ފަތުރުވެރިިކަމުގެ ސިނާއަތުން ލިބޭ އާމްދަނީ 5 އަހަރު ތެރޭގައި 6 ބިލިއަން ޑޮލަރަށް އަރާނެ: ފައިސަލް

2027 ވަނަ އަހަރު ނިމޭއިރު ފަތުރުވެރިކަމުގެ ސިނާއަތުން އެކަނިވެސް ދައުލަތުގެ ބަޖެޓަށް 6 ބިލިޔަން ޑޮލަރު ލިބިގެންދާނެ ކަމުގެ ވަރަށް ބޮޑު އުއްމީދެއް އެބައޮތް ކަމަށް ފަތުރުވެރިކަމާ ބެހޭ ވަޒީރު އިބްރާހިމް ފައިސަލް ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަފުޅު ދައްކަވަމުންނެވެ.

ފަތުރުވެރިކަމުގެ ސިނާއތު ކުރިއެރުވުމަ ކުރައްވަމުން ގެންދަވާ މަސައްކަތްތަކާ ގުޅޭގޮތުން ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވަޒީރު ފައިޞަލް ވިދާޅުވީ ރާއްޖޭގެ ފަތުރުވެރިކަން މުޅިން އެހެން ހަރުފަތަކަށް ގެންދިޔުމަށްޓަކައި ސަރުކާރުން މަސައްކަތް ކުރައްވާކަމަށެވެ. އެގޮތުން ހެލްތު، ސްޕޯޓްސް އަދި އެޑިއުކޭޝަނަލް ޓޫރިޒަމް ކުރިއަރުވަން ނިންމަވާފައިވާކަން ފާހަގަކުރެއްވިއެވެ. އަދި އައު އުފެއްދުންތައް އެ ދާއިރާއަށް ތައާރަފްކޮށް އެކަމުގެ ފީސިބިލިޓީ ހެދި ރާއްޖޭގެ އެކި ސަރަހައްދުތަކުގައި އެ މަޝްރޫއުތައް ކުރިޔަށް ގެންދާނެކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ މިހާތަނަށް އައިއިރު ދައުލަތުގެ ބަޖެޓަށް ފަތުރުވެރިކަމުގެ ދާއިރާއިން ލިބެނީ އަހަރެއްގެ މައްޗަށް 4.5 ބިލިޔަން ޑޮލަރު ކަމަށާއި އެ އަދަދު ކުރިޔަށް އޮތް 4 އަހަރުތެރޭ އިތުރުވެގެން ދާނެ ކަމަށެވެ. އެގޮތުން 2027 ނިމޭއިރު ދައުލަތުގެ ބަޖެޓަށް 6 ބިލިޔަން ޑޮލަރުގެ އާމްދަނީއެއް ހޯއްދަވައިދެއްވޭނެކަމުގެ ވަރަށް ބޮޑު އުންމީދެއް އޮތްކަން ވަޒީރު ފާހަގަކުރެއްވިއެވެ.

"އަޅުގަނޑުމެން މިހާރަށް ބަލާލާއިރު އާންމުކޮށް ޓޫރިޒަމް ސެކްޓަރުން ބަޖެޓަށް މި ކޮންޓްރިބިއުޓް ކުރަނީ 4.5 ބިލިޔަން ޑޮލަރު. އެހެންވީމާ އިރާދަކުރެއްވިއްޔާ އަޅުގަނޑުމެންނަށް ވަރަށް އުއްމީދު އެބައޮތް 2027 ނިމެންވާއިރު 6 ބިލިޔަނެއްހާ ޑޮލަރު ފަތުރުވެރިކަމުގެ ދާއިރާއިން ދައުލަތުގެ ބަޖެޓަށް ކޮންޓްރިބިއުޓް ކުރާނެ ކަމަށް." ފަތުރުވެރިކަމާ ބެހޭ ވަޒީރު އިބްރާހިމް ފައިޞަލް ވިދާޅުވިއެވެ.

ރާއްޖެއަށް މިއަހަރު 2 މިލިޔަން ފަތުރުވެރިން ގެނައުމަށް އަމާޒު ހިފާފައިވާއިރު މިހާތަނަށް ރާއްޖެއައި ފަތުރުވެރިންގެ އަދަދު ވަނީ 8 ލައްކައަށްވުރެ މައްޗަށް އަރާފައެވެ. ވަޒީރު ވިދާޅުވީ މިވަގުތަކީ ލޯ ސީޒަންކަމަށް ވުމުން މިވަގުތު ރާއްޖެ އަންނަ ފަތުރުވެރިން މަދުނަމަވެސް އެމްއެމްޕީއާރުސީއާއި ގުޅިގެން މާކެޓިންގެ ވަރަށް ބޮޑު މަސައްކަތްތަކެއް ކުރަމުންދާ ކަމަށެވެ. އެގޮތުން ދާދި ފަހުން ދުބާއީގައި އޮތް އަރަބިއަން ޓްރެވެލް މާކެޓުގައި ރާއްޖެއިން ބައިވެރިވެ ރަނގަޅުކުރަންޖެހޭ ކަންތައްތައް ބަލައި ފަތުރުވެރިކަން އިތުރަށް ކުރިއަރުވަން ކުރަންޖެހޭ ކަންތައް ބަލައި އެކަންކަން ދެނެގަނެވިފައިވާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ މިއަހަރު ރާއްޖެއަށް 2 މިލިޔަން ފަތުރވެރިން ގެނައުމަށް އަމާޒުހިފިނަމަވެސް މި 5 އަހަރުގެ ތެރޭ އަހަރަކު ރާއްޖެއަށް ޒިޔާރަތްކުރާ ފަތުރުވެރިންގެ އަދަދު 4 މިލިޔަނާ ގާތަށް ދާނެކަމަށް އުންމީދުކުރާއްވާކަމަށެވެ. ޚާއްސަގޮތެއްގައި ވެލާނާ އިންޓަރނޭޝަނަލް އެއަރޕޯޓުގެ މަސައްކަތް ނިންމާ އައު ޓަމިނަލް ބޭނުންކުރަން ފަށައި އިތުރު ރިސޯޓްތައް ހުޅުވުމާއެކު ރާއްޖެ އަންނަ ފަތުރުވެރިންގެ އަދަދު އިތުރުވާނެކަން ފާހަގަކުރެއްވިއެވެ.

"މި 5 އަހަރުގެ ތެރޭގައި 3 މިލިޔަނާއި 4 މިލިޔަނާ ދެމެދުގެ އަދަދަކަށް ފަތުރުވެރިން ޒިޔާރާތް ކުރާ މިންގަނޑު ހާޞިލް ކުރެވިދާނެ. ރައީސް ބޭނުންވާ ފަދައިން ފަތުރުވެރިކަމުގެ އިތުރު ޕްރޮޑަކްޓްތައް އިންޓްރޮޑިއުސް ކުރެވި އިތުރު ފޮރިން އިންވެސްޓްމަންޓްތަކެއް ގެނެސް ބޮޑު ކާމިޔާބީއެއް ހޯދޭނެ. ވަރަށް ބްރައިޓްކޮށް ފިއުޗަރ ފެންނަނީ." ފަތުރުވެރިކަމާ ބެހޭ ވަޒީރު އިބްރާހިމް ފައިޞަލް ވިދާޅުވިއެވެ.

ޓޫރިޒަމް މިނިސްޓްރީން އާންމުކުރާ ތަފާސް ހިސާބުތައް ދައްކާގޮތުން ނިމިދިޔަ 2 އަހަރާއި އަޅާބަލާއިރުވެސް މިއަހަރު ރާއްޖެ ޒިޔާރަތްކުރާ ފަތުރުވެރިންގެ އަދަދު ދަނީ އިތުރުވަމުންނެވެ. ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިހާރު އެވްރެޖްކޮށް ދުވާލެއްގެ މައްޗަށް ރާއްޖެއަށް 6338 ފަތުރުވެރިން ޒިޔާރަތްކުރެއެވެ.

ރާއްޖެ އަންނަ ފަތުރުވެރިންގެ އަދަދު އިތުރުވަމުން އަންނައިރު ރާއްޖެއިން ދަނީ ފަތުރުވެރިކަމުގެ ދާއިރާއިން ގިނަ އެވޯޑްތަކެއް ހޯދަމުންނެވެ. އެގޮތުން އެންމެ ފަހުން ބޭއްވި ވޯލްޑް ޓްރެވަލް އެވޯޑްސް އިންޑިއަން އޯޝަންސް ކެޓަގަރީގައި ރާއްޖެއިން ވަނީ ޝަރަފުވެރި 4 ކެޓަގަރީ އަކުން އެވޯޑް ޙާސިލްކޮށްފައެވެ.