ގައުމީ ކުޅިވަރު މަޖިލީހަކީ ހަރަކާތްތެރިކަމާއެކު ވަރަށް ބޮޑަށް އިދާރީ މަސައްކަތް ކުރާ ބައެއް ކަމަށާއި، މީޑިއާއަށް އެ ކަންކަން ހާމަނުވަނީ ކަމަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވިދާޅުވެއްޖެއެވެ.
ކުޅިވަރާ ބެހޭ ވުޒާރާއިން ކުރަމުންދާ މަސައްކަތްތަކުގެ ތަފްސީލު ހިއްސާކުރުމަށް ބޭއްވި ނޫސްވެރިން ބައްދަލުވުމުގައި ވާހަކަދައްކަވަމުން ޠަލާލް ވިދާޅުވީ ވަރަށް ފުޅާ ދާއިރާއެއްގައި ކުޅިވަރު ކައުންސިލުގެ މަސައްކަތް ކުރިއަށްދާ ކަމަށެވެ. އަދި ހަމަ އެހެންމެ ކުޅިވަރު އިދާރާ އާއި، ސްޕޯޓްސް ކޮމިޝަނަރުގެ އޮފީހާއި، ގައުމީ ކުޅިވަރު އެސޯސިއޭޝަންތައް ގުޅިގެން ވަރަށް ހަރަކާތްތެރިކޮށް ކައުންސިލުން މަސައްކަތް ކުރައްވާ ކަމަށްވެސް ވިދާޅުވިއެވެ.
"އަޅުގަނޑުމެންގެ ގާނޫނުގައި ހުންނަ ބައެއް ކަންތައްތަކާއި، އަދި އެސޯސިއޭޝަން އެފިލިއޭޓްވެފައި ހުންނަ އިންޓަރނޭޝަލް ފެޑެރޭޝަންތަކާއި، އެ ހުންނަ އުސޫލުތަކާއި، އަޅުގަނޑުމެންގެ ގާނޫނާ ތައާރުޒުވުމެއް ހުރި ނަމަވެސް ބައިނަލްއަގުވާމީ ޖަމުއިއްޔާތަކުން ބޮޑަށް ބާރުއަޅަނީ އެ ގައުމެއްގައި އޮންނަ ގާނޫނުތަކާއި ފުށޫނާރާ ގޮތަށް ކަންކަން ބައްޓަންކުރުން.މުޙައްމަދު ޠަލާލް - ކޮމިޝަނަރ އޮފް ސްޕޯޓްސް
ޠަލާލް ވިދާޅުވީ ބައެއް ފަހަރަށް ރާއްޖޭގެ އެސޯސިއޭޝަންތައް ގަބޫލުކުރެވެނީ ބައިނަލްއަގުވާމީ ޖަމިއްޔާއެއްގެ މެންބަރަކަށްވުމަށް ފަހު ރާއްޖޭގެ ގާނޫނާއި ގަވާއިދަށް ތަބާވާން ނުޖެހޭނެ ކަމަށެވެ. އެކަމަކު ކޮންމެ އެސޯސިއޭޝަނަކުން ފުރަތަމަ ތަބާވާން ޖެހޭނީ އެ ގައުމެއްގައި އޮންނަ ގާނޫނަށް ކަމަށްވެސް ވިދާޅުވިއެވެ.