ރާއްޖޭގެ ރިސޯޓުތަކުގެ މެދުގައި ކުރިއަށްދާ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ދާލު ޒޯނުގެ ޗެމްޕިއަންކަން ފުރަތަމަ ފަހަރަށް އަންސާނާ ވެލާވަރުން ހޯދައިފިއެވެ.
މުބާރާތުގެ ޗެމްޕިއަންކަން ވެލާވަރުން ހޯދީ ފައިނަލުގައި ތިން ފަހަރު ދާލު ޒޯނުގެ ޗެމްޕިއަންކަން ހޯދާފައިވާ ކަނޑިންމަ 1-0 ގެ ނަތީޖާއަކުން ބަލިކޮށްގެންނެވެ.
ވާދަވެރި ކުޅުމެއް ފެނިގެން ދިޔަ މި މެޗުގެ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ޖެހިފައެއް ނުވެއެވެ. ދެ ޓީމުންވެސް ދެވަނަ ހާފަށް ނިކުތީ، ގޯލެއް ޖަހައި، އެޑްވާންޓޭޖް ހޯދުމަ ށެވެ.
ވެލާވަރު މޮޅުކޮށްދިން ލަނޑު މެޗުގެ 32 ވަނަ މިނެޓުގައި ކާމިޔާބުކުރީ ކެޕްޓަން ވިޝާހު ޝަރީފް އެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީވެސް ވިޝާހު އެވެ.
ދާލު ޒޯނުގެ އެންމެ މޮޅު ކުޅުންތެރިއަކަށް ހޮވިފައިވަނީ ވެލާވަރުގެ މުހައްމަދު ޝާހު އެވެ. މުބާރާތުގެ އެންމެ މޮޅު ފަސް ކުޅުންތެރިން ތެރޭގައި ހިމެނިފައިވަނީ ވެލާވަރުގެ ވިޝާހު އާއި ޔޫސުފް ޒައާން އާއި އަހުމަދު ނާޖިހުގެ އިތުރުން ކަނޑިންމަގެ އަހުމަދު ޝައިހާން އާއި މުހައްމަދު އިފްހާމެވެ.
މި އަހަރުގެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމަށް ތިން ކުޅުންތެރިއަކު ވަނީ ހޮވިފައެވެ. އެއީ ވެލާވަރުގެ ޝާހު އާއި ކަނޑިންމަގެ ޝައިހާން އަދި އިފްހާމް އެވެ. މި ތިން ކުޅުންތެރިންވެސް ވަނީ މުބާރާތުގައި ތިން ގޯލު ޖަހާފަ އެވެ. ދާލު ޒޯނުގެ އެންމެ މޮޅު ކޯޗަކަށް ހޮވިފައިވަނީ ޗެމްޕިއަން ވެލާވަރުގެ މޫސާ އިބްރާހިމް އެވެ.
މިއާއެކު، މިއަހަރުގެ ރިސޯޓު ލީގުގެ ދާލު ޒޯނާއި ނޯތު މާލޭ ޒޯނު ވަނީ ނިމިފަ އެވެ. ނޯތު މާލޭ ޒޯނުގެ ޗެމްޕިއަންކަން ހޯދާފައިވަނީ ބަނޑޮސް މޯލްޑިވްސް އެވެ.