އެކި ކުޅިވަރުތަކުގެ ގައުމީ ޓީމުތަކަށް މުސާރަ ދެމުން އަންނަނީ ވަކި އުސޫލެއްގެ ދަށުން ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ކުޅިވަރާ ބެހޭ ވުޒާރާއިން ކުރަމުންދާ މަސައްކަތްތަކުގެ ތަފްސީލު ހިއްސާކުރުމަށް ބޭއްވި ނޫސްވެރިން ބައްދަލުވުމުގައި ވާހަކަދައްކަވަމުން ރާފިޢު ވިދާޅުވީ ގައުމީ ޓީމުތަކަށް މުސާރަ ދޭ އުސޫލެއް ކުޅިވަރުގެ ގައުމީ މަޖިލީހުން އެކުލަވާލާފައިވާ ކަމަށާއި، އަމަލުކުރައްވާނީ އެ އުސޫލަށް ކަމަށެވެ. އަދި ގައުމީ ޓީމުތަކަށް މުސާރަ ދިނުމުގައި ކްރައިޓީރިއާތަކެއް ހުންނަ ކަމަށާއި، މުސާރާ ދެވޭނީ ކުޅުންތެރިން އެ ކްރައިޓީރިއާތަކަށް ފެތުމުން ކަމަށް ވަޒީރު ވިދާޅުވިއެވެ.
"ސުވާލަކީ އަޅުގަނޑުމެން ކްރައިޓީރިއާ ބަދަލު ކުރާނީތޯ. މިކަމުގެ މުހިންމުކަމުން އަޅުގަނޑުމެން ޑިސްކަސްކުރަން ޖެހޭ ކަމެއް މުވައްސަސާތަކާ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ކުޅިވަރާއި ހަށިހެޔޮކަމާ ބެހޭ ވުޒާރާގެ ސްޓޭޓް މިނިސްޓަރު މުޙައްމަދު ރިޔާޟް ވިދާޅުވީ ގައުމީ ޓީމުތަކުގެ ކުޅުންތެރިންގެ މުސާރައިގެ މައްސަލައަކީ އެ އިދާރާއިން ވަރަށް ކަންބޮޑުވާ ކަމެއް ކަމަށާއި، ޕޮލިސީ ލެވެލްގައި އެކަމާ ގުޅޭގޮތުން މަޝްވަރާތައް ކުރިއަށްދާ ކަމަށެވެ.
އެކި ކުޅިވަރުތަކުގެ ގައުމީ ޓީމުތަކަށް މުސާރާ ދެމުން އަންނައިރު، ފުޓްސަލް ގައުމީ ޓީމުގެ ކުޅުންތެރިންނަށް މުސާރަ ނުދޭ މައްސަލައިގައި ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ. ރިޔާޟް ވިދާޅުވީ ބައިނަލްއަގުވާމީ ގޮތުން ބެލި ނަމަވެސް ފުޓްސަލްގެ ބެލެނެވެރި ފަރާތަކީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ކަމަށާއި، އެހެންކަމުން ރެގިއުލޭޓް ކުރެވިގެން ފުޓްސަލްގެ ކަންކަން އަންނަން ޖެހޭނީ އެފްއޭއެމް މެދުވެރިކޮށް ކަމަށެވެ.
"ރަޖިސްޓްރޭޝަން އެހިސާބަށް ދެވުނީމަ އަޅުގަނޑުމެންނަށް ފުޓްސަލް ކޮންސިޑާ ކުރެވޭނެ. ދެން މިހާރު އަޅުގަނޑުމެންނަށް ކުރެވޭނީ ކޮންކަންތައްތަކެއްތޯ ބަލަމުން މި ދަނީ. ބަލާފައި މިނިސްޓްރީގެ ފަރާތުން އެފްއޭއެމްއާ ގުޅިގެން ކުރެވޭނެ ކަންތައްތައް ބަލަމުން އަޅުގަނޑުމެން މި ދަނީ.މުޙައްމަދު ރިޔާޟް - ސްޓޭޓް މިނިސްޓަރު
ގައުމީ ފުޓްސަލް ޓީމުން ވަނީ އެންމެ ފަހުން ދެ ފަަހަރުވެސް އޭޝިއަން ފުޓްސަލް ކަޕް ކޮލިފައިންގައި ކުޅެފައެވެ. އެ ދެ ފަަހަރުވެސް ކުޅެފައިވަނީ މުބާރާތަށް ޚާއްސަކޮށް ސްކޮޑެއް ނަގައިގެން، ޕްރެކްޓިސް ކުރުމަށްފަހުއެވެ. ޕްރެކްޓިސް ކުރުމުގައި ދިމާވާ އެންމެ ބޮޑު ދަތިކަމަކީ ފަރިތަކޮށްލާނެ އިންޑޯއެއް ނެތުމެވެ. އެއާއެކު މި ސަރުކާރުން ވަނީ ފުޓްސަލް އިންޑޯއެއް އެޅުމުގެ މަސައްކަތް ފަށާފައެވެ.