މިހާރު ކުރިއަށްދާ ކޮޕާ އެމެރިކާ ފުޓްބޯޅަ މުބާރާތުގެ ކުއާޓާ ފައިނަލްގައި ޕެނަލްޓީ ޖަހައިގެން ވަރުގަދަ ބްރެޒިލް ބަލިކޮށް، އުރުގުއޭ އިން ސެމީ ފައިނަލަށް ދަތުރުކޮށްފިއެވެ.
މިއީ މިދިޔަ 23 އަހަރުގެ ތެރޭގައި ބްރެޒިލާ ދެކޮޅަށް ކުޅުނު 13 ވަރަކަށް މެޗުގެ ތެރެއިން އުރުގުއޭ މޮޅުވި ފުރަތަމަ ފަހަރެވެ. އަދި މިއީ 1992 ވަނަ އަހަރުގެ ފަހުން ޖެހިޖެހިގެން ދެ މެޗުގައި ބްރެޒިލް ބަލިކުރި ފުރަތަމަ ފަހަރެވެ. މީގެއިތުރުން، މިއީ 2011 ވަނަ އަހަރުގެ މުބާރާތް ކާމިޔާބުކުރި ފަހުން އުރުގުއޭ އިން ސެމީ އަށް ދަތުރުކުރި ފުރަތަމަ ފަހަރު ވެސް މެއެވެ.
މި މެޗުގެ ފުރިހަމަވަގުތު ހަމަވިއިރު ދެޓީމަށް ލަނޑެއްނުޖެހި އެއްވަރުވުމުން ނަތީޖާ ނެރުމަށް ކުރިއަށްގެންދިޔަ ޕެނަލްޓީ ޝޫޓްއައުޓްގައި އުރުގުއޭ އިން ކުރިހޯދީ 4-2 އިންނެވެ.
ބްރެޒިލުން މި މެޗަށް ނިކުތްއިރު ދިމާވެފައިވާ އެންމެ ބޮޑު މައްސަލައަކީ ސަސްޕެންޝަނުގެ ސަބަބުން އެ ޓީމުގެ އެންމެ މުހިއްމު ކުޅުންތެރިޔާ، ވިނީޝަސް ޖޫނިއާ އަށް ނުކުޅެވުމެވެ. ވިނީޝަސްގެ ބަދަލުގައި ފުރަތަމަ އެގާރައިން ފުރުޞަތު ދީފައިވަނީ ރެއާލް މެޑްރިޑްގެ ޒުވާން ފޯވާޑް، އެންޑްރިކް އަށެވެ.
އެމެރިކާގެ ލަސް ވެގަސްގައި ހުންނަ އެލީޖިއަންޓް ސްޓޭޑިއަމްގައި މިއަދު ހެނދުނު ކުޅުނު މި މެޗުގައި ދެ ޓީމުގެ ފަރާތުން ގިނަ އަދަދަކަށް ފައުލްތައް ފެނިގެންގޮސްފައިވާއިރު ގޯލަށް އަމާޒުކޮށް ފޮނުވާލެވުނީ އެންމެ ހަތަރު ހަމަލާއެވެ.
ހީކުރިވަރާ ގާތަށް ވެސް ދެ ޓީމުގެ ފަރާތުން ރީތި، މޮޅު ފުޓްބޯޅައެއް ފެނިގެންގޮސްފައިނުވާއިރު މެޗުގެ 74 ވަނަ މިނެޓުގައި އުރުގުއޭގެ ނަހިތާން ނަންޑޭޒަށް ވަނީ ސީދާ ރަތެއް ދައްކާ ދަނޑުން ފޮނުވާލައިފައެވެ. އެއީ، ބްރެޒިލްގެ ފޯވާޑް، ރޮޑްރީގޯ އަށް ކުރި ނުރައްކާތެރި ޓެކުލަކާ ގުޅިގެންނެވެ. މިއާއެކު، އިތުރުވަގުތު ހިމެނޭ ގޮތަށް މެޗުގެ ބާކީ 21 ވަރަކަށް މިނެޓުގައި އެއް ކުޅުންތެރިއަކު މަދުކޮށް ކުޅެމުންދިޔަ އުރުގުއޭގެ މައްޗަށް ބްރެޒިލަށް ކުރިހޯދޭގޮތެއްނުވިއެވެ.
މުޅި މެޗުގައި ލަނޑެއްޖަހަން ދެ ޓީމަށް ލިބުނު އެންމެ ރަނގަޅު ފުރުޞަތު ލިބުނީ ފުރަތަމަ ހާފުގެ 35 ވަނަ މިނެޓަށްފަހު އެވެ. އެގޮތުން، އުރުގުއޭގެ ފޯވާޑް، ޑާވިން ނޫނޭޒް ބޮލުން ފޮނުވާލި ބޯޅަ ރަނގަޅަށް ގޯލަށް އަމާޒުވާގޮތްނުވިއިރު އޭގެ ތިރީސް ފަސް ވަރަކަށް ސިކުންތުގެ ތެރޭގައި ރަފީނިއާ ޕެނަލްޓީއޭރިޔާ ތެރެއިން ފޮނުވާލި ބޯޅަ އުރުގުއޭގެ ކީޕަރު، ސާޖިއޯ ރޮޗެޓް ވަނީ މަތަކޮށްފައެވެ.
ޕެނަލްޓީ ޝޫޓްއައުޓްގައި އުރުގުއޭ މޮޅުވި ފަސްވަނަ ޕެނަލްޓީ ކާމިޔާބުކޮށްދިނީ ޕީއެސްޖީގެ މިޑްފީލްޑަރު، މެނުއަލް އުގާޓޭ އެވެ. އެ ޓީމުން ފުރަތަމަ ޖެހި ތިން ޕެނަލްޓީ ކާމިޔާބުކުރިއިރު ބްރެޒިލަށް ކާމިޔާބުކުރެވުނީ އެންމެ ޕެނަލްޓީ އެކެވެ. އުރުގުއޭ އަށް ނާކާމިޔާބުވީ ހޯސޭ ގިމެނޭޒްގެ ޕެނަލްޓީ އެކަންޏެވެ. އެ ޓީމުގެ ޕެނަލްޓީތައް ކާމިޔާބުކޮށްދިނި ފެޑެރީކޯ ވަލްވާޑޭ، ރޮޑްރިގޯ ބެންޓަންކޫރް، ޖިއޯޖިއަން ޑެ އަރަސްކައޭޓާގެ އިތުރުން އުގާޓޭ އެވެ.
ބްރެޒިލަށް ކާމިޔާބުކުރެވުނީ އެންމެ ދެ ޕެނަލްޓީ އެވެ. އެއީ، އަންދްރެއަސް ޕެރޭރާ އާއި ގެބްރިއެލް މާޓިނެލީގެ ޕެނަލްޓީ އެވެ. އެ ޓީމުގެ ޑަގްލަސް ލުއީޒް އާއި އެޑާ މިލިޓާއޯގެ ޕެނަލްޓީ ކާމިޔާބެއް ނުކުރެވުނެވެ.
މުބާރާތުގެ ސެމީގައި އުރުގުއޭ ނިކުންނާނީ ކޮލަމްބިއާ އާ ދެކޮޅަށެވެ. އަނެއް ސެމީގައި އާޖެންޓީނާ ބައްދަލުކުރާނީ ކެނެޑާއާ އެވެ.