އައިސީސީ ޓީ20 ކްރިކެޓް ވޯލްޑް ކަޕްގެ ފައިނަލްގައި ދެކުނު އެފްރިކާ ހަތް ލަނޑުން ބަލިކޮށް، އިންޑިއާ އިން އެ މުބާރާތުގެ ޗެމްޕިއަންކަން ހޯދައިފިއެވެ.
މިއީ މިދިޔަ 13 އަހަރުގެ ތެރޭގައި އިންޑިއާ އިން ވޯލްޑް ކަޕް މުބާރާތެއް ކާމިޔާބުކުރި ފުރަތަމަ ފަހަރެވެ. އެޓީމު އެންމެ ފަހުން ކުޅުނު ވޯލްޑް ޓެސްޓް ސީރީޒްގެ ފައިނަލާއި، އެއްދުވަހުގެ ބައިނަލްއަގުވާމީ ކްރިކެޓްގެ ފައިނަލުން ވަނީ ބަލިވެފައެވެ.
އަނެއްކޮޅުން މިއީ އިންޑިއާ އިން ޓީ20 ވޯލްޑް ކަޕްގެ ޗެމްޕިއަންކަން ހޯދީ ދެވަނަ ފަހަރެވެ. އެ ޓީމުން ވަނީ 2007 ވަނަ އަހަރުގެ މުބާރާތް ވެސް ކާމިޔާބުކޮށްފައެވެ.
ބާބަޑޯސްގެ ބްރިޖްޓައުންގައި ހުންނަ ކެންސިންޓަން އޯވަލްގައި ކުޅުނު މި މެޗުގެ ޓޮސް ދިމާވުމުން އިންޑިއާ އިން ގަސްދުކުރީ ކުޅެން އަރާށެވެ. އިންޑިއާ އިން ކުޅެން އަރައި، 20 އޯވަރުގެ ތެރޭގައި ހަތް ވިކެޓަށް 176 ލަނޑުހެދިއެވެ.
އިންޑިއާގެ އިނިންގްސްގައި އެންމެ ރަނގަޅަށް ކުޅުނީ 59 ބޯޅައިން 76 ލަނޑުހެދި ކުރީގެ ކެޕްޓަން، ވިރާތު ކޯލީ އެވެ. މި މެޗުގެ މޮޅު ކުޅުންތެރިއަކަށް ހޮވުނީ ވެސް ވިރާތެވެ. ދެން އެންމެ ރަނގަޅަށް ކުޅުނީ އޯލްރައުންޑަރު، އަކްޝަރު ޕަޓޭލް އާއި ޝިވަމް ޑުބޭ އެވެ. އަކްޝަރު ވަނީ 31 ބޯޅައިން 47 ލަނޑުހަދައިފައެވެ. އޭނާގެ މި އިނިންގްސްގައި ހަތަރު ފަހަރު ހަޔަކަށް، އެއް ފަހަރު ހަތަރަކަށް ޖަހައިފައިވެއެވެ. ޝިވަމް ވަނީ 16 ބޯޅައިން 27 ލަނޑުހަދައިފައެވެ. އެ ޓީމުގެ ކެޕްޓަން، ރޯހިތު ޝަރްމާ ނުބައިވީ އެންމެ ނުވަ ލަނޑަށެވެ.
މި އިނިންގްސްގައި ދެކުނު އެފްރިކާގެ އުކުންތެރިން ކަމަށްވާ، ކޭޝަވް މަހަރާޖް އާއި އަންރިކް ނޯޖޭ ކުރެން ކޮންމެ ކުޅުންތެރިއަކު ދެ ވިކެޓްނެގިއިރު، މާކޯ ޖެންސަން އާއި ކަގީސޯ ރަބާޑާ ވަނީ ވިކެޓެއް ނަގައިފައެވެ.
ދެކުނު އެފްރިކާ އިން ކުޅެން އަރައި، 20 އޯވަރުގެ ތެރޭގައި އަށް ކުޅުންތެރިން ނުބައިވެގެން ހެދުނީ 169 ލަނޑެވެ. އެ ޓީމުން އެންމެ ރަނގަޅަށް ކުޅުނު ހެއިންރިކް ކްލާސެން 27 ބޯޅައިން 52 ލަނޑުހެދިއިރު، ކުއިންޓަން ޑެ ކޮކް 39 ލަނޑުހެދިއެވެ. ދެން އެންމެ ރަނގަޅަށް ކުޅުނު ޓްރިސްޓަން ސްޓަބްސް ވަނީ 31 ލަނޑުހަދައިފައެވެ. އެ ޓީމުގެ ކެޕްޓަން، އެއިޑަން މާކްރަމް ނުބައިވީ އެންމެ ހަތަރު ލަނޑަށެވެ.
އިންޑިއާ އަށް މި މެޗު ކާމިޔާބުކޮށްދިނުމުގައި އިސް ދައުރެއް އަދާކުރީ ޖަސްޕްރީތު ބުމްރާ އާއި ހާޑިކް ޕާންޑްޔާ އެވެ. މުބާރާތުގެ އެންމެ މޮޅު ކުޅުންތެރިއަކަށް ހޮވުނު ބުމްރާ މި މެޗުގައި ދެ ވިކެޓްނެގިއިރު، ހާޑިކް ވަނީ ތިން ވިކެޓްނަގައިފައެވެ. އަދި އެ ޓީމުގެ އުކުންތެރިޔާ، އާޝްދީޕް ސިންގ ވެސް ދެ ވިކެޓްނެގިއެވެ.