މިހާރު ކުރިއަށްދާ ކޮޕާ އެމެރިކާ ފުޓްބޯޅަ މުބާރާތުގައި ރޭ ފަތިހު ކުޅުނު މެޗުގައި ޗިލީއާ ޕެރޫ ލަނޑެއްނުޖެހި އެއްވަރުވެގެން ނިމިއްޖެއެވެ.
އެމެރިކާގެ ޓެކްސަސްގައި ހުންނަ އޭޓީއެންޑްޓީ ސްޓޭޑިއަމްގައި ކުޅުނު މި މެޗުގައި ޗިލީ އަށް ޕޮއިންޓެއް ހޯދައިދިނުމުގައި އެ ޓީމުގެ ތަޖުރިބާކާރު ގޯލްކީޕަރު، ކްލައުޑިއޯ ބްރާވޯ ވަނީ މުހިއްމު ސޭވްތަކެއް ކޮށްފައެވެ. އޭގޮތުން، އޭނާ ވަނީ މުޅި މެޗުގައި ހަތަރު ސޭވްކޮށްފައެވެ.
އޭގެތެރޭގައި، މެޗުގެ 79 ވަނަ މިނެޓުގައި ޕެރޫން ނެގި ކޯނަރެއްގައި އެ ޓީމުގެ ޖިއަންލޫކާ ލަޕަޑިއުލާ ފޮނުވާލި ހަމަލާއަކާއި، ރީބައުންޑްގައި ޕައޮލޯ ގަރޭރޯ ފޮނުވާލި ހަމަލާ ހުއްޓުވަން ކުރި ސޭވްތައް ފާހަގަކޮށްލެވެއެވެ.
ގާތްގަނޑަކަށް 43 ހާހެއްހާ ސަޕޯޓަރުންގެ ކުރިމަތީގައި ކުޅުނު މި މެޗުގައި ދެ ޓީމުގެ ފަރާތުން ވަރަށް ވަރުގަދަ ކުޅުމަކާއެކު ޖުމްލަ 37 ފައުލާއެކު 4 ރީނދޫ ކާޑު ފެނިގެންގޮސްފައިވެއެވެ.
މެޗު ފެށިގެން ގިނަވަގުތު ބޯޅަ ގެންގުޅެ، ގިނަ ހަމަލާތައް އުފެއްދި ޗިލީ އަށް މުޅި މެޗުގައި ލިބުނު އެންމެ ރަނގަޅު ފުރުޞަތުގައި ފުރަތަމަ ހާފުގެ 16 ވަނަ މިނެޓުގައި އެ ޓީމުގެ ފޯވާޑް، އަލެކްސިސް ސަންޗޭޒް ފޮނުވާލި ބޯޅަ ދިޔައީ ހުރަސްދަނޑިމަތިން ބޭރަށެވެ.
އޭގެފަހުން، މެޗުގެ ފަހު ހާފުގެ ފަހުބައިގައި ސަންޗޭޒްގެ އިތުރުން ބެން ބްރެރެޓަން އާއި އެ ޓީމުގެ ޑިފެންޑަރު، އިގޯ ލިކްނޯވްސްކީ އަށް ލިބުނު ފުރުޞަތުތަކުގެ ވެސް ބޭނުންހިފޭގޮތެއްނުވިއެވެ. ބްރެރެޓަން އާއި ލިކްނޮވްސްކީ ބޮލުން ފޮނުވާލި ބޯޅަތައް ހުރަސްދަނޑީގެ މާމަތިން ބޭރަށް ދިޔައިރު، ވަރަށް ހަނި އޭންގަލަކުން ސަންޗޭޒް ފޮނުވާލި ބޯޅަ ދިޔައީ ދަނޑިކައިރިން ބޭރަށެވެ.
މި މެޗާއެކު ޗިލީގެ ކީޕަރު، ބްރާވޯ ވަނީ މުބާރާތުގެ ތާރީޚުގައި ކުޅުނު އެންމެ ދުވަސްވީ ކުޅުންތެރިޔާގެ ރެކޯޑް ގާއިމްކޮށްފައެވެ. ޕެރޫއާ ދެކޮޅަށް ކުޅުނުއިރު އޭނާގެ އުމުރަކީ 41 އަހަރާއި 69 ދުވަހެވެ.
މި މުބާރާތުގައި ޕެރޫ އަށް ދެން އޮތީ ކެނެޑާއާ ދެކޮޅަށް ކުޅޭ މެޗެވެ. ޕެރޫގެ ފަހު މެޗުގައި އެ ޓީމުން ނިކުންނާނީ އާޖެންޓީނާއާ ދެކޮޅަށެވެ.