އާދަޔާ ޚިލާފް ހޫނުގަދަ ދުވަސްތަކެއް ތަހައްމަލް ކުރަމުން ދިޔަ އުތުރު އިންޑިއާގެ ބައެއް ހިސާބުތަކަށް ވާރޭ ވެހެން ފަށައިފިއެވެ.
ވާރޭވެހި، ފެން ލިބި، ފިނިކަން ލިބުމުން އުފާ ފާޅުކުރުމަށް އެހިސާބުތަކުގެ މީހުން ވަނީ މަގުތަކުގެ މައްޗަށް ނިކުމެފައެވެ. މޫސުމަށް އައި ބަދަލާއި ގުޅިގެން ހިމާޗަލް ޕްރަދޭޝް ގެ ބަޔެއް ހިސާބުތަކުގެ ފިނިހޫނުމިން 38 ޑިގްރީ އިން 23 ޑިގްރީއަށް ތިރިވެފައިވެއެވެ. ކުރިޔަށްއޮތް 4 ދުވަހުވެސް ހިމާޗަލް ޕްރަދޭޝް އާއި އެހެން ބައެއް ހިސާބުތަކަށް ވާރޭވެހޭނެކަމަށް މޫސުމާބެހޭ އިދާރާތަކުން ލަފާކުރެއެވެ. ކުރިން ހޫނުކަން ތަހަންމަލް ކުރަމުން އައި ޝިމްލާއަށްވެސް މިއަދު ފަންސަވީސް މިލިމީޓަރުގެ ވާރޭވެހިފައިވާކަމަށް ރިކޯޑްތަކުންދައްކައެވެ.
ވެރިރަށް ނިއުދިއްލީއަށްވެސް ރޭންފެށިގެން ވާރޭވެހި، ފިނިކަން އައިސްފައިވާކަމަށް ޚަބަރު ލިބެއެވެ. މިއާއެކު ފިނިހޫނުމިން 40 ޑިގްރީ އިން 25 ޑިގްރީއަށް ތިރިވެފައިވެއެވެ.