ރާއްޖޭގެ ކުޅިވަރުގެ ކުރިމަގަށް ބައިނަލްއަގުވާމީ ފެންވަރުގެ ކޯޗިން ކޯސްތަކެއް ރާއްޖޭގައި ހިންގުމަށް ހަމަޖެހިފައިވާ ކަމަށް ކުޅިވަރާއި ހަށިހޮޔަކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ރާއްޖޭގައި ކުޅިވަރު ކުޅޭ އެތުލީޓުންނާއި، ކޯޗުން އިތުރު ކުރިއެރުމާއެކު، ތަމްރީނު ހެދުމުގެ ފުރުސަތު ހޯދައިދިނުމަކީ ކުޅިވަރުގެ ދިގު ރާސްތާ ޕްލޭނުގައި ހިމެނޭ ކަމެކެވެ.
ކުޅިވަރާ ބެހޭ ވުޒާރާއިން ކުރަމުންދާ މަސައްކަތްތަކުގެ ތަފްސީލު ހިއްސާކުރުމަށް ބޭއްވި ނޫސްވެރިން ބައްދަލުވުމުގައި ވާހަކަދައްކަވަމުން ރާފިޢު ވިދާޅުވީ ކުޅިވަރު ކޯޗުން ތަމްރީނުވާން މިހާރު ބޮޑު ޚަރަދެއް ކުރާ ކަމަށާއި, އެހެންކަމުން ސަަރުކާރުން މިހާރުން މިހާރަށްވެސް ކުރަން ބޭނުންވާ އެއްކަމަކީ ކުޅިވަރު ކޯޗުންނަށް ރާއްޖޭގައި ތިބެ، ތަމްރީނު ހެދޭނެ ފުރުސަތު ފަހިކޮށްދިނުން ކަމަށެވެ.
ރާފިޢު ވިދާޅުވީ ކޯޗުން ތަމްރީނުކުރުމުގެ ޕްރޮގްރާމުތައް ހިންގުމުން އެކަމުގެ ފައިދާ ކުޅިވަރަށް އަދި އެސޯސިއޭޝަންތަކަށް ކުރާނެ ކަމަށެވެ.
"އަޅުގަނޑުމެންގެ ލޯންގް ޓާމް ޕްލޭންގެ ދަށުން އެންމެ ފުރަތަމަ އިރާދަކުރެއްވިއްޔާ މި އަހަރު ކުރަން ބޭނުންވާ އެއް ކަމަކީ ކޯޗުން ތަމްރީނުކުރުން. އެ ޕްރޮގްރާމަކީ ރާއްޖޭގައި ތިބެގެން، ޔޫއެސްގައި ތަމްރީނުވުން ކަހަލަ ހަމަ އެނގޭތޯ. މިސާލަކަށް އައިސީޕީ ޕްރޮގްރާމް, އެ ޕްރޮގްރާމުތައް ރާއްޖެ ގެންނަން އަޅުގަނޑުމެން މި އުޅެނީ.ޢަބްދުﷲ ރާފިޢު - ކުޅިވަރާއި ހަށިހޮޔަކަމާ ބެހޭ ވަޒީރު
މީގެ އިތުރުން ރާފިޢު ވަނީ ކޯޗުން ތަމްރީނުކުރުމަށް ދާދިފަހުން ޔުއެފާ ފައުންޑޭޝަނާއި، އިޓަލީގައި ހުންނަ ރާއްޖޭގެ ކޮންސިއުލޭޓްގެ އެހީގައި ފާފު އަތޮޅުގައި ހަފުތާއެއްގެ މުއްދަތަށް ޕްރޮގްރާމެއް ހިންގުނުކަން ފާހަގަކުރައްވާފައެވެ.
މި މަހުގެ ހަވަނަ ދުވަހު ފެށި މި ޕްރޮގްރާމަކީ އިޓަލީގެ ޔުނިވަރސިޓީ އޮފް މިލާނޯ ބިކޯކާ އާއި، އިޓަލީގެ މަޝްހޫރު ފުޓްބޯޅަ ކުލަބު އިންޓަރ މިލާން އަދި ޔުއެފާ ފައުންޑޭޝަން ފޯ ޗިލްރަންއާ ގުޅިގެން ކުރިއަށްގެންދާ ހަރަކާތެކެވެ. ފުޓްބޯޅައިގެ ހުނަރު ދަސްކޮށްދިނުމާއެކު ރާއްޖޭގެ ތިމާވެށި ރައްކާތެރިކުރުމާއި، މޫދުގެ ދިރުންތައް ހިމާޔާތްކުރުމާ ގުޅޭގޮތުން ކުރިއަށްގެންދިޔަ މި ޕްރޮގްރާމް ދެ އަހަރަށް ދެމިގެންދާނެއެވެ.
ވަޒީރު ވިދާޅުވީ މި ފަހަރު ޕްރޮގްރާމުގެ ކާމިޔާބީއަށް ބެލުމަށްފަހު ލިބުނު ތަރުހީބުގެ ބޮޑުކަމުން، ކޮންމެ ރަށަކުން ދެ ކޯޗުން ތަމްރީނުވުމަށް މީގެ ކުރިން އޮތް އަދަދު މިހާރު ހަތަރަކަށް އިތުރު ކޮށްފައިވާނެ ކަމަށެވެ.
"މި ޕްރޮގްރާމަކީ ދެ އަހަރު ދުވަހަށް ކަނޑައެޅިގެންދާ ޕްރޮގްރާމެއްވީމަ، އަޅުގަނޑުމެން ފުރަތަމަ ޕްރޮޕޯސް ކުރީ ކޮންމެ ރަށަކުން ދެ ކޯޗުން ތަމްރީނުކުރުމަށް.ޢަބްދުﷲ ރާފިޢު - ކުޅިވަރާއި ހަށިހޮޔަކަމާ ބެހޭ ވަޒީރު
ރާފިޢު ވިދާޅުވީ އުއްމީދަކީ އެ ޕްރޮގްރާމުގެ ތެރެއިން ދެ އަހަރުގެ ތެރޭގެ 200 ކުދިން ނެރުން ކަމަށާއި، އަދި އެކުދިން ވެގެންދާނީ ކުޅުމުގެ އިތުރުން ވަށައިގެންވާ ވެއްޓާމެދު ހޭއްލުންތެރިކަން ލިބިފައި ތިބި ކުދިންތަކެއް ކަމަށެވެ.