މިހާރު ކަނޑައަޅާފައިވާ ތާރީޚުގައި ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ގެ އިންތިޚާބު ނުބާއްވައިފިނަމަ ފިޔަވަޅުއަޅާނެ ކަމަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވިދާޅުވެއްޖެއެވެ.
ބެޑްމިންޓަން އެސޯސިއޭޝަނުން މިދިޔަ މާޗު މަހުގެ 22 ވަނަ ދުވަހުގެރޭ އައްޑޫ ސިޓީގައި އިންތިޚާބެއް ބާއްވަން އެންމެ ފުރަތަމަ މަސައްކަތްކުރި ނަމަވެސް، އެ އިންތިޚާބު ފަސްކުރަން ޖެހުނީ އެންޓި ކޮރަޕްޝަން ކޮމިޝަން (އޭސީސީ) ގެ އެންގުމަކާއެކުއެވެ. އަދި އޭގެ ކުރިން އެ އިންތިޚާބުގެ ކަންކަން މަޑުޖައްސާލަން ސްޕޯޓްސް ކޮމިޝަނަރު ޠަލާލްވެސް ވަނީ ދެ ފަހަރެއްގެ މަތިން އަންގަވާފައެވެ.
އެކަމަކު އޭގެ ފަހުން މި މަހުގެ ކުރީކޮޅު ސްޕޯޓްސް ކޮމިޝަނަރު ވަނީ ބެޑްމިންޓަން އެސޯސިއޭޝަނަށް 20 ދުވަހުގެ ތެރޭގައި ވަކި އުސޫލެއްގެ ތެރެއިން އިންތިޚާބުގެ ކަންކަން ކުރިއަށްގެންދިޔުމަށް ފުރުސަތުދީފައެވެ. އެއީ އިންތިޚާބުގައި ވޯޓުލުމުގެ ފުރުސަތު ބެޑްމިންޓަން ޑިވެލޮޕްމަންޓް ކޮމިޓީ (ބީޑީސީ) ތަކަށް ނުދޭ ގޮތަށެެވެ. އަދި ބީޑީސީތަކަށް އިންތިޚާބުގެ ވޯޓުގައި ބައިވެރިވެވޭނީ، އެ ކޮމިޓީތައް ސްޕޯޓްސް ކޮމިޝަނުގައި ރަޖިސްޓްރީކޮށްގެން ކަންވެސް ވަނީ އަންގާފައެވެ.
ބެޑްމިންޓަން އެސޯސިއޭޝަނުގެ އިންތިޚާބާ ގުޅޭގޮތުން "ޕީއެސްއެމް ސްޕޯޓްސް" އިން ސުވާލުކުރުމުން ޠަލާލް ވިދާޅުވީ ކޮންމެ އެސޯސިއޭޝަނަކުންވެސް ތަބާވާން ޖެހޭނީ ގާނޫނާ ގަވާއިދަށް ކަމަށެވެ. އަދި ބެޑްމިންޓަން އެސޯސިއޭޝަނުގެ އިންތިޚާބުގެ ކަންކަން ކުރިއަށްދާ ކަމަށް އެ އެސޯސިއޭޝަނުން ބުނި ނަމަވެސް، އިންތިޚާބާ ގުޅިގެން ކުރަމުންދާ ކަމެއް އަދި އިންތިޚާބުގެ މާ ބޮޑު ތަފުސީލެއްވެސް ހިއްސާކޮށްފައި ނުވާ ކަމަށްވެސް ޠަލާލް ވިދާޅުވިއެވެ.
"މީގައި ކޮންމެ ބަޔަކު ކަންކުރިޔަސް ކަންކަން ކުރަންވާނީ ރާއްޖޭގައި ހެދިފައިހުރި ގާނޫނުތަކާ ގަވާއިދުތަކަށް ބަލައިގެން. ވަރަށް ސާފުކޮށް މި ދަންނަވަނީ އަޅުގަނޑުމެން ފިޔަވަޅުއަޅަން ފަސްނުޖެހޭނަން. އިންތިޚާބު ނުބާއްވައިފިއްޔާ ފިޔަވަޅުއަޅާނަން.މުޙައްމަދު ޠަލާލް - ކޮމިޝަނަރ އޮފް ސްޕޯޓްސް
ބެޑްމިންޓަން އެސޯސިއޭޝަނުގެ އިންތިޚާބު ބާއްވަން ދިން 20 ދުވަހުގެ މުއްދަތު ހަމަވާނީ މި މަހުގެ 18 ވަނަ ދުވަހެވެ. މައުލޫމާތު ލިބިފައިވާ ގޮތުގައި ބެޑްމިންޓަން ވޯލްޑް ފެޑެރޭޝަންގެ އިރުޝާދުގެ ދަށުން ބެޑްމިންޓަން އެސޯސިއެޝަނުން އަންނީ އިންތިޚާބުގެ ކަންކަން އިންތިޒާމުކުރަމުންނެވެ.