ކޮޕާ އެމެރިކާ: އާޖެންޓީނާ އަށް ސައްތައިން ސައްތައިގެ ރެކޯޑެއް، ޗިލީ ކަޓުވާލައި ކެނެޑާ ކުއާޓާ އަށް

މިހާރު ކުރިއަށްދާ ކޮޕާ އެމެރިކާ ފުޓްބޯޅަ މުބާރާތުގައި ގްރޫޕް އޭ ގައި އާޖެންޓީނާ އިން ސައްތައިން ސައްތައިގެ ރެކޯޑަކާއެކު ގްރޫޕް ސްޓޭޖް ނިންމާލިއިރު، ޗިލީ ކަޓުވާލައި ކެނެޑާ އިން ކުއާޓާ ފައިނަލުން ޖާގަ ހޯދައިފިއެވެ.

ޕެރޫ އަތުން އާޖެންޓީނާ މޮޅުވީ 0-2 އިންނެވެ. ކެނެޑާއާ ޗިލީ ބައްދަލުކުރި މެޗު ނިމުނީ 0-0 އިން އެއްވަރުވެގެންނެވެ.

މި ނަތީޖާއާއެކު ގްރޫޕް އޭ ގެ އެއްވަނައިގައި އޮތް އާޖެންޓީނާ އަށް ތިން މެޗުން ލިބިފައިވަނީ ނުވަ ޕޮއިންޓެވެ. ދެވަނައިގައި އޮތް ކެނެޑާ އަށް ތިން މެޗުން ހަތަރު ޕޮއިންޓް ލިބިފައިވާއިރު، ތިނެއްގައި އޮތް ޗިލީ އަށް ތިން މެޗުން ލިބިފައިވަނީ ދެ ޕޮއިންޓެވެ. އެންމެ ފުލުގައި އޮތް ޕެރޫ އަށް ތިން މެޗުން ލިބުނީ އެއް ޕޮއިންޓެވެ.

އާޖެންޓީނާ އިން ޕެރޫ މެޗަށް ނިކުތްއިރު އަނިޔާގެ ސަބަބުން އެ ޓީމުގެ ކެޕްޓަން، ލިއޮނަލް މެސީ ނުކުޅެއެވެ. އަދި މި މެޗުގައި އެ ޓީމުގެ ކޯޗު، ލިއޮނަލް ސްކަލޯނީ ވެސް ސަސްޕެންޝަނުގެ ސަބަބުން ބެންޗުގައި ނެތެވެ. ސްކަލޯނީ އަށް ސަސްޕެންޝަނެއް އައީ މުބާރާތުގެ ފުރަތަމަ ދެ މެޗުގައި ދެވަނަ ހާފަށް ކުޅެން ނިކުތުމުގައި އެ ޓީމުން ލަސްކުރުމުންނެވެ. އެ ޓީމުން މެޗަށް ނިކުތީ ވެސް ނުވަ ބަދަލު ގެނެސްގެންނެވެ.

ހާޑްރޮކް ސްޓޭޑިއަމްގައި 64 ހާހެއްހާ ސަޕޯޓަރުންގެ ކުރިމަތީގައި ރޭ ފަތިހު ކުޅުނު މެޗުގައި އާޖެންޓީނާ އިން ޖެހި ދެ ލަނޑުވެސް ކާމިޔާބުކުރީ ފަހު ހާފުގައެވެ. އެ ޓީމަށް މި ދެ ލަނޑުވެސް ކާމިޔާބުކޮށްދިނީ އިންޓަ މިލާންގެ ފޯވާޑް، ލަޓާރޯ މާޓިނޭޒް އެވެ.

މި މެޗުގައި އެ ޓީމުން ޖެހި ފުރަތަމަ ލަނޑު، 47 ވަނަ މިނެޓުގައި މާޓިނޭޒް ކާމިޔާބުކުރީ އެ ޓީމުގެ ހުނަރުވެރި މިޑްފީލްޑަރު، އެންހެލް ޑި މާރިއާ ދިން ތުރޫ ޕާހަކުންނެވެ. މި ގޯލަށްފަހު މާޓިނޭޒް ވަނީ އުފާ ފާޅުކުރުމުގެ ގޮތުން ބެންޗު ކައިރީގައި ހުރި މެސީގެ ގައިގަ ބައްދާލައިފައެވެ. އޭގެފަހުން، އެ ޓީމުގެ ޑިފެންޑަރު، ނިކޮލަސް ޓަގްލިއަފީކޯ ގޯލެއް ކާމިޔާބުކުރިނަމަވެސް ރެފްރީ ވަނީ ވީއޭއާރް އިން ބެލުމަށްފަހު އެ ބޯޅަ ފޮނުވާލުމުގެ ކުރީން ޕެރޫގެ ކީޕަރު، ޕެޑްރޯ ގަލެސޭ އަށް ފައުލްކުރިކަމަށް ނިންމާ އެ ލަނޑު ގަބޫލުނުކުރަން ނިންމައިފައެވެ.

އާޖެންޓީނާގެ ލީޑް ފުޅާކޮށްދޭން ލިބުނު އަނެއް ފުރުޞަތުގައި ލިބުނު ޕެނަލްޓީ ވެސް އެ ޓީމުގެ މިޑްފީލްޑަރު، ލެއަންޑްރޮ ޕަރެޑޭސް އަށް ކާމިޔާބުނުކުރެވުނެވެ. ޕެނަލްޓީއޭރިޔާ ތެރެއިން ޕެރޫގެ ޖީސަސް ކަސްޓީލޯ އަތުގައި ޖެހުމުން ލިބުނު މި ޕެނަލްޓީ ޕަރެޑޭސް ފޮނުވާލުމުން އަމާޒުވީ އަރިމަތީދަނޑިއަށެވެ. މެޗު ނިމެން ހަތަރު މިނެޓަށްވެފައިވަނިކޮށް އާޖެންޓީނާގެ ދެވަނަ ލަނޑުޖަހައިދިނީ މާޓިނޭޒް އެވެ. މިއީ މި ފަހަރުގެ މުބާރާތުގައި އޭނާ ޖެހި ހަތަރުވަނަ ގޯލެވެ. މާޓިނޭޒް ވަނީ ގްރޫޕް ސްޓޭޖުގައި ކުޅުނު ތިން މެޗުގައި ވެސް ލަނޑުޖަހައިފައެވެ.

މި ގްރޫޕުގެ އަނެއް މެޗުގައި ޗިލީއާ ލަނޑެއްނުޖެހި ކެނެޑާ އެއްވަރުވިއިރު، ފުރަތަމަ ހާފުގައި ދެއްކި ރަތް ކާޑާއެކު ޗިލީން މެޗުގެ ބޮޑުބައި ފުރިހަމަކުރީ އެއް ކުޅުންތެރިއަކު މަދުކޮށެވެ. ފުރަތަމަ ހާފުގެ 27 ވަނަ މިނެޓުގައި ދެވަނަ ރީނދޫ ކާޑާއެކު ރަތެއް ދެއްކީ ޗިލީގެ ގެބްރިއެލް ސުއާޒޯ އަށެވެ.

މި މެޗުގައި ދެ ޓީމުގެ ގޯލްކީޕަރުންގެ ފަރާތުން ވެސް ގިނަ ސޭވްތަކެއް ފެނިގެންގޮސްފައިވާއިރު، ގިނަ ސޭވްތައް ކޮށްފައިވަނީ ކެނެޑާގެ ކީޕަރު، މެކްސީމް ކްރެޕީއު އެވެ. މި ނަތީޖާއާއެކު ކެނެޑާ އިން ވަނީ ފުރަތަމަ ފަހަރަށް މުބާރާތުގެ ކުއާޓާ ފައިނަލުން ޖާގަ ހޯދައިފައެވެ.

މި މުބާރާތުގައި ދެން ކުޅުމަށް ހަމަޖެހިފައިވަނީ ގްރޫޕް ބީ ގެ މެޗުތަކެވެ. މިރޭ ފަތިހު ކުޅުމަށް ހަމަޖެހިފައިވާ މެޗުތަކަށް ބަލާއިރު ޖެމެއިކާއާ ވެނެޒުއެލާ ބައްދަލުކުރާއިރު، މެކްސިކޯ ނިކުންނާނީ އެކުއޭޑާއާ ދެކޮޅަށެވެ. މި ދެ މެޗުވެސް ފަށާނީ ރާއްޖޭގަޑިން މިރޭ ފަތިހު 5 ޖަހާއިރު އެވެ.