ސިންގަޕޫރުގެ އައްސޭރިފަށުން ދަތުރު ކުރަމުން ދަނިކޮށް އެ ޤައުމުގެ ތެޔޮ އުފުލާ ޓޭންކަރެއްގައި ޖެއްސުމަށް ފަހު މަޑުނުކޮށް ފިލި އުޅަނދު ހޯދައިފިއެވެ. ސިރީސް އެކެއްގެ ނަން ދީފައިވާ އުޅަނދު ހޯދާފައި ވަނީ މެލޭޝިޔާގެ ކޯސްޓްގާޑުންނެވެ. ދެ އުޅަނދު ޖެހިފައި ވަނީ ސިންގަޕޫރުގައި އޮންނަ ދުނިޔޭގެ އެންމެ ބޮޑު ތެޔޮ ބަރު ކުރާ ބަނދަރު ކައިރިންނެވެ. ތެޔޮ އުފުލާ ޓޭންކަރެއް ކަމުގައިވާ ސިރީސް އެކެއް ޖައްސާފައި ވަނީ ހަފްނިޔާ ނައިލް ކިޔާ އުޅަނދެއްގައެވެ.
މެލޭޝިޔާގެ ކޯސްޓްގާޑުން ބުނީ, ދެ އުޅަނދު އެކްސިޑެންޓުވުމުން ސިރީސް އެކެއް އެ ސަރަޙައްދުން ފިލާފައިވާ ކަމުގައެވެ. އަދި, އުޅަނދު އޮތް ތަން ހާމަކޮށްދޭ ޓްރެކިންގ ޑިވައިސްތައް ވެސް ނިވައިލާފައިވާ ކަމުގައެވެ. އެ ހާދިސާގައި ހަފްނިޔާ ނައިލްގައި އަލިފާން ރޯވެ, ދެ ފަޅުވެރިންނަށް އަނިޔާވިއެވެ.
ސިރީސް އެކެއް ފެނިފައި ވަނީ މެލޭޝިޔާގެ ކަނޑުގެ ސަރަޙައްދުންނެވެ. އެ އުޅަނދު ފެނުނީ އިތުރު ދެ ޓަގު ބޯޓުން އެ އުޅަނދު ކަފު ޖަހައިގެން ގެންދަނިކޮށް ކަމުގައި މެލޭޝިޔާގެ ކޯސްޓްގާޑުން ބުންޏެވެ. މެލޭޝިޔާގެ އިދާރާތަކުން ވަނީ ސިރީސް އެކެއްގެ އިތުރުން އެ ދެ ޓަގުބޯޓު ހިފަހައްޓައި, އޭގައި ތިބި ފަޅުވެރިން ހައްޔަރު ކޮށްފައެވެ. އަދި, މި ހާދިސާ ތަޙުޤީޤު ކުރަމުންދާ ކަމުގައި ވެސް މެލޭޝިޔާގެ އިދާރާތަކުން ހާމަކުރިއެވެ.
ދެ އުޅަނދު ޖެހުނު ހާދިސާގައި ހަފްނިޔާ ނައިލަށް ލިބުނު ގެއްލުންތަކާ ގުޅިގެން ކަނޑަށް ތެޔޮ ލީކުވެދާނެ ކަމުގެ ބިރު ހީވިއެވެ. ނަމަވެސް, މިހާތަނަށް ބެލި ބެލުމުން, ކަނޑަށް ގިނަ ޢަދަދެއްގެ ތެޔޮ އެޅިފައި ނުވާ ކަމަށް, މި ހާދިސާ ތަޙުޤީޤު ކުރަމުންދާ އިދާރާތަކުން ހާމަކުރިއެވެ. "މެލޭޝިޔާގެ ތިމާވެއްޓާ ބެހޭ އިދާރާއިން ދަނީ މި ކަން އިތުރަށް ތަޙުޤީޤު ކުރަމުން،" އެ ޤައުމުގެ ކޯސްޓްގާޑުން ބުންޏެވެ.
މި ހާދިސާ ހިނގި ވަގުތު ހަފްނިޔާ ނައިލްގައި 22 ފަޅުވެރިން ތިއްބެވެ. އަދި, ސިރީސް އެކެއްގައި 40 ފަޅުވެރިން ތިބި ކަމުގައި ސިންގަޕޫރުގެ މެރިޓައިމް އެންޑް ޕޯޓް އޮތޯރީޓީ (އެމްޕީއޭ)ން ހާމަ ކުރިއެވެ. އެ އެންމެންގެ ހާލު ރަނގަޅު ކަމުގައި ވެސް އެ އިދާރާއިން ބުންޏެވެ. ހަފްނިޔާ ނައިލްގައި ރޯވި އަލިފާންގަނޑު އެއްކޮށް ނިއްވައިލެވިފައިވާ ކަން އަދި ސާފެއް ނޫނެވެ.
އެކްސިޑެންޓުވެފައިވާ ހަފްނިޔާ ނައިލަކީ 74,000 މެޓްރިކް ޓަނުގެ ތެޔޮ އުފުލުގެ ގާބިލުކަން ހުރި އުޅަނދެކެވެ. އެކްސިޑެންޓު ހިނގި ވަގުތު އެ އުޅަނދުގައި 300,000 ފީފާގެ ތެޔޮ ހުއްޓެވެ. ސިރީސް އެކެއް އެކްސިޑެންޓުވި ވަގުތު އޭގައި 2 މިލިޔަން ފީފާގެ ތެޔޮ ހުރި ކަމުގައި ރިޕޯޓުތައް ބުނެއެވެ. އެ އުޅަނދަށް ތެޔޮ ބަރު ކޮށްފައި ވަނީ އީރާނުންނެވެ.