މަސްތުވާތަކެތީގެ ވިޔަފާރީގެ ބޮޑުން ކަމުގައިވާ 'އެލް މާޔޯ' އަދި 'އެލް ޗަޕޯ'ގެ ދަރިއެއް ހައްޔަރު ކޮށްފި

މަސްތުވާތަކެތީގެ ވިޔަފާރީގެ ބޮޑެއް ކަމުގައިވާ މެކްސިކޯގެ އިސްމާޢީލް "އެމް މާޔޯ" ޒަމްބާޑާގެ އިތުރުން, ހޮއަކީން "އެލް ޗަޕޯ" ގުޒްމާންގެ ދަރިފުޅު, ހޮއަކީން ގުޒްމާން ލޮޕޭޒް ހައްޔަރު ކޮށްފިއެވެ. އެ މީހުން ހައްޔަރު ކޮށްފައި ވަނީ އެމެރިކާގެ ޓެކްސަސް ސްޓޭޓްގެ އެލް ޕާސޯގައި އެމެރިކާގެ އިދާރާތަކުން ހިންގި ޚާއްޞަ އޮޕަރޭޝަނެއްގައެވެ. އެ މީހުންގެ ހައްޔަރާ އެކު, މެކްސިކޯގެ މަސްތުވާތަކެތީގެ ވަގުފާރީގެ ސިނާޢަތާއި ކުށުގެ ވެއްޓަށް ބޮޑެތި ބަދަލުތަކެއް އަންނާނެ ކަމަށް ބެލެވެއެވެ.

ޒަމްބާޑާއަކީ, މަސްތުވާތަކެތީގެ ވިޔަފާރި ކުރާ މެކްސިކޯގެ އެންމެ ބޮޑު ގުރޫޕު, ސިނަލޮއާ ކާޓެލްގެ އެއް ބާނީއެވެ. އެ ގުރޫޕު އުފެދިގެން ދިޔައީ ޒަމްބާޑާއާއި "އެލް ޗަޕޯ" ގުޒްމާން އަޑީގައި ތިބެގެންނެވެ. ގުޒްމާން ވެސް މިހާރު ހުރީ ހައްޔަރުގައެވެ. 2017ވަނަ އަހަރު މެކްސިކޯއިން ވަނީ ހުކުމް ތަންފީޒު ކުރުމަށް އޭނާ އެމެރިކާގެ ޖަލަކަށް ބަދަލު ކޮށްފައެވެ.

ޒަމްބާޑާއާއި ގުޒްމާން ލޮޕޭޒް ހައްޔަރު ކޮށްފައި ވަނީ އެމެރިކާއަށް މަސްތުވާތަކެތި އެތެރެ ކުރުމުގެ ތުހުމަތުގައެވެ. އޭގެ ތެރޭގައި މަސްތުވާތަކެތީގެ ނުރައްކާތެރި ބާވަތެއް ކަމުގައިވާ ފެންޓެނިލް ހިމެނެއެވެ. އެމެރިކާގެ މަސްތުވާތަކެތި ބޭނުން ކުރާ އާބާދީގައި ހިމެނޭ އުމުރުން 18 އަހަރާއި 45 އަހަރާ ދެމެދުގެ އެންމެ ގިނަ ޢަދަދެއްގެ ބަޔަކު މަރުވަމުން ދަނީ ފެންޓެނިލް ބޭނުން ކުރުމާ ގުޅިގެން ކަމަށް އެ ޤައުމުގެ އިދާރާތަކުން ބުނެއެވެ.

ނަން ހާމަ ކޮށްފައި ނުވާ އެމެރިކާގެ ކަމާ ގުޅޭ އިދާރާއެއްގެ އޮފިޝަލުން ބުނީ, އުމުރުން 70ގެ އަހަރުތައް ގުނަމުންދާ ޒަމްބާޑާއާއި 30ގެ އަހަރުތައް ގުނަމުންދާ ގުޒްމާން ލޮޕޭޒް ހައްޔަރު ކޮށްފައި ވަނީ, ޕްރައިވެޓް މަތިންދާބޯޓެއްގައި އެލް ޕާސޯގެ ވައިގެ ބަނދަރަކަށް ޖެއްސި ވަގުތުގައި ކަމުގައެވެ. އެމެރިކާއިން ހައްޔަރު ކޮށްފައިވާ ޒަމްބާޑާ ލޮޕޭޒަކީ އެލް ޗަޕޯގެ ހަތަރު ފިރިހެން ދަރިންގެ ތެރެއިން އެއް ދަރިފުޅެވެ. އެލް ޗަޕޯ ހައްޔަރުކޮށް ޖަލަށްލުމާ ގުޅިގެން, އޭނާގެ ވިޔަފާރި ހިންގުމާ ހަވާލުވެފައި ވަނީ އޭނާގެ ދަރިންނެވެ. އޭގެ ތެރެއިން އޮވީދިޔޯ ގުޒްމާން 2023 އަހަރު ހައްޔަރު ކޮށް, އެމެރިކާއަށް ބަދަލު ކޮށްފައިވެއެވެ.

އެމެރިކާއިން ތުހުމަތު ކުރާ ގޮތުގައި އެ ޤައުމަށް ފެންޓެނިލް އެތެރެ ކުރުމުގައި އެންމެ ފުޅާ ދާއިރާއެއްގައި ހަރަކާތްތެރި ވަނީ ސިނަލޮއާ ކާޓެލެވެ. އަދި, އެ ގުރޫޕުގެ އިސްވެރިން ހައްޔަރު ކުރުމަށް އެމެރިކާއިން އޮޕަރޭޝަންތައް ހިންގަމުންދާތާ އެތަކެއް އަހަރެއް ފާއިތުވެއްޖެއެވެ. އެމެރިކާގެ އެޓަރނީ ޖެނެރަލް މެރިކް ގާލެންޑް ވިދާޅުވީ ޒަމްބާޑާއާއި ގުޒްމާން ލޮޕޭޒްގެ މައްޗަށް ފެންޓެނިލް އުފެއްދުމާއި ވަގުފާރި ކުރުމުގެ ދަޢުވާ އުފުލާނެ ކަމުގައެވެ. އެ ދެ މީހުން ހައްޔަރު ކޮށްފައިވާއިރު, ޒަމްބާޑާ ހައްޔަރު ކުރުމުގައި އެހީތެރިވެދޭ ފަރާތަކަށް 15 މިލިޔަން އެމެރިކާ ޑޮލަރު, އަދި ގުޒްމާން ލޮޕޭޒް ހައްޔަރު ކުރުމުގައި އެހީތެރިވެދޭ ފަރާތަކަށް 5 މިލިޔަން އެމެރިކާ ޑޮލަރުގެ ފައިސާގެ އިނާމެއް އެމެރިކާއިން އޮތީ ހުށަހަޅާފައެވެ.

ސިނަލޮއާ ކާޓެލުން 50 ޤައުމަކަށް މަސްތުވާތަކެތި ވަގުފާރި ކުރާ ކަމުގައި ރިޕޯޓުތައް ބުނެއެވެ. އަދި, އެއީ މަސްތުވާތަކެތީގެ ވިޔަފާރި ކުރާ މެކްސިކޯގެ އެންމެ ބޮޑު ދެ ގުރޫޕުގެ ތެރެއިން އެއް ގުރޫޕެވެ. އެ ގުރޫޕުގެ ދެ ބޮޑުން ހައްޔަރު ކުރުމާ އެކު, އެ ގުރޫޕުގެ ވެރިކަން ހޯދުމަށް ހަމަނުޖެހުންތަކެއް ހިނގާނެ ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.

ޒަމްބާޑާއާއި ގުޒްމާން ލޮޕޭޒް ހައްޔަރު ކޮށްފައި ވަނީ އެމެރިކާގެ ތަޙުޤީޤީ އިދާރާ, ފެޑެރަލް ބިޔުރޯ އޮފް އިންވެސްޓިގޭޝަން (އެފްބީއައި) އަދި ޤައުމީ ސަލާމަތާ ބެހޭ އިދާރާ, ހޯމްލޭންޑް ސެކިޔުރިޓީ އިންވެސްޓިގޭޝަންސް (އެޗްއެސްއައި)ން ހިންގި ޚާއްޞަ އޮޕަރޭޝަނެއްގައެވެ.