ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ނޯތު މާލޭ ޒޯނުގެ ސެމީ ފައިނަލަށް އެންމެ ފަހުގެ ރަނަރަޕް ބަނޑޮސް މޯލްޑިވްސް އާއި، ބަރޮސް މޯލްޑިވްސް އަދި ދަ ރިޓްޒް ކާލްޓަން މޯލްޑިވްސް ދަތުރުކޮށްފިއެވެ.
ނޯތު މާލޭ ޒޯނުގެ ކުޅުން ވަން އެންޑް އޮންލީ ރީތި ރަށުގައި ކުރިއަށްދާއިރު، މިއަދު ހަވީރު ކުޅުނު ކުއާޓާގެ މެޗުން ބަނޑޮސް މޮޅުވީ ވަރު ބައި އެޓްމޮސްފެއާ އަތުން 4-0 ގެ ނަތީޖާއަކުންނެވެ. މި މެޗުގައި ބަނޑިހުގެ ލަނޑުތައް ކާމިޔާބުކޮށްދިނީ ދެ ލަނޑު ޖެހި އަޙްމަދު ޝަމީމާއި، އަޙްމަދު ރީހާން އަދި އިބްރާހީމް މުޝީރެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ބަނޑޮހުގެ ޝަމީމެވެ.
މި މުބާރާތުގައި މިއަދު ކުޅުނު ކުއާޓާގެ ދެވަނަ މެޗުގައި ބަރޮހުން ވަނީ ޕެނަލްޓީ ޖަހައިގެން އޯގާ އަރޓް ރިސޯޓް މޯލްޑިވްސް ބަލިކޮށްފައެވެ. މި މެޗުގެ ފުރިހަމަ ވަގުތު ހަމަވިއިރު، ދެ ޓީމުންކުރެ އެއްވެސް ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ. އެއާއެކު ނަތީޖާ ނެރުމަށް ޖެހި ޕެނަލްޓީގައި ބަރޮސް ކުރިހޯދީ 3-2 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ބަރޮހުގެ ގޯލްކީޕަރު ހުސައިން ޝަހުޒާނެވެ.
މީގެ އިތުރުން ސެމީގެ ފަހު ޖާގަ ރިޓްޒް ކާލްޓަންއިން ހޯދީ މިއަދު ކުޅުނު ކުއާޓާގެ ފަހު މެޗުގައި ޕެނަލްޓީ ޖަހައިގެން 5-2 ގެ ނަތީޖާއަކުން އޮބްލޫ ސެލެކްޓް ސަންގެލި ބަލިކުރުމަށްފަހުއެވެ. މި މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 1-1 ގެ ނަތީޖާއަކުން އެއްވަރުވެފައެވެ. މެޗުގެ 13 ވަނަ މިނެޓުގައި ރިޓްޒްގެ އަޙްމަދު އަދުހަމް ލަނޑެއް ޖަހާފައިވަނިކޮށް، ދެވަނަ ހާފުގައި ސަންގެއްޔަށް ނަތީޖާ އެއްވަރުކޮށްދިނީ މީސާގު މުޙައްމަދެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ރިޓްޒް ކާލްޓަންގެ އަޙްމަދު ކިރާމް އަބްދުލް ސައްތާރެވެ.
މި ނަތީޖާތަކާއެކު، ސެމީ ފައިނަލްގެ ޖާގަތައް ކަށަވަރުވެފައިވާއިރު، ސެމީގެ ފުރަތަމަ ޖާގަ ހޯދީ އެންމެ ފަހުގެ ޗެމްޕިއަން ރީތި ރަށުންނެވެ. ސެމީގެ މެޗުތައް އަންނަ ހުކުރު ދުވަހު ކުޅޭއިރު، ފުރަތަމަ ސެމީގައި ބައްދަލުކުރާނީ ބަނޑޮހާއި ރީތި ރަށެވެ. އަދި ދެވަނަ ސެމީގައި ބައްދަލުކުރާނީ ބަރޮހާއި ރިޓްޒް ކާލްޓަންއެވެ.