ޖަރުމަނުގައި މި މަހު ފަށާ ޔޫރޯ ފުޓްބޯޅަ މުބާރާތަށް ޚާއްސަކޮށްގެން ޕަބްލިކް ސަރވިސް މީޑިއާއިން ގެނެސްދޭ "ޕީއެސްއެމް ފޯރި 2024" ކަވަރޭޖް ރަސްމީކޮށް ލޯންޗުކޮށްފިއެވެ.
ޔޫރޯ ފުޓްބޯޅަ މުބާރާތުގެ ބްރޯޑްކާސްޓިންގ ރައިޓްސް ދައުލަތުގެ މީޑިއާ ޕީއެސްއެމްއަށް ލިބިފައިވާއިރު، ޕީއެސްއެމްގެ ޚާއްސަ ކަވަރޭޖް ލޯންޗުކޮށްފައިވަނީ މިރޭ ޓީވީ ބިލްޑިންގުގައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި "ޕީއެސްއެމް ފޯރި 2024" ކަވަރޭޖް ލޯންޗުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި، ޕީއެސްއެމްގެ މެނޭޖިންގ ޑިރެކްޓަރު ޒީނާ ޒާހިރުގެ އިތުރުން ޑެޕިއުޓީ މެނޭޖިންގ ޑިރެކްޓަރު އަބްދުﷲ ޔާމީން ރަޝީދެވެ.
މި ރަސްމިއްޔާތުގައި ވަނީ "ޕީއެސްއެމް ފޯރި 2024" ކަވަރޭޖުގެ ސްޕޮންސަރުންނާއެކު ސޮއިކޮށްފައެވެ. މީގެ އިތުރުން "ޕީއެސްއެމް ފޯރި 2024" ކަވަރޭޖް ހުށަހަޅައިދޭ ޕްރެޒެންޓަރުންނާއި، ކަވަރޭޖުގެ އެނަލިސްޓުންވެސް ވަނީ މި ހަފުލާގައި ދައްކާލާފައެވެ. މި ފަހަރުގެ "ޕީއެސްއެމް ފޯރި 2024" ކަވަރޭޖުގައި ހިމެނޭ އެނަލިސްޓުންނަކީ އިސްމާޢީލް ޒަރިޔަންދު، މުޙައްމަދު ޝާހިދު (ޝާޑު)، އަޙްމަދު ފައްރާހު، އަޙްމަދު އަޙްސަން (ބަރޯ)، މުޙައްމަދު ޝާކިރު (ޝާކިއްޓޭ) އަދި ޢަބްދުﷲ އަޒްމީނެވެ.
މި މަހުގެ 14 ގައި ޖަރުމަނުގައި ފެށުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތުގެ ހުރިހާ މެޗެއް ޕީއެސްއެމްއިން އެޗްޑީ ކޮލިޓީގައި ގެނެސްދިނުމަށް ވަނީ ނިންމާފައެވެ. އަދި ބެލުންތެރިން އެކަމަށް އިތުރު އެއްވެސް އަގެއް ދައްކަން ނުޖެހޭނެއެވެ. ޔޫރޯ ދެއްކުމުގެ ރައިޓްސް އޮތް ހަމައެކަނި ދިވެހި ފަރާތަކީ ޕީއެސްއެމްއެވެ. އެގޮތުން ޕީއެސްއެމްގެ ޓީވީއެމް އަދި ޔެސް ޓީވީން މެޗުތައް ވަގުތުން ގެނެސްދިނުމަށް ވަނީ ހަމަޖެހިފައެވެ.
ޖަރުމަނުގެ 10 ސިޓީއެއްގައި ކުޅޭ މި މުބާރާތުގައި ޔޫރަޕްގެ 24 ގައުމަކުން ވާދަކުރާނެއެވެ. މި ގައުމުތައް ހަ ގްރޫޕަކަށް ބަހާލައިގެން މި މުބާރާތުގައި ޖުމްލަ 51 މެޗު ކުޅޭނެއެވެ. އަދި މުބާރާތުގެ ފައިނަލް މެޗު ކުޅޭނީ ޖުލައި 14 ވަނަ ދުވަހު ބާލިންގައެވެ.