އިންޑިއާގެ އެހީގައި ކުރިއަށްގެންދާ މަޝްރޫއުތައް މެނޭޖުކުރުމުގެ ކޮންސަލްޓެންސީ އެއްބަސްވުމުގައި ސޮއިކޮށްފި

އިންޑިއާގެ އެހީގައި ކުރިއަށްގެންދާ ކުޅިވަރު މަޝްރޫއުތައް މެނޭޖުމަންޓް ކޮންސަލްޓެންސީ އެއްބަސްވުމުގައި ސޮއިކޮށްފިއެވެ.

އިންޑިއާގެ ލައިން އޮފް ކްރެޑިޓް (އެލްއޯސީ) ގެ ދަށުން ރާއްޖޭގެ އެކި ހިސާބުތަކުގައި ކުޅިވަރުގެ ގިނަ ވަސީލަތްތަކެއް ގާއިމުކުރުމުގެ ބޮޑު މަޝްރޫއެއް ކުރިއަށް އެބައޮތެވެ. އިންޑިއާގެ އެގްޒިމް ބޭންކުން ފޯރުކޮށްދޭ 40 މިލިޔަން ރުފިޔާގެ މި މަޝްރޫއަކީ 2021 ވަނަ އަހަރު ފަށަން ނިންމާފައި އޮތް ޕްރޮޖެކްޓެކެވެ. ނަމަވެސް ހުއްޓިފައި އޮތް މަސައްކަތް ފަށްޓަވައި މި މަޝްރޫއުގައި ހިމެނޭ ކުޅިވަރު ވަސީލަތްތައް ގާއިމުކުރުމުގެ މަސައްކަތް މި ސަރުކާރުން ވަނީ ފަށާފައެވެ.

އެގޮތުން މި މަޝްރޫއުގެ މެނޭޖުމަންޓް ކޮންސަލްޓެންސީ އެއްބަސްވުމުގައި ކޮލާޖް ޑިޒައިން ޕްރައިވެޓް ލިމިޓެޑާއިއެކުވަނީ ސޮއިކޮށްފައެވެ. މި އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ. އަދި ކޮލާޖް ޑިޒައިންގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ ޖޭޝީލް ކަމާލް ޕަޓޭލްއެވެ.

އިންޑިއާގެ އެލްއޯސީގެ ދަށުން ރާއްޖޭގެ ފަސް ސަރަހައްދެއްގައި ގިނަ ވަސީލަތްތައް ތަރައްގީކުރާނެއެވެ. އޭގެ ތެރޭގައި ޓްރެކް ދަނޑުތަކާއި، ފުޓްބޯޅަ ދަނޑުތައްވެސް ހިމެނެއެވެ.