ޤައުމީ އަދި ބައިނަލްއަގުވާމީ ފެންވަރުގެ ކުޅިވަރު ކުޅޭ ތަންތަނުގައި ކޮންމެހެން ހުރުން ލާޒިމުކުރާ މިންގަނޑުތަކުގެ ތެރޭގައި ހިމެނޭ ކުޅިވަރު ދަނޑުތަކުގައި ހެލްތު ފެސިލިޓީ ޤާއިމުކުރުމުގެ މަސައްކަތުގެ ދަށުން މިމަސް ނިމުމުގެ ކުރިން ހުޅުމާލޭ ދަނޑުގައި ހެލްތު ފެސިލިޓީއެއް ގާއިމުކުރާނެ ކަމަށް ކުޅިވަރާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި ރާފިޢު ވިދާޅުވީ މިހާރު ކުރަމުންދަނީ ހެލްތު ރިކުއާމެންޓް ނުވަތަ ހުރުން ލާޒިމުވާ ހިދުމަތްތައް ގާއިމުކުރުމުގެ މަސައްކަތް ފުޅާކުރުން ކަމަށާއި, އެގޮތުން ހުޅުމާލޭގެ ދަނޑުގައި ޤާއިމުކުރާ ހެލްތު ފެސިލިޓީ ނިންމާލެވޭނެ ކަމަށެވެ.
ކުޅިވަރު ވުޒާރާއިން މަސައްކަތް ކުރަމުންދަނީ ލަނޑުދަނޑިތަކެއް ހާސިލުކުރުމަށް ކަމަށް ވަޒީރު ވިދާޅުވިއެވެ. މި ކަންކަން ހާސިލުކުރުމަށް މަސައްކަތް ކުރަމުންދާނީ ވަކި ޓައިމްލައިނެއްގެ ދަށުންކަން ވަޒީރު ފާހަގަކުރެއްވިއެވެ.
ކުޅިވަރުގެ ދާއިރާއިން ވޭތުވެދިޔަ ހަ މަސްދުވަހުގެ ތެރޭގައި ކުރި މަސައްކަތްތައް ގިނަކަން ފާހަގަކުރައްވަމުން ވަޒީރު ވިދާޅުވީ މާލޭ އޭރިއާގެ ސާފިން އެރީނާއެއް ޤާއިމުކުރުމުގެ މަސައްކަތް ފެށޭނެ ކަމަށާއި، އަމާޒަކީ އަންނަ އޯގަސްޓު މަހު މޯލްޑިވްސް ޕްރޯ ބޮޑީބޯޑިން މުބާރާތް ނިންމުމަށްފަހު އަމަލީ މަސައްކަތް ފެށުން ކަމަށެވެ.
"ކުރެވުނު މަސައްކަތްތައް ވަރަށް ގިނަ، އޭގެތެރޭގައި އެގިވަޑައިގަންނަވާނެ ހަފްތާ 14 ގެ މަސައްކަތްތަކުގެ ތެރޭގައި ހުރި ކަންކަން އެ ޓައިމްލައިނު ތެރޭގައި ނިންމުނު، އޭގެތެރޭގައި ބޮޑެތި މަޝްރޫއުތަކާއި ގުޅުންހުރި ކަންތައްތައް ވެސް ހިމެނުނު." ރާފިއު ވިދާޅުވިއެވެ.
ހުޅުމާލޭގައި އަޅާ ކުޅިވަރު ކޮންޕްލެކްސްގެ ތަފްސީލުދެއްވަމުން ރާފިޢު ވިދާޅުވީ މިއަހަރު ނިމުމުގެ ކުރިން ނެޓްބޯޅަ އެރީނާގެ އިތުރުން ފުޓްސަލް އެރީނާގެ ބިންގާ އެޅިގެންދާނެ ކަމަށާއި މިހާރު ކުރިއަށްދަނީ އެ ދެތަނުގެ ކުރެހުމުގެ މަސައްކަތް ކަމަށެވެ. މުޅި ބިމަށް ބަލާއިރު 53000 (ފަންސާސް ތިންހާސް) އަކަފޫޓުގައި ޤާއިމުކުރާ ކުޅިވަރު ކޮންޕްލެކްސްގައި މުޅި މަޝްރޫގެ ތަފްސީލީ މަސައްކަތްތަކެއް މިވަގުތު ކުރިއަށްދާ ކަމަށް ރާފިޢު ވިދާޅުވިއެވެ.
ފުޓްސަލް ކޮމްޕްލެކްސްގެ ޑިޒައިން ކުރަމުންދަނީ އޮފީސްތަކާއި، އެކި ކުޅިވަރު ހަރަކާތްތަކާއި، މިނޫންވެސް އިތުރު ކަންތައްތައް ކުރިއަށްގެންދެވޭނެ ގޮތް ބަލައިގެންކަމަށް ވިދާޅުވަމުން ރާފިޢު ވިދާޅުވީ ނެޓްބޯޅަ ކޮމްޕްލެކްސް ޤާއިމުކުރެވިގެން ދާނީ މަލްޓި ސްޕޯޓްސް ކޮމްޕްލެކްސްއެއްގެ ގޮތުގައި ކަމަށް ރާފިޢު ވިދާޅުވިއެވެ. އޭގެ ސަބަބުން މިވަގުތު އިންޑޯ ކުޅިވަރުތަކަށް ދިމާވާ ދަތިތަކަށް ހައްލެއް ލިބިގެންދާނެ ކަމަށް ރާފިޢު ވިދާޅުވިއެވެ.
ވެޓަރަންސްގެ ދަފްތަރެއް އެކުލަވާލުމުގައި މަސައްކަތުގައި ވަޒީރު ވިދާޅުވީ ކުރީގެ ކުޅުންތެރިންނަށް ހާއްސަކޮށްގެން އެކުލަވާލާ ދަފްތަރުގައި މިހާރު ކޮމިޝަނަރ އޮފް ސްޕޯޓްސް އޮފީހުގެ ވެބްސައިޓާއި ކުޅިވަރު ވުޒާރާގެ ވެބްސައިޓުގައި މިހާރު ރަޖިސްޓްރީ ކުރެވޭނެ ކަމަށެވެ. އަދި ވެޓަރަންސް ދަފްތަރެއްގެ ފައިދާއާއި ގުޅޭގޮތުން އެކި ފޯރަމްތަކުގައި މިހާތަނަށް ގިނަ ބަޔަކަށް މައުލޫމާތު ފޯރުކޮށްދެވިފައިވާ ކަމަށް ވަޒީރު ވިދާޅުވިއެވެ.
މިހާތަނަށް ސަރުކާރުން ކުޅިވަރު ދާއިރާ ތަރައްގީކުރުމަށް ގިނަ މަސައްކަތްތަކެއް ކުރެއެވެ. އެގޮތުން ކުޅިވަރު ކުޅޭ ތަންތަނުގެ މަރާމާތުގެ މަސައްކަތް ކުރިއަށްދާ ފާހަގަކުރަމުން މިހާރު ވެސް އަތޮޅުތެރޭގެ ތިން ސަރަހައްދެއްގަ މަސައްކަތް ކުރިއަށްދާ ކަމަށެވެ.
"ވަކި އުސޫލެއްގެ މަތިން ރިޕެއާ އެންޑް މެއިންޓަނަންސްގެ މަސައްކަތަކީ އަޅުގަނޑުމެންގެ ތެރޭގައި މާބޮޑަށް އޮންނަ ކަމެއްނޫން، ނަމަވެސް އެކަމުގެ މަސައްކަތްވެސް އަޅުގަނޑުމެން އެބަކުރަން." ރާފިއު ވިދާޅުވިއެވެ.
މީގެއިތުރުން ދޮޅު އަހަރުފަހުން މާލޭ ގައުމީ ފުޓްބޯޅަ ދަނޑުގެ މަރާމާތުގެ މަސައްކަތް ނިންމާ މިހާރު ބޭނުން ކުރަންފަށާފައިވާ ކަމަށް ވަޒީރު ވިދާޅުވިއެވެ.