އެމެރިކާގެ ފިރިހެން ގައުމީ ފުޓްބޯޅަ ޓީމުގެ ކޯޗުގެ މަގާމާ ހަވާލުވުމަށް އެ ގައުމުގެ ފުޓްބޯޅަ ފެޑެރޭޝަން (ޔޫއެސްއެސްއެފް) އިން ލިވަޕޫލްގެ ކުރީގެ ކޯޗު، ޔާގެން ކްލޮޕަށް ހުށަހެޅުމުން އެކަމަށް އޭނާ ފުރަގަސްދީފައިވާ ކަމަށް މީޑިއާ ހަބަރުތައް ބުނެފިއެވެ.
އެމެރިކާ އިން ކޯޗެއް ގެނައުމުގެ މަސައްކަތް ފެށީ ކޮޕާ އެމެރިކާގެ ގްރޫޕް ސްޓޭޖުގައި ކުރިމަތިވީ ނާކާމިޔާބީއާ ގުޅިގެން އެމެރިކާގެ ފިރިހެން ގައުމީ ފުޓްބޯޅަ ޓީމުގެ ކޯޗުގެ މަގާމުން ގްރެގް ބާހޯލްޓާ ވަކިކުރުމާ ގުޅިގެންނެވެ.
މިއާއެކު، އެ މަގާމަށް ކޯޗެއް ގެނައުމުގެ މަސައްކަތް ފަށައި، އެމެރިކާގެ ފުޓްބޯޅަ ފެޑެރޭޝަނުގެ މަންދޫބުން އެންމެ ބޮޑަށް ޝައުގުވެރިވީ ކްލޮޕް ވަނީ، ފުޓްބޯޅަ އިން މިވަގުތަށް ދުރަށް ޖެހިލައި ބްރޭކެއް ނަގަން ބޭނުންވާތީވެ އެކަން ކުރަން ބޭނުންވާ ކަމަށް ބުނެފައެވެ.
އެންމެ ފަހުގެ ޕްރިމިއާ ލީގުގެ ސީޒަނަށްފަހު ލިވަޕޫލްގެ ކޯޗުގެ މަގާމު ދޫކޮށްލުމަށްފަހު، މިވީ ދެ މަހެއްހާ ދުވަހު ކްލޮޕް ހުރީ އެއްވެސް ޓީމަކާ ހަވާލުނުވެއެވެ.
ކްލޮޕް ވަނީ ލިވަޕޫލްގައި ހޭދަކުރީ ނުވަ އަހަރުގެ ތެރޭގައި އަށް ޓްރޮފީ އުފުލާލައިފައެވެ. އޭގެތެރޭގައި އެ ޓީމުން 30 އަހަރަށްފަހު ކާމިޔާބުކުރި ޕްރިމިއާ ލީގުގެ ޓްރޮފީ ހިމެނެއެވެ.
އެމެރިކާގެ އަމާޒަކަށްވެފައިވަނީ ކުރިއަށް އޮތް 2026 ވަނަ އަހަރު އެ ގައުމުގައި ބާއްވާ ފީފާ ވޯލްޑް ކަޕަށް އެ ޓީމު ފުރިހަމަ އަށް ތައްޔާރުކުރުމަށް ފެންވަރު ރަނގަޅު، ހައިޕްރޮފައިލް ކޯޗެއް ގެނައުމެވެ.
މީޑިއާ ހަބަރުތައް ބުނާގޮތުން، އެމެރިކާގެ ފުޓްބޯޅަ ފެޑެރޭޝަނުން އަދިވެސް ކޯޗެއްގެ ގޮތުގައި ގެނައުމުގެ މަސައްކަތްކުރާނީ ކްލޮޕް ކަމަށާއި، އެހެންނަމަވެސް ކުރިއަށް ދުވަސްތަކުގައި އޭނާ އެނބުރި ކޯޗެއްގެ ގޮތުގައި ފެނުމަކީ ދުރުގައިވާ ކަމެއް ކަމަށް ފުޓްބޯޅައިގެ ތަޖުރިބާކާރުން ބުނެއެވެ.