ޖަރުމަނުގައި މި މަހު ފަށާ ޔޫރޯ ފުޓްބޯޅަ މުބާރާތާއެކު ކުރިއަށް އޮތް ދުވަސްތަކުގައި ދިވެހި ރައްޔިތުން އެކަތިގަނޑަކަށްވެ، ފޯރިއާއެކު ކުރިއަށްދާނެ ކަމަށް އުއްމީދުކުރައްވާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ވަޒީރު މިހެން ވިދާޅުވީ ޔޫރޯގެ މެޗުތައް ވަގުތުން ގެނެސްދިނުމަށް ޕަބްލިކް ސަރވިސް މީޑިއާ (ޕީއެސްއެމް) އިން ގެނެސްދޭ "ޕީއެސްއެމް ފޯރި 2024" ކަވަރޭޖް ލޯންޗުކުރުމަށް މިރޭ ބޭއްވި ޚާއްސަ ރަސްމިއްޔާތު ޝަރަފުވެރިކޮށްދެއްވައި ވާހަަކަފުޅު ދައްކަވަމުންނެވެ.
މި ރަސްމިއްޔާތުގައި ވަޒީރު ވަނީ ޔޫރޯގެ ހުރިހާ މެޗުތަކާއި، އެނަލިސްޓުންގެ ހުނަރާއި، އެ ބޭފުޅުންގެ އިލްމު ފޯރުކޮށްދިނުމާއެކު، ރާއްޖޭގެ ހުރިހާ ރައްޔިތުންނަށް މުބާރާތް ބެލޭނެ ގޮތަށް އިންތިޒާމުކުރެއްވީތީ ދައުލަތުގެ މީޑިއާ، ޕީއެސްއެމްއަށް ޝުކުރުދަންނަވާފައެވެ.
ވަޒީރު ވިދާޅުވީ ފުޓްބޯޅައަކީ ރާއްޖޭގެ ރައްޔިތުން އެންމެން އެކަތިގަނޑަކަށްވެ، އެއް އާއިލާއެއްގެ ގޮތުގައި ފޯރިއާއި ޖޯޝު ނަގައިގެން އުފާވެރި މާހައުލެއް ގެނެސްދޭ އެއްޗެއް ކަމަށެވެ. އެހެންކަމުން ކުރިއަށް އޮތް ދޮޅު މަހެއްހާ ދުވަހު އެގޮތުގެ މަތިން އެއް އާއިލާއެއްގެ ގޮތުގައި އެ ފޯރި ނަގައި، އެ ޖޯޝާއި އުފާވެރިކަން މުޅި ރާއްޖެއަށް ގެނެސްދޭނެ ކަމަށް އުއްމީދުކުރައްވާ ކަމަށްވެސް ވިދާޅުވިއެވެ.
"ހަމަ އެއާއެކު އައުޓްޑޯ އެކްޓިވިޓީތައްވެސް އަޅުގަނޑަށް އެނގޭ ގޮތުގައި ޕީއެސްއެމްއިން ވަނީީ ރާއްވަވާފައި. އެހެންވީމާ އަޅުގަނޑު އުއްމީދުކުރަނީ ކުރިއަށް އޮތް ދުވަސްތަކަކީ އަޅުގަނޑުމެން އެންމެން ގުޅިގެން، ކުރިއަށްދާނެ ދުވަސްތަކެއް ކަމަށް.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
މީގެ އިތުރުން ވަޒީރު ވިދާޅުވީ ކުރިއަށް އޮތް ތަނުގައި ރާއްޖޭގައި ފުޓްބޯޅަ ފެންނަނީ އުޖާލާކޮށް ކަމަށާއި، އެ ކުޅިވަރު އިތުރަށް ފޯރިގަދަވެގެންދާނެ ކަމަށެވެ. އަދި މުޅި ރާއްޖޭގައި ކުޅިވަރުތައް އާލާކޮށް، ކުޅިވަރު ކުރިއަރުވުމަށް ކުރާ މަސައްކަތުގައި ދިވެހި ސަރުކާރުން އަދި ވަކިން ޚާއްސަކޮށް ރައީސުލްޖުމްހޫރިއްޔާގެ ޑރ. މުޙައްމަދު މުޢިއްޒުގެ ލަފާފުޅާއި އެހީތެރިކަން ދެއްވާތީވެ، އެކަމަށްޓަކައި އެ މަނިކުފާނަށް ޝުކުރުދަންނަވާ ކަމަށްވެސް ވަނީ ވިދާޅުވެފައެވެ.