ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގައި ހުރިހާ ޖަލްސާއަކަށް ވަޑައިގެންފައި ވަނީ ރައްޔިތުންގެ މަޖިލީހުގައި ތިއްބަވާ 85 މެމްބަރުންގެ ތެރެއިން 11 މެމްބަރުންކަމަށް މަޖިލީހުގެ ޙާޞިރީން ހާމަވެއްޖެއެވެ.
ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރު ފަށްޓަވާފައިވަނީ ފެބުރުއަރީމަހުގެ ހަތަރުވަނަ ދުވަހުއެވެ. މިދައުރުގައި 28 ޖަލްސާއެއް ބާއްވަވާފައިވެއެވެ. އޭގެ ތެރެއިން ހުރިހާ ޖަލްސާއަކަށް ވަޑައިގެންފައިވާ 11 މެމްބަރުންނަކީ،
1.މާފަންނު މެދު ޑާއިރާގެ މެމްބަރު އަސްމާ ރަޝީދު
2.ވިލިމާލެ ދާއިރާގެ މެމްބަރު އަޙްމަދު ނިހާން ޙުސައިން މަނިކު
3.ދިއްދޫ ދާއިރާގެ މެމްބަރު ޢަބްދުއްލަޠީފް މުޙައްމަދު
4.މަކުނުދޫ ދާއިރާގެ މެމްބަރުން އަނާރާ ނަޢީމް
5.އުނގޫފާރު ދާއިރާގެ މެމްބަރު ޖަޢުފަރު ދާޢޫދު
6.ދުވާފަރު ދާއިރާގެ މެމްބަރު މުޙައްމަދު ޢަލީ
7.ތުލުސްދޫ ދާއިރާގެ މެމްބަރު މުޙައްމަދު ވަޙީދު އިބްރާހީމް
8.މާވަށު ދާއިރާގެ މެމްބަރު އަޒްހާން ފަހުމީ
9.ގެމަނަފުށީ ދާއިރާގެ މެމްބަރު ޖަމީލް އުޘްމާން
10.ފުވައްމުލަކު އުތުރު ދާއިރާގެ މެމްބަރު ޢަލީ ޝާހް
11.ފުވައްމުލަކު ދެކުނު ދާއިރާގެ މެމްބަރު ޢަބްދުﷲ މަސީޙް މުޙައްމަދު
މިދައުރުގައި އެންމެ މަދުން ހާޞިރުވެވަޑައިގެންފައިވަނީ މީދޫ ދާއިރާގެ މެމްބަރު އަޙްމަދު ސިޔާމް މުޙައްމަދުއެވެ. އޭނާ ޙާޞިރުވެފައިވަނީ އެންމެ 6 ޖަލްސާއަށެވެ.
ފުރަތަމަ ދައުރުގައި މަޖިލީހުގެ އުފެއްދުންތެރިކަމުގެ ނިސްބަތަކީ 88.2 އިންސައްތައެވެ. 11.8 އިންސައްތަ މަސައްކަތް ނިމިފައެއްނުވެއެވެ. މިދައުރުގައި މަޖިލީހުގެ ތަޅުމުން 16 ބިލެއްގެ މަސައްކަތް ނިންމަފައިވާއިރު، 8 ބިލެއް މަޖިލީހުގެ ތަޅުމުގައި އެބައޮތެވެ. އެއް ޤަރާރު ހުށައަޅާ ގޮތެއް ނިންމަވާފައިވާއިރު، މެމްބަރުން ވަނީ 5 މައްސަލަ ހުށައަޅުއްވާފައެވެ. އެ ހުރިހާ މައްސަލަތަކަށް ގޮތެއް ނިންމަވާފައިވާއިރު، އެހެނިހެން މައްސަލަތަކާ ގުޅޭ 2 މައްސަލައަކަށް ގޮތެއް ނިންމަވާފައިވެއެވެ. އަދި މިނިސްޓަރުން މަޖިލީހަށް 13 ފަހަރަކު ހާޞިރުކުރައްވާ ސުވާލުކުރައްވާފައިވެއެވެ.
މަޖލީހުގެ ފުރަތަމަ ދައުރުގެ އެންމެފަހު ޖަލްސާ ބާއްވަވާފައިވަނީ އޭޕްރީލް މަހުގެ 20 ވަނަ ދުވަހުއެވެ. މަޖިލީހުގެ މެމްބަރުން މިހާރު ޗުއްޓީއަށް ވަޑައިގެންފައިވާއިރު، ދެން މަޖިލީހުގެ ޖަލްސާތައް ފެށޭނީ އަންނަ ޖޫންމަހުގެ ތެރޭގައެވެ.