މިހާރު ޖަރުމަނުގައި ކުރިއަށްދާ ޔޫރަޕްގެ ގައުމުތަކުގެ ފުޓްބޯޅައިގެ ޢީދު، "ޔޫރޯ 2024" ގެ މެޗުތައް ބެލުމަށް އެ ގައުމުގެ އެކި ކަންކޮޅުތަކުގައި ހަމަޖައްސާފައިވާ ފޭން ޒޯންތަކުން ގާތްގަނޑަކަށް 35 ހާހެއްހާ ސަޕޯޓަރުންނަށް ސީޕީއާރްގެ ތަމްރީންތައް ދީފައިވާ ކަމަށް ޔުއެފާ އިން ބުނެފިއެވެ.
ޔުއެފާ އިން ނެރުނު ބަޔާނެއްގައިވަނީ، މި ތަމްރީންތައް ދީފައިވަނީ ޔޫރަޕިއަން ރިސަސިޓޭޝަން ކައުންސިލް (އީއާރްސީ) އާ ގުޅިގެން އެންމެންގެ ހޭލުންތެރިކަން އިތުރުކުރުމަށާއި، އެމާޖެންސީ ހާލަތްތަކުގައި ބައިސްޓޭންޑާ ސީޕީއާރް ދިނުމުގެ މުހިއްމުކަން އަންގައިދިނުމުގެ ގޮތުން ކަމަށެވެ.
އެންމެ ފަހުގެ ޔޫރޯ ފުޓްބޯޅަ މުބާރާތުގައި ފިންލެންޑާ ދެކޮޅަށް ޑެންމާކް ކުޅުނު މެޗުގައި އެ ޓީމުގެ މިޑްފީލްޑަރު، ކްރިސްޓިއަން އެރިކްސަން ހާޓްއެޓޭކެއް ޖެހިގެން ދަނޑު މައްޗަށް ވެއްޓުމުން ޑެންމާކްގެ ކެޕްޓަން، ސިމޮން ކެއާ ވަނީ ދަނޑުމަތީގައި ސީޕީއާރްދީ، މެޑިކަލް ޓީމާ ހަމައަށް ގެންދިއުމުގެ ކުރީން އޭނާގެ ފުރާނަ ސަލާމަތްކުރުމަށް އެހީތެރިވެދީފައެވެ. މިކަމަށްޓަކައި ކެއާ އަށް ވަނީ ގިނަ ބައެއްގެ ލޯތްބާއި ތައުރީފު ލިބިފައެވެ.
ޔުއެފާ އިން ބުނީ، މުބާރާތުގައި ވާދަކުރާ ހުރިހާ ގައުމަކަށް ނިސްބަތްވާ ކުޅުންތެރިންނާއި، ސްޓާފުންނާއި މެޗު އޮފިޝަލުންގެ އިތުރުން ވޮލަންޓިއަރުންނަށް ވެސް ފުރާނަ ސަލާމަތްކުރުމާ ގުޅޭގޮތުން ތަމްރީންތައް ދީފައިވާ ކަމަށެވެ.