މެންޗެސްޓާ ސިޓީގެ ބްރެޒިލް ކީޕަރު، އެޑަސަން މޮރައޭސް އެ ކްލަބުގައި މަޑުކުރާނެ ކަމުގެ ޔަގީންކަންދެވެން ނެތް ކަމަށް އެ ޓީމުގެ ކޯޗު، ޕެޕް ގާޑިއޯލާ ބުނެފިއެވެ.
އެޑަސަން، 30، ގެންދިއުމަށް ސައުދީ ޕްރޯ ލީގުގެ ޓީމުތަކުން މަސައްކަތްކުރަމުން އަންނަ ކަމަށް މީޑިއާ ހަބަރުތައް ބުނެއެވެ.
މިދިޔަ ސީޒަނުގައި ވެސް ގާޑިއޯލާ ވަނީ، އެޑަސަން އަކީ ސިޓީގެ އެއްވަނަ ގޯލްކީޕަރު ކަމަށް ބުނެފައެވެ. ނަމަވެސް، ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި ސިޓީއާ ރެއާލް މެޑްރިޑް ބައްދަލުކުރި ފުރަތަމަ ލެގުގެ މެޗުގައި ފުރުޞަތުދިނީ ބަދަލު ކީޕަރު، ސްޓެފަން އޯޓޭގާ އަށެވެ.
ޕްރީ-ސީޒަންގައި ސެލްޓިކް އަތުން 4-3 އިން ސިޓީ ބަލިވި މެޗަށްފަހު ގާޑިއޯލާ ވަނީ، އެޑަސަންގެ މުސްތަގުބަލާ ގުޅޭގޮތުން ވާހަކަދައްކާފައެވެ. އެގޮތުން، ގާޑިއޯލާ ބުނީ، އެޑަސަން މަޑުކުރުވަން ބޭނުންވާ ކަމަށާއި، އެހެންނަމަވެސް އެކަން އެގޮތަށް ވާން އޮތީ އެހެން ކުލަބުތަކުން ހަދާ ގޮތެއް ބެލުމަށްފަހު ކަމަށެވެ.
"އަހަރެންނަށް މިހާރުގެ ހާލަތެއް ނޭނގޭ. މިދިޔަ ދުވަސްތަކުގައި އަހަރެމެން މާގިނަ ވާހަކަތަކެއް ނުދައްކަން." ގާޑިއޯލާ ބުންޏެވެ.
އެޑަސަންގެ މުސްތަގުބަލާމެދު އެއްޗެއް ބުނަން އެނގޭނީ، ޓީމުގެ ފަރިތަކުރުންތައް ކުރިއަށްދާގޮތުން، އެހެން ޓީމުތަކުގެ ހަރަކާތްތައްވެސް ހުންނަ ގޮތަކުން ކަމަށް ވެސް ގާޑިއޯލާ ބުންޏެވެ.
މީގެ ހަތްވަރަކަށް އަހަރުކުރީން، 2017 ވަނަ އަހަރުގައި އެޑަސަން، ބެންފީކާ އިން ސިޓީ އަށް ބަދަލުވީ، 43 މިލިއަން ޑޮލަރުގެ ޑީލެއްގަ އެވެ. އޭނާ ވަނީ ސިޓީގައި މިހާތަނަށް ހޭދަކުރި ހަތް ސީޒަނުގެ ތެރެއިން ހަ ފަހަރު އިނގިރޭސި ޕްރިމިއާ ލީގު، އެއް ފަހަރު ޗެމްޕިއަންސް ލީގާއި ފީފާ ކްލަބް ވޯލްޑް ކަޕް ވެސް ކާމިޔާބުކޮށްފައެވެ.