"ޕްލެއިން ވިތު ކޮރަލްސް" ގެ ނަމުގައި ޙާއްސަ ޕްރޮގްރާމެއް

ކުޑަކުދިންނަށް ޚާއްސަ ފުޓްބޯޅަ ހަރަކާތެއްގެ ތެރެއިން މޫސުމާއި ކަނޑުފަޅުގެ ތިމާވެއްޓަށް ހޭލުންތެރިކަން އިތުރުކުރުމަށް "ޕްލެއިން ވިތު ކޮރަލްސް 2024" ގެ ނަމުގައި ޙާއްސަ ޕްރޮގްރާމެއް ފަށައިފިއެވެ.

މި މަހުގެ ހަވަނަ ދުވަހު ފެށި މި ޕްރޮގްރާމަކީ އިޓަލީގެ ޔުނިވަރސިޓީ އޮފް މިލާނޯ ބިކޯކާ އާއި، އިޓަލީގެ މަޝްހޫރު ފުޓްބޯޅަ ކުލަބު އިންޓަރ މިލާން އަދި ޔުއެފާ ފައުންޑޭޝަން ފޯ ޗިލްރަންއާ ގުޅިގެން ކުރިއަށްގެންދާ ހަރަކާތެކެވެ.

ފ. އަތޮޅުގެ ރަށްތަކަށް އަމާޒުކޮށްގެން ހިންގާ މި ޕްރޮގްރާމް ކާމިޔާބުކަމާއެކު ކުރިއަށްގެންދިޔުމުގައި ކުޅިވަރާއި ހަށިހެޔޮކަމާ ބެހޭ ވުޒާރާ އާއި، ތަޢުލީމާ ބެހޭ ވުޒާރާގެ އިތުރުން ފ. އަތޮޅު ކައުންސިލް އަދި އެ އަތޮޅުގެ ރަށްތަކުގެ ސްކޫލުތަކުންވެސް އަންނަނީ މުހިންމު ދައުރެއް އަދާކުރަމުންނެވެ.

މި ޕްރޮގްރާމާ ގުޅޭގޮތުން މައުލޫމާތު ހިއްސާކުރުމަށް ހ. ބޯޅަގޭގައި މިއަދު ބޭއްވި ޚާއްސަ ނޫސްވެރިންގެ ބައްދަލުވުމެއްގައި ވާހަކަދައްކަވަމުން ކުޅިވަރާއި ހަށިހެޔޮކަމާ ބެހޭ ވުޒާރާގެ ވަޒީރު ޢަބްދުﷲ ރާފިޢު ވިދާޅުވީ ފުޓްބޯޅައިގެ ހުނަރު ދަސްކޮށްދިނުމާއެކު ރާއްޖޭގެ ތިމާވެށި ރައްކާތެރިކުރުމާއި، މޫދުގެ ދިރުންތައް ހިމާޔާތްކުރުމާ ގުޅޭގޮތުން ކުރިއަށްގެންދިޔަ މި ޕްރޮގްރާމް ދެ އަހަރަށް ދެމިގެންދާނެ ކަމަށެވެ.

"ޕްލެއިން ވިތު ކޮރަލްސް" ޕްރޮގްރާމުގެ ތެރެއިން ކަނޑުފަޅާއި، އެ ތަންތަނުގެ ދިރުންތައް ހިމާޔަތްކޮށް، ދިރުވައި އާލާކުރުމާ ގުޅޭ ހޭލުންތެރިކަން އިތުރުކޮށް، އެ ކަންކަމާ ގުޅޭ ހުނަރުތައް ދަސްކޮށްދެވޭނެއެވެ. އަދި މީގެ އިތުރުން ފުޓްބޯޅައިގެ ހުނަރުތަކާއެކު ކުޅިވަރުގެ ތެރެއިން ފަރުދީ އަދި އިޖުތިމާއީ ހުނަރުތައް ދަސްކޮށްދިނުންވެސް ހިމެނެއެވެ.

ރާފިޢު ވިދާޅުވީ ދެ އަހަރުގެ ތެރޭގައި 8000 މުރަކަ އިންދައި، އެ އާލާކުރުމަށް މި ޕްރޮގްރާމުގެ ބައިވެރިން ތަމްރީނުކުރެވޭނެ ކަމަށެވެ. އަދި މިއީ ރާއްޖެއަށް މުހިންމު ޕްރޮގްރާމެއް ކަމަށާއި، ރާއްޖޭގެ ފަރުތަކަށް އަންނަ ބަދަލުތައް ދެނެގަނެ، އެ ކަމަށް މަސައްކަތްކުރުމަށް ބޮޑު އެހީތެރިކަމެއް ލިބޭނެ ކަމަށްވެސް ވަޒީރު ވިދާޅުވިއެވެ. އަދި ރާއްޖޭ ކަހަލަ ޖަޒީރާ ގައުމަކަށް މި ޕްރޮގްރާމުގެ ސަބަބުން ބޮޑު ފައިދާތަކެއް ކުރާނެކަން ރާފިޢު ފާހަގަކުރެއްވިއެވެ.

މިދިޔަ ހަފުތާގައި ފެށި ޕްރޮގްރާމުގެ ފުރަތަމަ ބައިގައި ތަމްރީންކުރީ ފ. އަތޮޅުގެ އެކި ރަށްތަކުން ޓްރެއިނަރުންނެވެ. އަދި ކޮންމެ ރަށަކުން 40 ކުދިން ހިމެނޭހެން 200 ކުދިން މި ޕްރޮގްރާމުގެ ތެރޭގައި ތަމްރީނުކުރެވޭނެއެވެ.