ދާދިފަހުން ނިމުނު އައިސީސީ ޓީ20 ކްރިކެޓު ވޯލްޑް ކަޕުގެ ގްރޫޕް ސްޓޭޖުގައި ވާދަކުރި ނޭޕާލް ގައުމީ ޓީމުގެ ކުޅުންތެރިއެއް ކަމަށްވާ ސޮމްޕާލް ކާމީ ރާއްޖޭގެ މިލާން ކްރިކެޓް އެކަޑަމީއާއި ގުޅިއްޖެއެވެ.
އޭނާ މިލާން ކްރިކެޓު އެކަޑަމީއާއި ގުޅުނީ ކްރިކެޓް ބޯޑް އޮފް މޯލްޑިވްސް އިން އިންތިޒާމުކޮށްގެން މިހާރު ކުރިއަށްގެންދާ ޓީ ޓުވެންޓީ ޕްރިމިއަރ ލީގަށެވެ. މުބާރާތުގައި މާދަމާ 14:00 ގައި ސީބީއެލް އާއި މިލާން ކްރިކެޓް އެކަޑަމީ ބައްދަލުކުރާ މެޗުގައި ސޮމްޕާލް ކުޅޭނެއެވެ.
އުމުރުން 28 އަހަރުގެ ސޮމްޕާލް ވަނީ 2014 އާއި 2024 ވަނަ އަހަރުގެ ޓީ ޓުވެންޓީ ވޯލްޑް ކަޕުގައި ނޭޕާލް ތަމްސީލުކޮށްފައެވެ. އަދި ނޭޕާލުގައި އޭނާއަކީ އިންޑިވިޖުއަލް ގޮތުން އެ ގައުމުގައި އުއްމީދީ ކުޅުންތެރިއެކެވެ.
މި ޓީމުގައި ރާއްޖޭގެ ގައުމީ ކްރިކެޓު ޓީމުގެ މުހިއްމު ކުޅުންތެރިންވެސް ކުޅެއެވެ. އޭގެތެރޭގައި ރާއްޖޭގެ އެންމެ މޮޅު ކްރިކެޓު ކުޅުންތެރިޔާގެ މަގާމު ހޯދި އާދަމް ނާސިފް އުމަރާއި ޔޫސުފް އަޒްޔާން ފަރުހަތުގެ އިތުރުން އަހްމަދު ހަސަން ފަދަ ކުޅުންތެރިން ހިމެނެއެވެ.