ކުޅިވަރު އެސޯސިއޭޝަންތައް ވިޔަފާރި މޮޑެލްއަށް ބަދަލުކޮށް، މޯލްޑިވްސް އިންލެންޑް ރެވެނިއު އޮޓޯރިޓީ (މީރާ) ގައި ރިޖިސްޓަރީކުރެވޭނެ ގޮތަށް ކުޅިވަރު ގާނޫނަށް އިސްލާހު ހުށެހެޅުމުގެ ވިސްނުން ގެންގުޅުއްވާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ކުޅިވަރާ ބެހޭ ވުޒާރާއިން ކުރަމުންދާ މަސައްކަތްތަކުގެ ތަފްސީލު ހިއްސާކުރުމަށް ބޭއްވި ނޫސްވެރިން ބައްދަލުވުމުގައި ވާހަކަދައްކަވަމުން ރާފިޢު ވިދާޅުވީ ކުޅިވަރު އެސޯސިއޭޝަންތައް އަމިއްލަ ފައިމައްޗަށް ތެދުވެވޭނެ ގޮތްތަކެއް ހޯދައި ދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެއް ކަމަށެވެ.
އެހެންކަމުން ވިޔަފާރި އުސޫލުން ކަންކަން ތައާރަފުކޮށް، ކުޅިވަރު އެސޯސިއޭޝަންތަކަށް ބާރުދީ، ހިންގުމަކީ ވަރަށް ގިނަ ދުވަހު ދައްކަމުންދިޔަ ވާހަކައެއް ކަމަށާއި، ގާނޫނު އިސްލާހުކުރާއިރު، އެ ބާރުވެރިކަން ދިނުމަށް ވަރަށް ބޮޑު އިސްކަމެއް ދެއްވާނެ ކަމަށްވެސް ވިދާޅުވިއެވެ. ރާފިޢު ވިދާޅުވީ އިކޮނޮމިކަލީ ވަޔަބަލް މޮޑަލްތަކުން ކުޅިވަރު އެސޯސިއޭޝަންތަކާއި، ކުޅިވަރު މުއްސަސާތައް އަދި ކުލަބުތައް ހިންގުމަކީ އަމާޒެއް ކަމަށެވެ.
"އެއީ ރައީސުލްޖުމްހޫރިއްޔާގެ ވައުދުފުޅުގެ ތެރޭގައި ހިމެނޭ ކަމަކަށް ވުމާއެކު، އަޅުގަނޑުމެން ވަރަށް އިސްކަންދީގެން ކުރިއަށްގެންދާ ކަމެއް އެއީ، ވިޔަފާރީގެ އުސޫލުން ނޫނިއްޔާ މީރާގައި ރަޖިސްޓަރީކޮށްގެން އެސޯސިއޭޝަންތައް ހިންގޭނެ ގޮތް. އެ ބޭފުޅުންނަށްވެސް ވިޔާފަރިކޮށްގެން، ބަޖެޓަށް ލުއިކަމެއް ގެނެސްގެން ކުރެވޭނެ ގޮތެއް ހޯދުން.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ރާފިޢު ވިދާޅުވީ އެ މޮޑެލްއަށް ހިންގުމުގެ އެންމެ ބޮޑު ބޭނުމަކީ އެސޯސިއޭޝަންތަކުގެ ބަޖެޓަށް ލުއި ގޮތްތަކެއް ހޯދައިދިނުމެވެ. އަދި ކުލަބުތަކުގައި ތިބޭ ކުޅުންތެރިންނަށްވެސް މުސާރަ ލިބޭނެ ގޮތްތަކެއް އިންތިޒާމުވެގެން ދިއުން ކަމަށްވެސް ވަނީ ވިދާޅުވެފައެވެ.