ވެސްޓް ޕާކުކުރިމަތީ ތޫނު އެއްޗަކުން ޙަމަލާދީ މަރާލީ މ. ފެއަރީ ކޯނަރ ޢަލީ ޝިފާންގެ މަރުގެ މައްސަލާގައި އެކަކުގެ މައްޗަށް ކުށްސާބިތުވާކަމަށް ކަނޑައަޅުއްވައި، އެނާ މެރުމަށް ހައިކޯޓުން މިއަދު ހުކުމްކުރައްވައިފިއެވެ.
ޝިފާންގެ މަރުގެ ބަދަލުގައި މަރަށް މަރުހިފުމަށް ހައިކޯޓުން ހުކުމް ކުރައްވާފައިވަނީ ދަފްތަރު މުޙައްމަދު ސައިފާންގެ މައްޗަށެވެ. ޢަލީ ޝިފާންގެ މަރުގެ މައްސަލާގައި ދައުލަތުން 6 މީހެއްގެ މައްޗަށް ދަށުކޯޓްގައި ދައުވާކޮށްފައިވެއެވެ. އެހެންނަމަވެސް އެ 6 މީހުންގެ މައްޗަށް ކުށްސާބިތުނުވާ ކަމަށް ނިންމާ އެ އެންމެންވެސް ވަނީ ދަށުކޯޓުން މިނިވަންކޮށްފައެވެ.
ދަށުކޯޓްގެ ނިންމުމާއި ހިތްހަމަނުޖެހިގެން އޭގެތެރެއިން 3 މީހެއްގެ މައްސަލަ ހައިކޯޓްގައި އިސްތިއުނާފު ކުރައްވާފައިވެއެވެ. އެ މައްސަލަ ނިންމާ މިއަދު އިއްވި ޙުކުމްގައި ބުނެފައިވަނީ ޝިފާން މަރާލި ތަނުގައި ސައިފާން ހުރިކަމަށާއި އަދި ޝިފާންގެ ނިޔަފަތި ދަށުން ފެނުނު ތަކެތި ސައިފާންގެ ޑީއެންއެންއާ ދިމާވާކަމަށެވެ. އަދި ޝިފާން މަރާލި ތަނުގައި ވަޅިއެއް ހިފައިގެން ސައިފާން ހުރިކަން ސާބިތުވާ ކަމަށެވެ.
މި މައްސަލާގައި ދައުލަތުން ދަޢުވާކުރި އަނެއް 2 މީހުންގެ މައްޗަށް އެކަށީގެންވާވަރުގެ ހެކި ނެތުމުން އެ ކުށް ސާބިތުނުވާ ކަމަށް ހައިކޯޓުން ކަނޑައަޅުއްވާފައިވެއެވެ.