"ޕީއެސްއެމް އެއަރ" އެޕުން ޔޫރޯގެ މެޗުތައް ފޯނާހަމައަށް

ޖަރުމަނުގައި މިހާރު ކުރިއަށްދާ "ޔޫރޯ 2024"ގެ މެޗުތައް ވަގުތުން ބަލާލެވޭގޮތަށް ޕީއެސްއެމްގެ ގިނަ ޗެނަލްތަކެއް އޮންލައިންކޮށް ބެލޭނެ ފޯނު އެޕްލިކޭޝަނެއް ތައާރަފްކޮށްފިއެވެ.

ޔޫރޯއަށް ޚާއްސަކޮށްގެން ޕީއެސްއެމުން ގެނެސްދޭ ޚާއްސަ ކަވަރޭޖުގެ ތެރެއިން މި އެޕްލިކޭޝަން ތައާރަފްކުރީ ޕަބްލިކް ސާވިސް މީޑިއާގެ މެނޭޖިން ޑިރެކްޓަރ ޒީނާ ޒާހިރު އާއި ޑެޕިއުޓީ މެނޭޖިންގ ޑިރެކްޓަރ އަބްދުﷲ ޔާމިން ރަޝީދުއެވެ.

"ޕީއެސްއެމް އެއަރ" އެޕްލިކޭޝަން އިފްތިތާޙުކުރުމަށްފަހު އެޕްލިކޭޝަނާ ގުޅޭ ގޮތުން ވާހަކަދައްކަވަމުން ޕީއެސްއެމްގެ މެނޭޖިންގ ޑިރެކްޓަރ ޒީނާ ޒާހިރު ވިދާޅުވީ ޚާއްސަކޮށް މިފަދަ ދުވަސްވަރެއްގައި އެއްވެސް އަގަކާނުލައި ޕީއެސްއެމްގެ ޗެނަލްތައް ބަލާލެވޭގޮތް ވުމަކީ އާންމުފަރާތްތަކަށް ލިބިގެންދާނެ ބޮޑު އުފަލެއްކަމަށެވެ.

ދިވެހިންގެތެރޭގައި މި މުބާރާތުގެ ފޯރި ގަދަވެފައިވާކަން ފާހަގަކުރައްވައި މެނޭޖިންގ ޑިރެކްޓަރ ވިދާޅުވީ މިހާރު ރާއްޖޭގެ ކޮންމެ ސަރަހެއްދައިގައި ހުރެގެންވެސް މެޗުތައް ވަގުތުން ބަލާލެވޭނެ ކަމަށެވެ.

"މި ތައާރަފް ކުރެވުނު އެޕްލިކޭޝަންގެ އެންމެ އުފާވެރިކަމަކީ ހިލޭ ބަލާލެވޭ ކަން، ކޮންމެ ސަރަހައްދެގައި ހުރެގެންވެސް ޔޫރޯގެ މެޗުތައް މިހާރު ބަލާލެވޭނެ." ޒީނާ ޒާހިރު ވިދާޅުވިއެވެ.

އެޕްލިކޭޝަން ތާއާރަފް ކުރުމަށްފަހު ވާހަދައްކަވަމުން ޕީއެސްއެމްގެ ޑެޕިއުޓީ މެނޭޖިންގ ޑިރެކްޓަރ ޢަބްދުﷲ ޔާމީން ވިދާޅުވީ މިއީ ފެށުމެއް ކަމަށާއި ކުރިއަށް އޮތްތަނުގައި ގިނަ ޗެނަލްތަކެއް އެޕްލިކޭޝަން މެދުވެރިކޮށް ބަލާލެވޭނެކަމަށެވެ. އެ ގޮތުން މި އެޕްލިކޭޝަން ތައާރަފް ކުރެވިގެންދިޔައީ ޔޫރޯ ފުޓްބޯޅަ މުބާރާތުގެ ތެރެއިންކަން ފާގަކުރައްވާ ޔާމީން ވިދާޅުވީ ބެލުންތެރިންގެ އަތުގައި އޮތް ފޯނާ ހަމަޔަށް އައުމަކީ ވަރަށް ބޮޑު ފައްސޭހައެއް ކަމަށެވެ.

"ކަންދިމާ ކުރިގޮތުން ޔޫރޯ ތެރެއަށް މިކަން ތައާރަފް ކުރެވިގެން މިދިޔައީ، އެހެންކަމުން ޔޫރޯގެ ކުރިޔަށްހުރި ފޯރިގަދަ މެޗުތައް އެޕް މެދުވެރިކޮށް ބަލާލެވޭނެ." ޕީއެސްއެމްގެ ޑީއެމްޑީ ވިދާޅުވިއެވެ.

ޔާމީން ވިދާޅުވީ މިފަދަ އެޕިލިކޭޝަންކަށް ވަރަށް ގިނަ ބެލުންތެރިން އެދިއެދި ތިބިކަމަށާއި މީގެ ސަބަބުން ޔޫރޯ މުބާރާތުގެ ފޯރި އިތުރަށް ދިވެހިންގެ ތެރޭގެ ގަދަވެގެންދާނެ ކަމަށެވެ.

"ޕީއެސްއެމް އެއަރ" ނަމުގައި މިއަދު ތައާރަފް ކުރެވިގެންދިޔަ އެޕް މިހާރު އައިއޯއެސް އަދި އެންޑްރޮއިޑް ފޯނުތަކުންވެސް ޑައުންލޯޑް ކުރެވޭނެއެވެ. މި އެޕްލިކޭޝަންގައި ޕީއެސްއެމްގެ ޗެނަލްތަކުގެ ތެރެއިން ޓީވީއެމް، ޔެސްޓީވީ އަދި ޕީއެސްއެމް ނިއުސް ބަލާލެވޭނެވެ. މީގެ އިތުރުން ރޯޑިއޯ ޗެނަލުތަކުގެ ތެރެއިން ދިވެހިރާއްޖޭގެ އަޑާއި، ދިވެހި އެފްއެމްގެ އިތުރުން ދީނުގެ އަޑުވެސް އަހާލެވޭނެއެވެ. މިއީ މުޅިން ހިލޭ ޕީއެސްއެމުން ތައާރަފްކުރި ޚިދުމަތެކެވެ.

މިހާރު ކުރިޔަށްދާ ޔޫރޯއާ ގުޅިގެން ޕީއެސްއެމް އިން ތަފާތު ހަރަކާތްތައް ކުރިޔަށްގެންދާ އިރު މި މުބާރާތުގެ ރާއްޖޭގެ ލައިސަންސް ބްރޯޑްކާސްޓަރަކީ ޕީއެސްއެމްގެ ޓީވީއެމް އާއި ޔެސްޓީވީއެވެ.