ޔުއެފާ ޔޫރޮޕާ ކޮންޕަރެންސް ލީގުގެ ފައިނަލް މެޗުގައި އިޓަލީގެ ފިއޮރެންޓީނާ ބަލިކޮށް، މުބާރާތުގެ ޗެމްޕިއަންކަން ގްރީސްގެ އޮލިމްޕިއާކޯސްއިން ހޯދައިފިއެވެ.
ރޭ ކުޅުނު ފައިނަލް މެޗު އޮލިމްޕިއާކޯސްއިން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ. މިއީ ގްރީސްގެ ޓީމަކުން ޔޫރަޕުގެ މުބާރާތެއްގެ ތަށި ހޯދި ފުރަތަމަ ފަހަރެވެ.
ރޭގެ މެޗުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި މެޗުގެ ފުރިހަމަ ވަގުތުގައި ދެ ޓީމުން ކުރެ ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ. އެއާއެކު ނަތީޖާ ނެރުމަށް އިތުރު ވަގުތުގެ ދެ ހާފު ކުޅުނުއިރު، އޮލިމްޕިއާކޯސްއިން ލީޑު ނަގާފައިވަނީ ދެވަނަ ހާފު ނިމެން ހަތަރު މިނެޓަށް ވެފައި ވަނިކޮށެވެ. ސަންޓިއާގޯ ހެޒޭ ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ފޯވާޑް އަޔޫބް އެލް ކާބިއެވެ.
ޔޫރޮޕާ ކޮންފަރެންސް ލީގު ކާމިޔާބުކޮށް، ޔޫރަޕުގެ މުބާރާތެއްގެ ތަށި ހޯދި ފުރަތަމަ ގްރީސް ޓީމުގެ ޝަރަފު އޮލިމްޕިއާކޯސްއިން ހޯދިއިރު، މީގެ ކުރިން ގްރީސްގެ ޓީމަކުން ޔޫރަޕްގެ މުބާރާތެއްގެ ފައިނަލްގައި ކުޅެފައިވަނީ 1971 ވަނަ އަހަރުއެވެ. އެއީ ޔޫރަޕިއަން ކަޕްގެ ފައިނަލްގައި ގްރީސްގެ ޕަނަތިނާއިކޯސްއިން ނެދަލަންޑްސްގެ އެޔަކްސްއާ ދެކޮޅަށް ކުޅުނު މެޗެވެ.