ރައްޔިތުންނަށް ޔޫރޯ ބެލޭނެ އިންތިޒާމު ހަމަޖެއްސުމަށް ސަރުކާރުގެ ބޮޑު އެއްބާރުލުމެއް ލިބުނު: ޒީނާ

ދައުލަތުގެ މީޑިއާ މެދުވެރިކޮށް ރައްޔިތުންނަށް ހިލޭ ޔޫރޯ ފުޓްބޯޅަ މުބާރާތް ބެލޭނެ ގޮތް އިންތިޒާމުކުރުމަށް ސަރުކާރުގެ އެއްބާރުލުން ވަރަށް ބޮޑަށް ލިބިވަޑައިގެންނެވި ކަމަށްް ޕަބްލިކް ސަރވިސް މީޑިއާ (ޕީއެސްއެމް) ގެ މެނޭޖިންގ ޑިރެކްޓަރު ޒީނާ ޒާހިރު ވިދާޅުވެއްޖެއެވެ.

ޒީނާ މިހެން ވިދާޅުވީ ޔޫރޯގެ މެޗުތައް ވަގުތުން ގެނެސްދިނުމަށް ޕީއެސްއެމްއިން ގެނެސްދޭ "ޕީއެސްއެމް ފޯރި 2024" ކަވަރޭޖް ލޯންޗުކުރުމަށާއި، ސްޕޮންސަރުންނާއެކު ސޮއިކުރުމަށް މިރޭ ބޭއްވި ޚާއްސަ ރަސްމިއްޔާތުގައެވެ.

"ޕީއެސްއެމް ފޯރި 2024" ލޯންޗުކުރުމުގެ ހަރަކާތުގައި ވާހަކަދައްކަވަމުން ކުންފުނީގެ މެނޭޖިން ޑިރެކްޓަރު ޒީނާ ވިދާޅުވީ އެންމެ ފަހުގެ ޔޫރޯ މުބާރާތް ދައުލަތުގެ މީޑިއާއިން ނުގެނެސްދެވުމުން އެކަމުގެ ކަންބޮޑުވުން އާއްމުން ފާޅުކުރި ކަމަށެވެ. އެހެންކަމުން މިއީ ރާއްޖޭގެ ފުޓްބޯޅައަށް ލޯބިކުރާ އެންމެހާ ފަރާތްތަކަށް އުފާވެރި ރެއެއް ކަމަށްވެސް ވިދާޅުވިއެވެ.

ޒީނާ ވިދާޅުވީ މި ފަހަރުގެ ޔޫރޯ މުބާރާތުގެ ބްރޮޑްކާސްޓިން ރައިޓްސް ހަމައެކަނި ދައުލަތުގެ މީޑިއާއަށް ލިބުނީ ރައީސުލްޖުމްހޫރިއްޔާގެ ޑރ. މުޙައްމަދު މުޢިއްޒުގެ ސަރުކާރުގެ ޚާއްސަ އިސްނެންގެވުމަކާއި އެއްބާރުލުމާއެކު ކުރެއްވި ވަރަށް މުހިންމު މަސައްކަތްތަކެއްގެ ސަބަބުން ކަމަށެވެ.

ކުންންފުނީގެ މާލީ ޙާލަތު ދަށްކޮށް އޮތް މި ދަނޑިވަޅުގައި ޕީއެސްއެމްއިން އެކަނި މިފަދަ ބޮޑު މަސައްކަތެއް ކުރުމަކީ ދަތިކަމެއްކަން ފާހަގަކޮށް، މިކަން ޙަޤީޤަތަކަށް ހެދުމަށްޓަކައި ސްޕޮންސަރުން ދެއްވި އެހީތެރިކަމަށް ޒީނާ ޝުކުރު އަދާކުރެއްވިއެވެ. ޒީނާ ވިދާޅުވީ މި ފަހަރުގެ ކަވަރޭޖަކީ ފުރިހަމަ ކަވަރޭޖަކަށް ވާނެ ކަމަށާއި، މި ފޯރީގައި ފުޓްބޯޅައަށް ލޯބިކުރާ ހުރިހާ ދިވެހިން ބައިވެރިވުމަަކީ ވަރަށް ބޮޑު އެދުމެއް ކަމަށެވެ.

"

ޔޫރޯ 2024 ގެ ފޯރި މުޅި ރާއްޖެއިން ފެންނަން ޕީއެސްއެމްގެ ޓީމުން ބޭނުންވަނީ. މިއީ ކުރެވުނު ވަރަށް ބުރަ މަސައްކަތެއް. ފަޚުރުވެރިކަމާއެކު ދަންނަވަން، ދިވެހި މީޑިއާއަކަށް ޕީއެސްއެމްއިން އެކަނި ޔޫރޯ 2024 ފެންނާނީ.

ޒީނާ ޒާހިރު - ޕީއެސްއެމްގެ މެނޭޖިންގ ޑިރެކްޓަރު

"ޕީއެސްއެމް ފޯރި 2024" ކަވަރޭޖް ލޯންޗުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި، ޕީއެސްއެމްގެ މެނޭޖިންގ ޑިރެކްޓަރު ޒީނާގެ އިތުރުން ޑެޕިއުޓީ މެނޭޖިންގ ޑިރެކްޓަރު އަބްދުﷲ ޔާމީން ރަޝީދެވެ.

ޔޫރޯ 2024 "ޕީއެސްއެމް ފޯރި" ގެނެސްދެނީ ނުވަ ކުންފުންޏެއްގެ ސޮޕޮންސަޝިޕާއެކުގައެވެ. މި މަހުގެ 14 ގައި ޖަރުމަނުގައި ފަށާ ޔޫރޯ ފުޓްބޯޅަ މުބާރާތުގެ ހުރިހާ މެޗެއް ޕީއެސްއެމްއިން އެޗްޑީ ކޮލިޓީގައި ގެނެސްދިނުމަށް ވަނީ ނިންމާފައެވެ. އެގޮތުން ޕީއެސްއެމްގެ ޓީވީއެމް އަދި ޔެސް ޓީވީން މުބާރާތުގެ މެޗުތައް ގެނެސްދޭނެ ކަމަށް ޒީނާ ވިދާޅުވިއެވެ.