ރާއްޖޭގެ 50 މީޓަރު ފްރީސްޓައިލް ގައުމީ ރިކޯޑު ޢާއިޝަަތު ޢުލްޔާ ޝާއިޤް އެއް މަސްދުވަހުގެ ތެރޭގައި އައުކޮށްފިއެވެ.
ޢުލްޔާ މި ރިކޯޑު އައުކޮށްފައިވަނީ އޮސްޓްރޭލިއާގައި ކުރިއަށްދިޔަ ދި ޔުނިވަރސިޓީ އޮފް ވެސްޓަން އޮސްޓްރޭލިއާ (ޔޫޑަބްލިއުއޭ) ވެސްޓް ކޯސްޓް ކްލަބް ނައިޓް ނަންބަރ 7 މީޓުގައި ވާދަކޮށްގެންނެވެ. އޭނާ މި އިވެންޓު ނިންމާފައިވަނީ 00:28.75 އިންނެވެ.
މި އިވެންޓުގެ ގައުމީ ރިކޯޑް އެންމެ ފަހުންވެސް އައުކޮށްފައިވަނީ އުލްޔާއެވެ. އެއީ މިދިޔަ މަހު އޮސްޓްރޭލިއާގައި ކުރިއަށްދިޔަ ބްރޭކާސް ބިގް ސްޕްލޭޝް ޖޫން 2024 މީޓްގައެވެ. އެފަހަރު އިވެންޓު ފުރިހަމަކޮށްފައިވަނީ 00:28.81 އިންނެވެ.
ފްރާންސްގައި ބާއްވާ އޮލިމްޕިކްސްގެ ފެތުމުގެ އިވެންޓުގައި ރާއްޖެ ތަމްސީލުކުރާނެ އެތުލީޓުންގެ ތެރޭގައިވެސް އުލްޔާ ހިމެނެއެވެ. އޮލިމްޕިކް ގޭމްސްއަށް ދާނެ ދިވެހި ދެ ފެތުންތެރިން ކަނޑައެޅީ ވޯލްޑް އެކުއަޓިކްސް އިން ކަނޑައަޅާފައިވާ ފެތުމުގެ ވަކި މުބާރާތްތަކެއްގައި ވާދަކުރި ދިވެހި ފެތުންތެރިންގެ ތެރެއިން، އެންމެ މަތިން ވޯލްޑް އެކުއަޓިކްސް ސްވިމިންގ ޕޮއިންޓް ލިބިގެންނެވެ.
އުލްޔާއަކީ ރާއްޖޭގެ ފެތުންތެރިންގެ ތެރޭގައި ހިމެނޭ އުއްމީދީ ފެތުންތެރިއެކެވެ. ކުރު މުއްދަތެއްގެ ތެރޭގައި ބޮޑެތި ކުރިއެރުންތަކެއް ހޯދި އެތުލީޓުންގެ ތެރޭގައި އުލްޔާ ހިމެނެއެވެ.