މިހާރު ކުރިއަށްދާ ކޮޕާ އެމެރިކާ ފުޓްބޯޅަ މުބާރާތުގެ ކުއާޓާ ފައިނަލްގައި ޕެނަލްޓީ ޖަހައިގެން އެކުއޭޑޯ ބަލިކޮށް އެންމެ ފަހުގެ ޗެމްޕިއަން، އާޖެންޓީނާ އިން ސެމީ ފައިނަލަށް ދަތުރުކޮށްފިއެވެ.
މިއީ އާޖެންޓީނާ އިން މުބާރާތުގެ ސެމީ ފައިނަލަށް ޖެހިޖެހިގެން ދަތުރުކުރި ފަސްވަނަ ފަހަރެވެ. ސެމީގައި އެ ޓީމު ކުޅެން ޖެހޭނީ ވެނެޒުއެލާއާ ކެނެޑާ ކުރެން މޮޅުވާ ޓީމަކާ ދެކޮޅަށެވެ.
މި މެޗުގެ ފުރިހަމަވަގުތު ހަމަވިއިރު ދެ ޓީމު 1-1 އިން އެއްވަރުވުމުން، ޕެނަލްޓީ ޝޫޓްއައުޓްގައި އާޖެންޓީނާ ކުރިހޯދީ 4-2 އިންނެވެ.
އެމެރިކާގެ ޓެކްސަސްގައި ހުންނަ އެންއާރްޖީ ސްޓޭޑިއަމްގައި ގާތްގަނޑަކަށް 69 ހާހެއްހާ ސަޕޯޓަރުންގެ ކުރިމަތީގައި މިއަދު ހެނދުނު ކުޅުނު މި މެޗުގައި ކުރީން ލީޑްނެގީ ވެސް އާޖެންޓީނާ އިންނެވެ. މެޗުގެ 35 ވަނަ މިނެޓުގައި އެ ޓީމަށް މި ލަނޑުޖަހައިދިނީ ޑިފެންޑަރު، ލިސަންދްރޯ މާޓިނޭޒް އެވެ. މިއީ އެ ޓީމުގެ ކެޕްޓަން، ލިއޮނަލް މެސީ ނެގި ކޯނަރެއްގެ އެހީގައި އެލެކްސިސް މެކްއެލިސްޓާ ދިން ޕާހަކުން ލީބުނު ބޯޅައެއް ބޮލުން ގޯލްގެތެރެއަށް ފޮނުވާލައިގެން މާޓިނޭޒް ކާމިޔާބުކުރި ގޯލެކެވެ.
މެޗުގެ 62 ވަނަ މިނެޓުގައި އެކުއޭޑޯ އަށް އެއްވަރުކޮށްދޭން ރަނުގެ ފުރުޞަތެއްލިބި އެ ޓީމުގެ ކެޕްޓަން، އެނާ ވެލެންސިއާ އަތުން ވަނީ ޕެނަލްޓީއެއް ބޭކާރުވެފައެވެ. ޕެނަލްޓީ އޭރިޔާ ތެރެއިން އާޖެންޓީނާގެ މިޑްފީލްޑަރު، ރޮޑްރީގޯ ޑެ ޕޯލްގެ އަތުގައި ޖެހުމުން ލިބުނު މި ޕެނަލްޓީ ފޮނުވާލުމުން އަމާޒުވީ ގޯލްގެ އަރިމަތީދަނޑިއަށެވެ.
އާޖެންޓީނާ 1-0 އިން ކުރީގަ އޮވެ، މެޗު ނިމެންދަނިކޮށް، އެކުއޭޑޯ އިން އެއްވަރުކުރީ އިތުރު ވަގުތުގެ ފުރަތަމަ މިނެޓުގެ ތެރޭގައި ކެވިން ރޮޑްރިގޭޒް ކާމިޔާބުކުރި ގޯލުންނެވެ. ޖޯން ޔެބޮއާ ދިން ބޯޅައަކުން ރޮޑްރިގޭޒް މި ލަނޑުޖެހީ ބޮލުންނެވެ. މި ދެ ކުޅުންތެރިންވެސް ކުޅެން ނިކުތީ ފަހު ހާފުގައެވެ.
މި ފަހަރުގެ މުބާރާތުގައި އިތުރުވަގުތުގެ ދެ ހާފު ނުކުޅެ، ސީދާ ޕެނަލްޓީއަށް ދާ ގޮތަށް ކަނޑައަޅާފައިވުމުން ދެން ދިޔައީ ޕެނަލްޓީ ޝޫޓްއައުޓް އަށެވެ. އާޖެންޓީނާ އިން އެންމެ ފުރަތަމަ ޕެނަލްޓީ ޖަހަންދިޔަ އެ ޓީމުގެ ކެޕްޓަން، މެސީ ޕަނެންކާ ޕެނަލްޓީއެއް ފޮނުވާލަން މަސައްކަތްކުރުމުން އެ ބޯޅަ އަމާޒުވީ ގޯލްގެ ހުރަސްދަނޑިއަށެވެ. އެކުއޭޑޯ އިން ފޮނުވާލި ފުރަތަމަ ދެ ޕެނަލްޓީ ވެސް އާޖެންޓީނާގެ ކީޕަރު، އެމިލިއާނޯ މާޓިނޭޒް މަތަކުރިއެވެ.
އާޖެންޓީނާގެ ދެން ފޮނުވާލި ހަތަރު ޕެނަލްޓީވެސް ކާމިޔާބުކުރި އެވެ. އެ ޓީމަށް ޕެނަލްޓީތައް ކާމިޔާބުކޮށްދިނީ ހޫލިއަން އަލްވަރޭޒް، މެކްއެލިސްޓާ އާއި ގޮންޒާލޯ މޮންޓިއެލް އަދި ނިކޮލަސް އޮޓަމެންޑީ އެވެ. އެކުއޭޑޯ އިން ކާމިޔާބުކުރީ ޖޯން ޔެބޮއާ އާއި ޖޯޑީ ކައިސޭޑޯގެ ޕެނަލްޓީ އެކަންޏެވެ. އެ ޓީމުގެ އެންހެލް މީނާ އާއި އެލަން މިންޑާ އަށް ޕެނަލްޓީ ކާމިޔާބުނުކުރެވުނެވެ.
މި މުބާރާތުގައި ދެން ކުޅޭ މެޗުގައި ވެނެޒުއެލާ ނިކުންނާނީ ކެނެޑާއާ ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މާދަމާ ހެނދުނު ރާއްޖޭގަޑިން 6 ޖަހާއިރު އެވެ.