ވިމްބަލްޑަން ޓެނިސް މުބާރާތުގެ އަންހެން ސިންގަލްސް ފައިނަލްގައި އިޓަލީގެ ޖޭޒްމީން ޕައޮލީނީ ބަލިކޮށް، ޗެކް ރިޕަބްލިކްގެ ބަރްބޮރާ ކްރެޗިކޯވާ ޗެމްޕިއަންކަން ހޯދައިފިއެވެ.
މިއީ ކްރެޗިކޯވާގެ ކެރިއަރުގައި ކާމިޔާބުކުރި ސިންގަލްސް އިވެންޓްގެ ދެވަނަ ގްރޭންޑް ސްލޭމް ޓެނިސް މުބާރާތެވެ. ކްރެޗިކޯވާ ވަނީ 2021 ވަނަ އަހަރުގެ ފްރެންޗް އޯޕަން ކާމިޔާބުކޮށްފައެވެ. އޭނާ ވަނީ ގްރޭންޑް ސްލޭމް ޑަބަލްސް ޗެމްޕިއަންކަން 10 ފަހަރު ހޯދައިފައެވެ.
ވިމްބަލްޑަންގެ ސެންޓަ ކޯޓުގައި އިއްޔެ ކުޅުނު ފައިނަލް މެޗު ގާތްގަނޑަކަށް 1 ގަޑިއިރާއި 56 މިނެޓަށް ދިގުދެމިގެންދިޔައިރު، ފުރަތަމަ ސެޓު ކްރެޗިކޯވާ ގެންދިޔައީ، 6-2 އިންނެވެ.
އެކަމަކު، ދެން ޖެހިގެންއައި ދެވަނަ ސެޓު ޕައޮލީނީ 6-2 އިން ގެންގޮސްފައިވަނިކޮށް، މެޗުގެ ފަހު ސެޓުގައި ވަރަށް ކައިރިން ވާދަކޮށް މުބާރާތުގެ 31 ވަނަ ސީޑް، ކްރެޗިކޯވާ ކާމިޔާބުކުރީ 6-4 އިންނެވެ.
ފައިނަލް މެޗަށްފަހު ކްރެޗިކޯވާ، 28، ބުނީ، މުބާރާތުގެ ފައިނަލް މެޗުގައި ހިނގައިދިޔަ ކަންތައްތަކަކީ ހަޤީޤަތްކަމެއް ޤަބޫލުކުރަން ވެސް އުނދަގޫ ކަމަށެވެ.
"ދެންމެ ހިނގައިދިޔަ ކަންތައްތަކަކީ ޙަޤީޤަތެއް ނޫން،" ކްރެޗިކޯވާ ބުންޏެވެ.
ކްރެޗިކޯވާ ވަނީ، އެއީ އޭނާގެ ކެރިއަރުގަ އާއި ހަޔާތުގައިވެސް މިހާތަނަށް އައި އެންމެ އުފާވެރި ދުވަސް ކަމަށް ބުނެފައެވެ.
އެއީ ވަރަށް އުނދަގޫ މެޗެއް ކަމަށާއި، މެޗު ކުޅެމުންދިޔައިރު އަމިއްލަ ނަފުސަށް ބުނަމުންދިޔައީ ހިތްވަރުކުރުމަށް ކަމަށް ވެސް ކްރެޗިކޯވާ ބުންޏެވެ. އާހިރުގައި ނަސީބު ދިމާވީ އޭނާއާ އެއްކޮޅަށް ކަމަށް ވެސް ކްރެޗިކޯވާ ފާހަގަކުރިއެވެ. އަދި އެންމެ ފަހު ޕޮއިންޓް ހޯދުމާއި ހަމައަށް އޭނާ މޮޅުވެވޭނެ ކަމަށް ހީނުކުރާ ކަމަށް ވެސް ކްރެޗިކޯވާ ވަނީ ބުނެފައެވެ.
މުބާރާތުގެ ފިރިހެން ސިންގަލްސް ފައިނަލް ކުޅުމަށް ހަމަޖެހިފައިވަނީ މިއަދު ރާއްޖޭގަޑިން އިރުއޮއްސި 6 ޖަހާއިރު އެވެ. މި މެޗުގައި ބައްދަލުކުރާނީ ސާބިއާގެ ނޮވަކް ޖޮކޮވިޗާއި ސްޕެއިނުގެ ކާލޯސް އަލްކަރާޒް އެވެ.