ބޮޑު މަރާމާތަކަށް ބޭނުންވެފައިވާ މާލޭ ޓޭބަލް ޓެނިސް ހޯލުގެ އާބާތުރަ ފިލުވުމަށްފަހު އަނެއްކާވެސް ހުޅުވައިފިއެވެ.
މިކަމަށްޓަކައި މާލޭ ޓޭބަލް ޓެނިސް ހޯލުގައި ވަނީ ހާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފްވެރިކޮށްދެއްވީ ކޮމިޝަނަރ އޮފް ސްޕޯޓްސް މުޙައްމަދު ތަލާލެވެ. މީގެ އިތުރުން ކުޅިވަރާ ބެހޭ ވުޒާރާގެ ބައެއް އިސްވެރިންނާއި ޓީޓީ ކުޅުންތެރިން ބައިވެރިވިއެވެ.
ގިނަ މަރާމާތުތަކެއް ބޭނުންވެފައި އޮތް ޓޭބަލް ޓެނިސް ހޯލު އަލުން ހުޅުވިއިރު، އެތަނުގެ ފްލޯރިން ރަނގަޅުކޮށް، ފުރާޅާއި އޭސީތައްވެސް ވަނީ މަރާމާތުކޮށްފައިވާ ކަމަށް ކުޅިވަރާއި ހަށިހެޔޮކަމާ ބެހޭ ވުޒާރާއިން މައުލޫމާތުދެއެވެ.
މިވަގުތު ރާއްޖޭގައި ގާއިމްކޮށްފައިވާ ކުޅިވަރު ކުޅޭ ތަންތަނުގެ އާބާތުރަ ފިލުވައި އެތަންތަން ބޭނުންކުރެވޭ ފެންވަރަށް ގެނައުމަކީ ސަރުކާރުގެ ކުޅިވަރު ވައުދުތަކުގެ ތެރޭގައި ހިމެނޭ މުހިންމު ވައުދެކެވެ.