ބައިނަލްއަގުވާމީ މުބާރާތްތަކުގެ ކަވަރޭޖާ އެއްފެންވަރަށް ރާއްޖޭގެ މުބާރާތްތައް ގެނެސްދޭނަން: ޒީނާ

ކުރިއަށް އޮތްތަނުގައި ބައިނަލްއަގުވާމީ ކުޅިވަރު އިވެންޓުތަކާއި އެއްފެންވަރަށް ރާއްޖޭގެ ކުޅިވަރު އިވެންޓުތައް ޕީއެސްއެމުން ގެނެސްދޭނެ ކަމުގެ ޔަގީންކަން ޕަބްލިކް ސަރވިސް މީޑިޔާ، ޕީއެސްއެމްގެ މެނޭޖިން ޑިރެކްޓަރ ޒީނާ ޒާހިރު ދެއްވައިފިއެވެ.

ޔޫރޯ ފުޓްބޯޅަ މުބާރާތާ ގުޅިގެން ގެނެސްދޭ "ޕީއެސްއެމް ފޯރި" ކަވަރޭޖްގެ ފައިނަލް ޝޯގައި ވާހަކަދައްކަވަމުން ޒީނާ ވިދާޅުވީ ކާމިޔާބު ކަވަރޭޖެއް ގެނެސްދެވުނީ ރާއްޖޭގެ ގިނަ ކުންފުނިތަކެއްގެ އެއްބާރުލުމާއެކު ކަމަށެވެ. އަދި ޚާއްސަކޮށް މުވައްޒަފުން ދެއްކި ނަމޫނާ ޒީނާ ވަނީ ފާހަގަކުރައްވާފައެވެ. ހަމައެއާއެކު ޔޫރޯގެ ފޯރި ގަދަވެގެންދިޔައީ ހުށަހެޅުންތެރިންނާއި ޝޯގެ އެނަލިސްޓުންނާއި މައުލޫމާތުން ފުރިގެންވާ ރިޕޯޓުތަކުންކަން ޒީނާ ފާހަގަކުރެއްވިއެވެ.

ވޭތުވެދިޔަ މަސް ދުވަހުގެ ތެރޭގައި ޔޫރޯގެ މައުލޫމާތު އެންމެ އަޕްޑޭޓުކޮށް ގެނެސްދިނީ ޕީއެސްއެމްގެ ޗެނެލްތަކުންކަމަށް ޒީނާ ވިދާޅުވިއެވެ. އަދި މުޅި ކަވަރޭޖާ މެދު ހިތްހަމަޖެހޭ ކަމަށާއި ފެނުނީ ފޯރިގަދަ ކަވަރޭޖެއްކަމަށް ވިދާޅުވިއެވެ.

"ވަރަށް ބައިވަރު ޝޯތަކެއް ގެނެވުނު، ވަރަށް ފޯރިގަދަކޮށް ޕްރީ ޝޯތައް ދިޔައީ، ފަން ޝޯތަކެއް ވެސް ފެނިގެންދިޔަ." ޒީނާ ވިދާޅުވިއެވެ.

ޕީއެސްއެމްގެ މެނޭޖިންގ ޑިރެކްޓަރ ޒީނާ ޒާހިރު ވިދާޅުވީ މުވައްޒަފުން ކުރި މަސައްކަތާއެކު މިފަހަރުގެ ކަވަރޭޖަކީ ސަތޭކައިގެ ކަވަރޭޖެއް ކަމަށެވެ. އަދި މިއީ އައު ހިތްވަރަކާއެކު ފެށި ފެށުމެއް ކަމަށާއި އުންމީދަކީ ކުރިޔަށް ހުރި މުބާރާތްތައްވެސް ވީ އެންމެ ފުރިހަމަކޮށް ބެލުންތެރިންނާ ހަމައަށް ގެނެސްދިނުން ކަމަށެވެ. އެގޮތުން ރާއްޖޭގައި ކުޅޭ ކޮންމެ މުބާރާތެއްގެ ފައިނަލް މެޗް ޕީއެސްއެމުން ލައިވްކޮށް ގެނެސްދޭނެ ކަމުގެ ޔަގީންކަން ޒީނާ ވަނީ ދެއްވާފައެވެ.

އަދި ކުޅިވަރު އޭގެ އެންމެ ޝައުގުވެރި ބައިތަކާއެކު ބެލުންތެރިންނާ ހަމަޔަށް ގެނެސްދިނުމަށް ޕީއެސްއެމް އަބަދުވެސް ދެމި އޮންނާނެ ކަމަށާއި މިފަދަ ކުޅިވަރު ކަވަރޭޖްތައް ބެލުންތެރިންނާ ހަމައަށް ގެނެސްދޭނެ ކަމުގެ ޔަގީންކަން ޒީނާ ވަނީ ދެއްވާފައެވެ.

ޒީނާ ވިދާޅުވީ އަމާޒަކީ ތަފާތު ފަންނުތަކުގެ ފަންނުވެރިންގެ ހުނަރުތައްވެސް އާއްމުންނާ ހަމަޔަށް ގެނެސްދިނުން ކަމަށާއި އެގޮތުން ފަންނުވެރިންނަށް ޕްރޮގްރާމްތަކެއް ޚާއްސަ ކުރައްވާނެކަމަށެވެ.

ހަމައެއާއެކު މުނިފޫހިފިލުވުމާއި ކުޅިވަރު ޗެނަލް ކުރިޔަށް އޮތްދުވަސްތަކުގައި ތަރައްގީ ކުރުމަށް ވިސްނަވާކަމަށްވެސް ވިދާޅުވިއެވެ. އަދި މިފަދަ ބޮޑެތި ކާމިޔާބީ ހާސިލުކުރެވޭނީ ހުރިހާ މުވައްޒަފުން އެކަތި ގަނޑަކަށްވެގެން ކުރެވޭ މަސައްކަތުން ކަމަށާއި ވޭތުވެދިޔަ 7 މަސް ތެރޭގައި ޕީއެސްއެމުން ދަސްވި ކަމަކީ އެއީ ކަމަށް މެނޭޖިންގ ޑިރެކްޓަރ ޒީނާ ޒާހިރު ވިދާޅުވިއެވެ.