އެމްޓީސީސީން ހުޅުމާލެއާއި މާލެއާ ދެމެދު ޕްރިމިއަމް ލިންކްގެ ޚިދުމަތްދިނުމަށް ތަޢާރަފްކުރި އެއަރކޮންޑިޝަން ފެރީގެ ޚިދުމަތް ވަގުތީގޮތުން މެދުކަނޑާލިތާ 20 ދުވަސް ފަހުން މި ޚިދުމަތް އަލުން ފަށައިފިއެވެ.
އެމް.ޓީ.ސީ.ސީ.އިން ބުނީ، މި ޚިދުމަތް މެދުކަނޑާލީ، ކަސްޓަމަރުންގެ ފަރާތުން ލިބުނު ޚިޔާލުތަކާ އެއްގޮތަށް ޚިދުމަތުގެ ފެންވަރު ރަނގަޅު ކުރުމަށާއި ކޮންމެހެން ފެރީގައި ކުރަންޖެހޭ މަރާމާތުގެ މަސައްކަތްތަކެއް ކުރުމަށް ކަމަށެވެ.
ހުޅުމާލެއާއި މާލެއާ ދެމެދު ދަތުރުކުރާ ދަތުރުވެރިންގެ ފަސޭހައަކަށް އެ ކުންފުނިން ތަޢާރަފްކުރި ދުވެލި އަވަސް، ކޮއިމަލާ 1 އަދި 2 ޚިދުމަތަށް ނެރެފައިވަނީ، މިދިޔަ މާރޗް މަހުގެ 3 ވަނަ ދުވަހުއެވެ. މި ދެފެރީއަކީ، 146 މީހުންގެ ޖާގައިގެ ފެރީތަކެކެވެ. އަދި މި ދެފެރީއަކީ، އެހެން ފެރީތަކަށްވުރެ ދުވެލި ބާރު ފެރީތަކެކެވެ. މި ދެފެރީގެ ފީއަކީ މީހަކަށް ކޮޅަކަށް 10 ރުފިޔާއެވެ.