ދެކުނު އޭޝިއާ ސަރަހައްދުގެ އޮލިމްޕިކްސް ކޮލިފިކޭޝަނުގެ ދެވަނަ ބުރުން ރާއްޖޭގެ ޓޭބަލް ޓެނިސް ތަރި ފާތިމަތު ދީމާ އަލީ ޖާގަ ހޯދައިފިއެވެ.
ނޭޕާލުގައި މިހާރު ކުރިއަށްދާ ދެކުނު އޭޝިއާގެ ކޮލިފިކޭޝަނުގައި ދީމާ ވަނީ ގްރޫޕް ސްޓޭޖުގައި ކުޅުނު ދެ މެޗުވެސް ކާމިޔާބުކޮށް، ގްރޫޕުގެ އެއްވަނަ ހޯދާފައެވެ. އެގޮތުން ފުރަތަމަ މެޗުގައި ޕާކިސްތާނުގެ ހޫރް ފަވާދުގެ މައްޗަށް ދީމާ ކުރިހޯދީ ސީދާ ހަތަރު ސެޓުންނެވެ. މި މެޗުގެ ސެޓުތައް ދީމާ ގެންދިޔައީ 11-6, 11-8, 15-13 އަދި 13-11 އިންނެވެ.
އަދި ދެވަނަ މެޗުގައި ދީމާ ވަނީ ސްރީ ލަންކާގެ ބަންދާރާ ބިމަންދީ އަތުން 4-3 ސެޓުން މޮޅުވެފައެވެ. މި މެޗުގެ ފުރަތަމަ ސެޓު 12-10 އިން ދީމާ ގެންދިޔަ ނަމަވެސް، ދެވަނަ ސެޓު 12-10 އިން ކާމިޔާބުކުރީ ބަންދާރާއެވެ. މެޗުގެ ތިންވަނަ ސެޓު 11-4 އިން ދީމާ ގެންދިޔަ ނަމަވެސް، ޖެހިގެން އައި ސެޓު ބަންދާރާ ވަނީ 11-6 އިން ގެންގޮސްފައެވެ. ވާދަވެރި ކުޅުމެއް ފެނިގެންދިޔަ މި މެޗުގެ ފަސްވަނަ ސެޓު 11-9 އިން ދީމާ ކާމިޔާބުކުރި ނަމަވެސް، ހަވަނަ ސެޓު 11-6 އިން ގެންދިޔައީ ބަންދާރާއެވެ. އެކަމަކު މި މެޗުން ދީމާ މޮޅުވީ ހަތްވަނަ ސެޓު 11-9 އިން ކާމިޔާބުކޮށްގެންނެވެ.
މި ނަތީޖާތަކާއެކު ކޮލިފިކޭޝަންގެ ދެވަނަ ބުރަށް ދީމާ ދަތުރުކުރިއިރު، މި ކޮލިފިކޭޝަނުން އޮލިމްޕިކްސްއަށް ކޮލިފައިވާނީ އެންމެ ކުޅުންތެރިއެކެވެ. ދީމާގެ އިތުރުން ކޮލިފައިންގައި ރާއްޖެއިން ވާދަކުރަނީ މިޝްކާ މުޙައްމަދު އިބްރާހީމާއި، މޫސާ މުންސިފް އަޙްމަދު އަދި އަޚްޔަރު އަޙްމަދު ޚާލިދެވެ.
ކޮލިފައިންގައި މިޝްކާ މިއަދު ދެ މެޗު ކުޅުނުއިރު, ފުރަތަމަ މެޗުން ވަނީ ސީދާ ހަތަރު ސެޓުން ބަންގްލަދޭޝްގެ ސޮނާ ސަނަމް ބަލިކޮށްފައެވެ. އެކަމަކު ދެވަނަ މެޗުން މިޝްކާ ވަނީ ޕާކިސްތާނުގެ ޕާނިޔާ ޚާން އަތުން 4-1 ސެޓުން ބަލިވެފައެވެ. ކޮލިފިކޭޝަނުގައި މިޝްކާއަށް ބާކީ އެއް މެޗު އޮތްއިރު، އެމެޗުގައި މިޝްކާ ނުކުންނާނީ ނޭޕާލްގެ ޝްރިޝްތަ ނަބިތާއާ ދެކޮޅަށެވެ.
މީގެ އިތުރުން ކޮލިފައިންފައި ރާއްޖޭގެ މުންސިފާއި އަޚްޔަރުވެސް މިއަދު ވަނީ ދެ މެޗު ކުޅެފައެވެ. އެގޮތުން މުންސިފްގެ ފުރަތަމަ މެޗުގައި ނޭޕާލްގެ ކަޕާލީ ސަންޔޮންގް އަތުން 3-4 ސެޓުން މޮޅުވި ނަމަވެސް، ދެވަނަ މެޗުން ވަނީ ލަންކާގެ ޗަމީރާ އަތުން 4-3 ސެޓުން ބަލިވެފައެވެ. އަދި ކޮލިފައިން ފަހު މެޗުގައި މުންސިފް ނުކުންނާނީ ބަންގްލަދޭޝްގެ މުހުތަސިން އަޙްމަދު ރިޑޯއިއާ ދެކޮޅަށެވެ.
އަދި ކޮލިފައިންގެ ރާއްޖޭގެ އަޚްޔަރު މިއަދު ކުޅުނު ދެ މެޗުންވެސް ވަނީ ބަލިވެފައެވެ. އެގޮތުން ފުރަތަމަ މެޗުގައި ނޭޕާލުގެ ސަންޓޫ ޝްރެސްތާ އަތުން 4-1 ސެޓުން ބަލިވިއިރު، ދެވަނަ މެޗުގައި ވަނީ ލަންކާގެ ޖަޔަސަންކަ ޑެ ސިލްވާ އަތުން 4-2 ސެޓުން ބަލިވެފައެވެ. ކޮލިފައިން ފަހު މެޗުގައި އަޚްޔަރު ނުކުންނާނީ ބަންގްލަދޭޝްގެ ރަމްހިމިލިއަން ބޯމްއާ ދެކޮޅަށެވެ.