ދައުލަތަށް ލިބެންޖެހޭ ފައިސާ ހޯދަން ޚާއްޞަ ޤާނޫނެއް ހެދުމުގެ މަސައްކަތް ފަށައިފިން: ރައީސް

ދައުލަތަށް ލިބެންޖެހޭ ފައިސާ އަނބުރާ ހޯދުމަށް ޚާއްސަ، އެސެޓް ރިކަވަރީ ޤާނޫނެއް ހެދުމުގެ މަސައްކަތް ފަށްޓަވާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިރޭ ޕީއެންސީ ހައުސްގައި ބޭއްވި ހަރުގެ ޖަލްސާގައި ވާހަކަފުޅުދައްކަވަމުންނެވެ. ރައީސުލްޖުމްހޫރިއްޔާ ވިދާލުވީ، ކޮރަޕްޝަން ފަދަ ކަންކަމުން ދައުލަތުން ވަގަށް ނަގާފައިވާ ފައިސާ އަނބުރާ ހޯއްދަވާނެކަމަށެވެ.

ރައީސުލްޖުމްހޫރިއްޔާ ވިދާޅުވީ ކޮރަޕްޝަންގެ އެކި އަމަލުތައް ހިންގައިގެން ރައްޔިތުންގެ ފައިސާއިން ކޮށްފައިވާ ވައްކަންތައް ބަލައި، އެކަން ކުރި ފަރާތްތައްކަށް ޙައްގު އަދަބުދީ އެ ފައިސާ އަނބުރާ ހޯދަން ޖެހޭ ކަމަށެވެ. އެގޮތުން ކުރީ ސަރުކާރުތަކުން ރިޔާސީ ކޮމިޝަންތައް ހަދައިގެން ބޮޑެތި ޚަރަދުތައް ކުރި ނަމަވެސް ދައުލަތަށް ލިބެންޖެހޭ ފައިސާ އަނބުރާ ހޯދިފައި ނުވާކަމަށް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ މިހާރު ހުރި ޤާނޫނުތަކުން ދައުލަތުގެ ހަޒާނާއިން ގެއްލިފައިވާ ފައިސާ ހޯދުމަށް ދަތިތައް އެބަހުރި ކަމަށާއި އެހެންކަމުން، އެސެޓް ރިކަރަވީއަށް ޚާއްސަ ޤާނޫނެއް ފާސްކުރުމަށް މަޖިލީހަށް ހުށަހަޅުއްވާނެ ކަމަށެވެ. އެކަން ކުރުމަށް ބިލު މިހާރު އެކުލަވައިލުމުގެ މަސައްކަތް ކުރައްވަމުންދާކަމަށްވެސް އެމަނިކުފާނު ވިދާޅުވިއެވެ.

ކޮރަޕްޝަނުގެ އަމަލުތަކުގައި ރާއްޖޭގެ އިތުރުން ބޭރު ޤައުމުތަކުގައި ބަހައްޓާފައިވާ ދިވެހި ދައުލަތުގެ ފައިސާވެސް އަނބުރާ ހޯއްދަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

"އިންޓަނޭޝަނަލް މިންގަނޑުތަކަށް ފެތޭ، އެހެން ޤައުމުތަކުގެ މިކަންކުރާ އިންޓަނޭޝަނަލް ބޮޑީތަކުގެ ރިކޮމެންޑޭޝަނަށް ބަލައި، އެއާ އެއްގޮތަށް މި ބިލް ތައްޔާރުކުރެވޭނީ. އޭރަށް އިރާދަކުރެއްވިއްޔާ ހަމައެކަނި ރާއްޖޭގައި ވައްކަންކޮށްގެން ރައްކާކޮށްފައިވާ ފައިސާއެއް ނޫން. ރާއްޖޭން ބޭރަށް އެއްޗެއް ގެންގޮސްފައި ހުރިއްޔާ އެ އެއްޗެއްވެސް ހޯދުމުގައި މިހާރަށްވުރެ ފަސޭހަވެގެންދާނެ،" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ އެމްއެމްޕީއާރުސީގެ މައްސަލައަކީ ކޮރަޕްޝަނުގެ އެންމެ ބޮޑު އެއް މައްސަލަ ކަމަށާއި އެ ވައްކަން ކުރި ފަރާތްތައް ދެނެގަނެ އެއީ ކޮންމެ މީހެއް ކަމުގައިވިޔަސް ޙައްގު އަދަބުދީ، އެ ފައިސާ އަނބުރާ ހޯދުމަށް ކުރަން ޖެހުނު ކޮންމެ ކަމެއް ކުރައްވާނެ ކަމަށެވެ.

"އެއީ ރައްޔިތުންގެ މުދާ، އެއީ ރައްޔިތުންގެ ފައިސާ. އެ ފައިސާ ހޯދައި މިދެންނެވި އެސެޓް ރިކަރަވަރީ ޤާނޫނު ތައާރަފުކޮށް އަދި ދެންވެސް އެކިއެކި ވައްކަންތަކުގައި ރައްޔިތުންގެ އަތުން ގެންގޮސްފައިވާ އެކިކަހަލަ މުދާތައް އަނބުރާ ހޯދުމަކީ އަޅުގަނޑުމެން ކުރާނެ ކަމެއް،" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ކޮރަޕްޝަނަކީ އަބަދު ސަރުކާރު ތެރޭގައި ހިނގަހިނގާ އޮންނަ ކަމެއްގެ ގޮތުގައި އޮތްއޮތުމަށް ބަދަލު ގެންނަވާނެކަމުގެ ޔަޤީންކަން ދެއްވާފައެވެ. އަދި ރައްޔިތުންނަށްޓަކައި ތެދުވެރިކަމާއި އަމާނާތަތްތެރިކަމާއެކު ވެރިކަން ކުރައްވާނެ ކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.