ސްޕެނިޝް ލީގުގައި ރޭ ސެވިއްޔާ އަތުން ހަނިގޮތަކަށް މޮޅުވެ، ތާވަލުގެ ދެވަނައިގައި އޮވެ ބާސެލޯނާއިން ލީގު ނިންމާލައިފިއެވެ.
ބާސެލޯނާގެ ކޯޗު ޒަވީ ހަނާންޑޭޒްގެ އިރުޝާދުގެ ދަށުން އެ ޓީމުން ކުޅުނު ފަހު މެޗު ކާމިޔާބުކޮށްފައިވަނީ 2-1 ގެ ނަތީޖާއަކުންނެވެ.
ސެވިއްޔާގެ ދަނޑުގައި ކުޅުނު މި މެޗުގައި ފުރަތަމަ ލަނޑު ޖަހައި ކުރި ހޯދީ ބާސެލޯނާއިންނެވެ. ޖޮއާއު ކަންސެލޯ ތަނަވަސްކޮށްދިން ފުރުސަތަކުން މެޗުގެ 15 ވަނަ މިނެޓުގައި މި ލަނޑު ކާމިޔާބުކޮށްދިނީ ތަޖުރިބާކާރު ފޯވާޑް ރޮބަޓް ލެވަންޑޯސްކީއެވެ. މި މެޗުގައި ސެވިއްޔާއިން ނަތީޖާ އެއްވަރުކުރީ މެޗުގެ 31 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ޔޫސެފް އެން-ނަސީރީއެވެ. މި މެޗުގެ ދެވަނަ ހާފުގައިވެސް ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މެޗުގެ 59 ވަނަ މިނެޓުގައި ބާސެލޯނާއިން ވަނީ އަލުން ލީޑު ނަގާފައެވެ. މި ލަނޑު ކާމިޔާބުކޮށްދިނީ ޒުވާން މިޑްފީލްޑަރު ފާމިން ލޮޕޭޒްއެވެ.
މި މެޗުން ލިބުނު ތިން ޕޮއިންޓާއެކު ބާސެލޯނާއިން ލީގު ނިންމާލީ ކުޅުނު 38 މެޗުން ލިބުނު 85 ޕޮއިންޓާއެކު ތާވަލުގެ ދެވަނައިގައެވެ. އަދި މި މެޗުން ބަލިވި ސެވިއްޔާއަށް 38 މެޗުން 41 ޕޮއިންޓް ލިބިފައިވާއިރު، އެ ޓީމުން ސީޒަން ނިންމާލީ ތާވަލުގެ 14 ވަނައިގައެވެ.
ޒަވީގެ ވަދާއީ މެޗުން ބާސެލޯނާ މޮޅެއް ހޯދިއިރު، އަންނަ ސީޒަނުގައި އެ ޓީމަށް އިރުޝާދުދޭނީ ޖަރުމަނުގެ ކުރީގެ ކޯޗު ހަންސީ ފްލިކެވެ. މިދިޔަ ޖެނުއަރީ މަހު ޒަވީ ވަނީ މި ސީޒަން ނިމުމުން ބާސެލޯނާގެ ކޯޗުކަން ދޫކޮށްލާނެކަން އިއުލާނުކޮށްފައެވެ. އެކަމަކު ތަކުރާރުކޮށް ބާސެލޯނާއިން ކުރިއަށްގެންދިޔަ މަޝްވަރާތަކަށްފަހު، ޒަވީ އެ ނިންމުން ބަދަލުކުރި ނަމަވެސް، ނޫސްވެރިންގެ ބައްދަލުވުމެއްގައި ޒަވީ ދެއްކި ވާހަކަތަކެއްގެ ސަބަބުން އޭނާ ވަކިކުރަން ބާސެލޯނާގެ ބޯޑު މެންބަރުން ވަނީ ނިންމާފައެވެ.