އޭޝިއާ/އޯޝޭނިއާ ސަރަހައްދުގެ މިނިސްޓީރިއަލް މީޓިން އޮން އެންޓި-ޑޯޕިން އިން ސްޕޯޓްސްގައި ރާފިޢު ބައިވެރިވެވަޑައިގެންފި

"19 ވަނަ އޭޝިއާ/އޯޝޭނިއާ ރީޖަން އިންޓަގަވަރްމެންޓަލް މިނިސްޓީރިއަލް މީޓިން އޮން އެންޓި-ޑޯޕިން އިން ސްޕޯޓްސް" ބައްދަލުވުމުގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ބައިވެރިވެވަޑައިގެންފިއެވެ.

މިމަހުގެ 22 އިން 23 އަށް އުޒްބަކިސްތާންގެ ޓަޝްކެންޓްގައި އޮތް މި ބައްދަލުވުމުގައި އޭޝިއާ/އޯޝޭނިއާގެ 34 ގައުމެއްގެ ކުޅިވަރު ވަޒީރުންނާއި، ވަޒީރުންގެ ނައިބުންގެ އިތުރުން އެ ގައުމުތަކުގެ އެންޓި-ޑޯޕިން އޭޖެންސީތަކުގެ މަންދޫބުން ބައިވެރިވިއެވެ. މީގެ އިތުރުން ދުނިޔޭގެ އެންޓި-ޑޯޕިން ޖަމުއިއްޔާ (ވާޑާ) ގެ ރައީސް ވިޓޯލްޑް ބަންކާގެ އިތުރުން ވާޑާގެ ނައިބް ރައީސް އަދި ޑިރެކްޓަރ ޖެނެރަލްވެސް ވަނީ މި ބައްދަލުވުމުގައި ބައިވެރިވެވަޑައިގެންފައެވެ.

މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ކުޅިވަރުގެ ތެރެއިން މަނާ ބޭސް ބޭނުންކުރުން މަދުކުރުމާއި ހުއްޓުވުމަށް އެޅޭނެ ފިޔަވަޅުތަކާއި، ކަމާ ގުޅުންހުރި އިދާރާތަކުގެ މަޝްވަރާއާއެކު މިކަމާ ގުޅުންހުރި އުސޫލުތައް ވަރުގަދަކުރެވޭނެ ގޮތްތަކާ ގުޅޭގޮތުން ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.

މި ބައްދަލުވުމުގައި ރާފިޢު ވަނީ ރާއްޖޭގެ އެންޓި-ޑޯޕިން ޖަމިއްޔާ، މަޑާޑާގެ މަސައްކަތްތަަކާ ގުޅޭގޮތުން ބައިވެރިންނަށް މައުލޫމާތު ދެއްވާފައެވެ.