއެކު އެއްބަސްވުމަކަށް އައިސްފައިވާ ކަމަށް މީޑިއާ ރިޕޯޓުތައް ބުނެފިއެވެ.
ނޯމަންޑް، 27، ގެ ޓްރާންސްފާއާ ގުޅޭގޮތުން، އެތުލެޓިކޯ އިން ނެރުނު ބަޔާނުގައިވަނީ، ނޯމަންޑް ގަތުމަށް އެ ދެ ކްލަބުން އެއްބަސްވުމަކަށް އައިސްފައިވާ ކަމަށާއި، ކުރިއަށް އޮތް ދުވަސްތަކުގައި ޗުއްޓީ އަށް ފަހު ނޯމަންޑް އެނބުރިއައުމުން ޑީލުގެ ހުރިހާ ކަމެއް ނިންމާލެވެނޭ ކަމަށެވެ.
މިހާތަނަށް ދެ ކްލަބުންވެސް މި ޓްރާންސްފާއާ ގުޅޭ މާލީ ތަފްޞީލް ހާމަކޮށްފައެއް ނުވެއެވެ. ސްޕެއިނުގެ މީޑިއާ ހަބަރުތައް ބުނާގޮތުން، ނޯމަންޑް، އެތުލެޓިކޯއާ ގުޅޭނީ ބޯނަހާއެކު ގާތްގަނޑަކަށް 30 މިލިއަން ޔޫރޯ (32.57 މިލިއަން އެމެރިކާ ޑޮލަރު) ގެ ޑީލެއްގައެވެ.
ފްރާންސަށް އުފަން ނޯމަންޑްގެ ކެރިއަރު ފެށީ އެ ގައުމުގެ ލީގުގެ ކްލަބު ބްރެސްޓް އިންނެވެ. އެއަށްފަހު، އުމުރުން 19 އަހަރުގައި ނޯމަންޑް، ސޮސިއެޑާޑާ ގުޅުނީ 2016 ވަނަ އަހަރު އެވެ. އޭގެފަހުން މިހާތަނަށްއައިއިރު އޭނާ ވަނީ ސޮސިއެޑާޑަށް 221 މެޗު ކުޅެދީފައެވެ. އެ ޓީމުން 2020 ވަނަ އަހަރުގެ ކޮޕާ ޑެލް ރޭ ކާމިޔާބުކުރިއިރު ނޯމަންޑް ވަނީ މުހިއްމު ދައުރެއް އަދާކޮށްފައެވެ.
އެންމެ ފަހުގެ ޔޫރޯގައި ސްޕެއިނުން ތަށި ކާމިޔާބުކުރިއިރު އެ ޓީމުގެ ޑިފެންސްގައި މުހިއްމު ދައުރެއް އަދާކުރި ނޯމަންޑް ވަނީ ގައުމީ ޓީމަށް މިހާތަނަށް 17 މެޗު ކުޅެދީފައެވެ.