އެތުލެޓިކްސް އެސޯސިއޭޝަން އޮފް މޯލްޑިވްސްގެ އިންތިޚާބުގައި މެންބަރުންގެ ސައްތައިން ސައްތަ ތާއީދާއެކު، އެ އެސޯސިއޭޝަނުގެ ރައީސްގެ މަގާމަށް މުސްޠަފާ މުޙައްމަދު (މުސްތޮ) އިންތިޚާބުވެވަޑައިގެންފިއެވެ.
މީރުމާ ހޮޓެލްގައި ހުކުރުދުވަހުގެ ރޭ ބޭއްވި އެ އެސޯސިއޭޝަނުގެ އަހަރީ އާންމު ޖަލްސާގައި އެކި މަގާމުތަކާއި، ހިންގާ ކޮމިޓީގެ މެންބަރުންގެ މެދުގައި ނެގީ ފެންނަ ނުފެންނަ ވޯޓެކެވެ. އެއީ އެ މަގާމުތަކަށް އިތުރު މީހަކު ކުރިމަތިލާފައި ނެތުމުންނެވެ.
އަހަރީ އާންމު ޖަލްސާއަށް 15 މެންބަރު ކުލަބު ހާޒިރުވިއެވެ. މަގާމުތަކަށް މެންބަރުން ހޮވުމަށް ނެގި ފެންނަ ނުފެންނަ ވޯޓުތަކުގައި ކޮންމެ މެމްބަރަކަށްވެސް ވަނީ ފެންނަ ކަމަށް 15 ވޯޓު ލިބިފައެވެ.
އެސޯސިއޭޝަނުގެ ނައިބު ރައީސްގެ މަގާމަށް ކުރިމަތިލެއްވީ އެ މަގާމު އެންމެ ފަހުންވެސް ފުރުއްވި އަޙްމަދު އަޒީލެވެ. އަޒީލް ވަނީ ކުރީގެ ރައީސް މުޙައްމަދު ޠަލާލް މަގާމުން އިސްތިއުފާދެއްވުމުން، މިދިޔަ ފަސް ވަރަކަށް މަސް ދުވަހު އެ އެސޯސިއޭޝަނުގެ ކަންކަން ހިންގުމުގައި އެންމެ އިސް ފަރާތެއްގެ ގޮތުގައި ހަރަކާތްތެރިވެފައެވެ.
އެތުލެޓިކްސް އެސޯސިއޭޝަނުގެ ހަޒާންދާރަކަށް ހޮވިވަޑައިގަތީ ހަސްނާއު ރަޝީދު ހުސައިނެވެ. އަދި އާންމު މެންބަރުންގެ ގޮތުގައި ހޮވިވަޑައިގަތީ މިހާރުވެސް އެ މަގާމު ފުރުއްވަމުން އަންނަ ހުސެއިން އަމީން އާއި، ކުރީގެ ދެ މެންބަރުން ކަމަށްވާ މުޙައްމަދު ޝާހިދު އަދި މުޙައްމަދު ޝުޖާއުއެވެ. މީގެ އިތުރުން އަންހެން މެންބަރަކަށް ހޮވިވަޑައިގަތީ ކުރީގެ އެއްވަނަ ދުވުންތެރިޔާ ޔަޒުނީ ނަޝީދާ (ޔަޒޫ) އެވެ.
މުސްޠަފާ އަކީ، އެތުލެޓިކްސްގެ ހިންގާ ކޮމިޓީގައި ދެ ދައުރެއް ފުރިހަމަކޮށްފައިވާ ބޭފުޅެކެވެ. ކުޅިވަރާ ބެހޭ ވުޒާރާގައި މީގެ ކުރިން ވަޒީފާ އަދާކުރެއްވި މުސްޠަފާ އަކީ، މި ފަހުން އެތުލެޓިކްސްގެ އިސް ފަރާތެއްގެ ގޮތުގައިވެސް މަސައްކަތްކުރެއްވި ހިންގާ ކޮމިޓީގެ މެންބަރެކެވެ. އަދި މޯލްޑިވްސް އޮލިމްޕިކް ކޮމިޓީ (އެމްއޯސީ) އިން އެންމެ ފަހުން ބޭއްވި އަހަރީ އާންމު ޖަލްސާގައި މުސްޠަފާ ބައިވެރިވެވަޑައިގެންނެވިއިރު، ބައިނަލްއަގުވާމީ ކުޅިވަރު މުބާރާތްތަކުގައިވެސް މުސްޠަފާ އާއި އެތުލީޓުންނާ އޮތީ ގާތް ގުޅުމެކެވެ.
އެތުލެޓިކްސް އެސޯސިއޭޝަންގެ ރައީސްކަން މިދިޔަ 12 ވަރަކަށް އަހަރު ފުރުއްވީ، މިހާރުގެ ކޮމިޝަނަރ އޮފް ސްޕޯޓްސް ޠަލާލެވެ. ކޮމިޝަނަރުގެ މަގާމަށް އައްޔަނުކުރެއްވުމާއެކު، ޠަލާލް ވަނީ އެތުލެޓިކްސް ރައީސްގެ މަގާމުން އިސްތިއުފާ ދެއްވާފައެވެ.