ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް) ގެ ރައީސްގެ މަގާމަށް ތިންވަނަ ދައުރަކަށް ކުރިމަތިލައްވަން އެ އެސޯސިއޭޝަނުގެ މިހާރުގެ ރައީސް އަލީ ރަޝީދު (އައްޔަ) ނިންމަވައިފިއެވެ.
2006 ވަނަ އަހަރު ޓީޓީ ކުޅުން ހުއްޓާލައި، ދެ އަހަރު ދުވަހު އެސޯސިއޭޝަންގެ އިދާރީ މަސައްކަތުގައި އުޅުމަށްފަހު، އައްޔަ ވަނީ 2008 ވަނަ އަހަރުން ފެށިގެން ޓީޓީގެ ނައިބު ރައީސްގެ މަގާމު އަދާކުރައްވާފައެވެ. އަދި އެންމެ ފުރަތަމަ ރައީސަކަށް އިންތިޚާބުވެވަޑައިގެންނެވީ ވާދަވެރިއަކު ނެތި 2016 ވަނަ އަހަރެވެ.
އޭގެ ފަހުން 2020 ވަނަ އަހަރު ބޭއްވި އިންތިޚާބުގައި އައްޔަ ވަނީ ދެވަނަ ދައުރަކަށް އިންތިޚާބުވެވަޑައިގެންފައެވެ. އެ ފަހަރުގެ އިންތިޚާބުގައި އައްޔައަށް 155 ވޯޓު ލިބިވަޑައިގެންނެވިއިރު، އައްޔައާ ވާދަކުރެއްވި ތޯހާ ސަލީމަށް ލިބިވަޑައިގެންނެވީ 80 ވޯޓެވެ. އަދި ޓީޓީ އެސޯސިއޭޝަނުގެ އެ ފަހަރުގެ ހިންގާ ކޮމިޓީއަށް ހޮވުވަޑައިގަތީ ހުސް އައްޔަގެ ޓީމުގައި ހިމެނުނު ބޭފުޅުންނެވެ.
ޓީޓީ އެސޯސިއޭޝަންގެ އިންތިޚާބު މި އަހަރުގެ އޯގަސްޓް މަސް ނިމުމުގެ ކުރިން ބާއްވަން ޖެހޭއިރު، އިތުރު ދައުރަކަށް ކުރިމަތިލައްވަން ނިންމާފައިވާކަން އައްޔަ ވަނީ ރާއްޖޭގެ މީޑިއާއަކަށް ކަށަވަރުކޮށްދެއްވާފައެވެ.
އައްޔަގެ ރައީސްކަމުގައި ޓީޓީން ވަނީ ބައިނަލްއަގުވާމީ މައިދާނުގައި ބޮޑެތި ކާމިޔާބީތަކެއް ހޯދާފައެވެ. އެގޮތުން ދާދި ފަހުން ޓޭބަލް ޓެނިސް ތަރި ފާތިމަތު ދީމާ އަލީ ވަނީ ދުނިޔޭގެ އެންމެ ޝަރަފުވެރި ކުޅިވަރު މުބާރާތް ކަމަށްވާ އޮލިމްޕިކްސްއަށް ކޮލިފައިވި ރާއްޖޭގެ ފުރަތަމަ އެތުލީޓުގެ ޝަރަފު ހޯދާފައެވެ.