މުސްތަގުބަލުގައި ރާއްޖޭގައި ބައިނަލްއުގަވާމީ ފެންވަރުގެ ބީޗް ގޭމްސްއެއް ބޭއްވުމަކީ ވަރަށް ބޮޑު އުއްމީދެއް ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
މި ފަހުން ވަޒީރު ވަނީ ޑަބްލިއު ސްޕޯޓްސް އެކެޑަމީން އިންތިޒާމުކޮށްގެން ހދ. ކުޅުދުއްފުށި ސިޓީގައި ބާއްވާ ދެވަނަ ބީޗް ގޭމްސް ބައްލަވާލައްވައި، އެ ގޭމްސް ރަސްމީކޮށް ފެށުމުގެ ގޮތުން ބޭއްވި ޚާއްސަ ހަފުލާ ޝަރަފުވެރިކޮށްދެއްވާފައެވެ.
ކުޅިވަރާ ބެހޭ ވުޒާރާއިން ކުރަމުންދާ މަސައްކަތްތަކުގެ ތަފްސީލު ހިއްސާކުރުމަށް ބޭއްވި ނޫސްވެރިން ބައްދަލުވުމުގައި ވާހަކަދައްކަވަމުން ރާފިޢު ވިދާޅުވީ ރައީސް އޮފީހުގެ ވިޒިޓަރ އިކޮނޮމީ ކައުންސިލްގެ ކޮންސެޕްޓުގެ ތެރެއިން ރާއްޖޭގައި ސްޕޯޓްސް ޓޫރިޒަމް ކުރިއެރުވަމީ މި ސަރުކާރުގެ ވިސްނުމެއް ކަމަށެވެ. އެހެންކަމުން އެ ކައުންސިލުން ކުރިއަށްގެންދާ މަސައްކަތްތަކުގެ ތެރެއަށް ސްޕޯޓްސް ޓޫރިޒަމް ހިމެނުމަކީ މުހިންމު ކަމެއް ކަމަށްވެސް ވަނީ ވިދާޅުވެފައެވެ.
ދާދި ފަހުން ކުޅުއްދުފުށި ސިޓީގައި އަމިއްލަ ފަރާތަކުން ބޭއްވި ބީޗް ގޭމްސްއަށް އިޝާރާތްކުރައްވައި ވަޒީރު ވިދާޅުވީ ރާއްޖެއަކީ އެފަދަ ގޭމްސްތައް ބާއްވަން އެންމެ އެކަށީގެންވާ އެއް ގައުމު ކަމަށެވެ.
"އެކި ގައުމުތަކަށް ޒިޔާރަތްކޮށްގެން، މުބާރާތްތަކުގެ ގޮތުގައި ފާހަގަވާ ގޭމްސްތައް އެބަހުރި. ދުނިޔޭ އެކި ހިސާބުތަކުގައި އެކި ކުޅިވަރުތަކުން ބީޗް ގޭމްސް ބާއްވާ ކުލަބުތަކުންވެސް. އެކަހަލަ ކަންތައްތަކަކީ ދިވެހިރާއްޖެއާ ވަރަށް ބޮޑަށް އެޓްރެކްޓް ކުރެވޭނެ ކަމެއް.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ވަޒީރު ވިދާޅުވީ ބީޗުގައި ކުޅޭ ކުޅިވަރުތަކަކީ ރާއްޖެއަށް ވަރަށް މުހިންމު ކުޅިވަރުތަކެއް ކަމަށާއި، އަދި ރާއްޖޭއަކީ އެ ކުޅިވަރު ކުޅެން އެންމެ މުހިންމު އެއް ތަން ކަމަށެވެ. އަދި އަވައްޓެރި ގައުމެއްގައި އޮންނަ ކުޅިވަރު މުބާރާތެއްގެ ބީޗުގައި އޮންނަ ކުޅިވަރުތައް ރާއްޖޭގައި ބޭއްވިދާނެ ކަމަށާއި، އެއީ ކުރިމަގަށް ކުރާ އުއްމީދެއް ކަމަށްވެސް ވިދާޅުވިއެވެ.
"ބީޗް ގޭމްސް މޯލްޑިވްސްގެ ނަމުގައި އަޅުގަނޑުމެންނަށް އިންވިޓޭޝަނަލް މުބާރާތެއްވެސް ބޭއްވިދާނެ. އެހެން ގައުމުތަކަށް އިންވައިޓް ކޮށްގެން އެފަދަ މުބާރާތްތައް ރާއްޖޭގައި ބޭއްވިދާނެ ކަމަށް އަޅުގަނޑުމެންނަށް ފެނޭ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ވަޒީރު ވަނީ ރާއްޖޭގެ ޓޫރިޒަމަށް މިފަދަ މުބާރާތްތަކުން ކުރާނެ އަސަރު ބޮޑު ކަމަށާއި، އެ ގޮތަށް މުބާރާތް ބޭއްވިއްޖެ ނަމަ، އެއީ ދުނިޔޭގެ ސަމާލުކަން ލިބެގެންދާނެ ކަމެއް ކަމަށްވެސް ވިދާޅުވެފައެވެ.