ކޮޅުމަޑުލު ރުއްތިބިރަށް ރިސޯޓެއްގެ ގޮތުގައި ތަރައްޤީކުރުމުގެ އެއްބަސްވުމުގައި އައިލެންޑް އޭވިއޭޝަނާއި، ސިންގަޕޫރުގެ އެމް.އެސް.އެން ރިއަލިޓީ މޯލްޑިވްސްއާއި އެކު އެއްބަސްވުމެއްގައި ސޮއިކުރައްވައިފިއެވެ.
މިއީ ތ. ތިމަރަފުށީ އެއަރޕޯޓް އައިލެންޑް އޭވިއޭޝަނުން ތަރައްޤީކުރުމުން ސަރުކާރުން އެކުންފުންޏަށް ރިސޯޓެއް ތަރައްޤީކުރުމަށް ދޫކޮށްފައިވާ ރަށެކެވެ. މި އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން އައިލެންޑް އޭވިއޭޝަންގެ މެނޭޖިންގ ޑިރެކްޓަރ ޢަބްދުލް ޙާރިސް ވިދާޅުވީ، މި ރިސޯޓުގެ ސަބަބުން ރާއްޖެއަށާއި ޚާއްޞަކޮށް ތ.އަތޮޅަށް ތަރައްޤީއާއި ވަޒީފާގެ ފުރުޞަތުތަކެއް ހުޅުވިގެން ދާނެކަމަށެވެ. އަދި ތިމަރަފުށީ އެއަރޕޯޓް ތަރައްޤީކުރުމަށްވެސް އިތުރު ފުރުޞަތުތަކެއް ލިބި އިޤްތިޞާދަށް ފައިދާކުރާނެކަމަށް ވިދާޅުވިއެވެ.
img:http://s3.psmnews.mv/images/660x400/14628018383930.jpg|ރުއްތިބިރަށް ރިސޯޓެއްގެ ގޮތުގައި ތަރައްޤީކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން / ފޮޓޯ: ޕީއެސްއެމް
މިރަށް ރިސޯޓެއްގެ ގޮތުގައި ހިންގުމަށް ހަވާލުކުރައްވާފައިވަނީ 49 އަހަރުގެ މުއްދަތަކަށެވެ. އަދި މިރިސޯޓް ތަރައްޤީކުރުމަށް ގާތްގަނޑަކަށް ފަންސާސް މިލިއަން ޑޮލަރު ޚަރަދުވާނެކަމަށް އެމް.އެސް.އެން ރިއަލިޓީ މޯލްޑިވްސްއިން މަޢުލޫމާތުދެއެވެ. އަދި މިރަށް ދެއަހަރު ދުވަހުގެ ތެރޭގައި ތަރައްޤީކޮށް ނިމި ޚިދުމަތް ދެވެން ފެށޭނެކަމަށް އެފަރާތުން މަޢުލޫމާތުދެއެވެ. މިއީ 150 މޫދު ވިލާ އާއި އެކު ތަރައްޤީކުރާ ރިސޯޓެކެވެ. އެމް.އެސް.އެން ރިއަލިޓީ މޯލްޑިވްސް ޕްރައިވެޓް ލިމިޓެޑްގެ މެނޭޖިންގ ޑިރެކްޓަރ މެލްޑި މުސްވިޒަރ ބިން މުޙައްމަދު ވިދާޅުވީ، މާދަމާއިން ފެށިގެން ރިސޯޓް ތަރައްޤީކުރުމުގެ މަސައްކަތް ފަށްޓަވާނެކަމަށެވެ. އަދި އެސަރަޙަށްދައް ބޮޑު ތަރައްޤީއެއް އަންނާނެކަމަށް އޭނާ ވިދާޅުވިއެވެ.
މި ރިސޯޓުގެ ސަބަބުން 5 މިލިއަން ފަތުރުވެރިން ގެނައުމަށް ކުރާ މަސައްކަތަށް އިތުރު ކުރިއެރުމެއް ލިބިގެންދާނެކަމަށް ޓޫރިޒަމް މިނިސްޓްރީން ވިދާޅުވެއެވެ.