އިސްލާމިކް ޔިނިވާސިޓީގެ ލައިބްރަރީ ހުޅުއްވާ ވެބް ލޯންޗުކޮށްފި

ދިވެހިރާއްޖޭގެ އިސްލާމީ ޔުނިވަރސިޓީގެ ކުތުބުޚާނާގައި، ތަރައްޤީކުރައްވައި ޒަމާނީ ވަޞީލަތްތައް ޤާއިމްކުރެއްވުމަށްފަހު އަލުން ހުޅުއްވައި، އެޔުނިވަރސިޓީގެ ވެބްސައިޓް އިފްތިތާޙުކުރައްވައިފިއެވެ. މިއަދު މެންދުރުފަހު އިސްލާމިކް ޔުނިވަރސިޓިގައި ބޭއްވެވި ރަސްމިއްޔާތެއްގައި ކުތުބުޚާނާ ހުއްޅުއްވައިދެއްވައި، އައު ވެބްސައިޓް ލޯންޗުކޮށްދެއްވީ މާލީ ވަޒީރު ޢަބްދުﷲ ޖިހާދާއި ތަޢުލީމާބެހޭ ވަޒީރު ޑރ.ޢާއިޝަތު ޝިހާމެވެ. img:http://s3.psmnews.mv/images/660x400/14624564445306.jpg|އިސްލާމިކް ޔުނިވަރސިޓީގެ ލައިބްރަރީ ހުޅުވުން - ފޮޓޯ: ޕިއެސްއެމް

އިސްލާމީ ޔުނިވާސިޓީގައި ކުރިން ހުރި ކުތުބުޚާނާ ޔުނިވަރސިޓީއެއްގެ ބޭނުމަށް އެކަށީގެންވާ ފެންވަރަށް ތަރައްޤީކުރެއްވީ ދިވެހިސަރުކާރުގެ ޚަރަދުގައި އަދި މެލޭޝިޔާގެ އިސްލާމިކް ޔުނިވަރސިޓީގެ އެހީތެރިކަމާއެކުއެވެ. މިތަނަށް ގެންނެވި މައިގަނޑު ބަދަލުތަކުގެ ތެރޭގައި، ޖާގަ އިތުރުކުރެއްވުމާއި މަތީތަޢުލީމް ޙާޞިލްކުރަމުން އަންނަ ދަރިވަރުންނަށް ރިސާރޗް ކުރެވޭނެ އިންތިޒާމް ހަމަޖެއްސެވުމާއި އަދި ޒަމާނީ، ޢިލްމީ މަސައްކަތްތަކަށް ބޭނުންވާ ވަޞީލަތްތައް ޤާއިމްކުރައްވައި މިފަދަ ތަނެއްގެ ލައިބްރަރީއެއްގައި ހުންނަފަދަ މާޙައުލެއް ޤާއިމްކުރެއްވުމެވެ. އަދި އެޔުނިވާސިޓީގެ ވެބްސައިޓްވެސް ފަރުމާކުރައްވާފައިވަނީ ދަރިވަރުންނަށް ބޭނުންވާ ގިނަ މަޢުލޫމާތު، ޔުނިވަރސިޓީން ބޭރުގައި ހޭދަކުރާއިރުވެސް މި ވެބްސައިޓް މެދުވެރިކޮށް ފަސޭހައިން ލިބޭނެ ގޮތަކަށެވެ.

ދިވެހިރާއްޖޭގެ އިސްލާމިކް އެޔުނިވަރސިޓީގެ ކުތުބުޚާނާ ރަސްމީގޮތުން ހުޅުއްވައިދެއްވީ ތަޢުލީމާބެހޭ ވަޒީރު ޑރ. ޢާއިޝަތު ޝިހާމްއެވެ. އަދި ވެބްސައިޓް އިފްތިތާޙުކޮށްދެއްވީ މާލީ ވަޒީރު ޢަބްދުﷲ ޖިހާދުއެވެ. މި ރަސްމިއްޔާތުގައި މާލީވަޒީރު ޢަބްދުﷲ ޖިހާދު ދެއްކެވި ވާހަކަފުޅުގައި، ޒަމާނީ ވަޞީލަތްތަކާއެކު މިފަދަ ކުތުބުޚާނާއެއް ޤާއިމްކުރެއްވުމަކީ ރައީސުލްޖުމްހޫރިއްޔާ ޢަބްދުﷲ ޔާމީން ތަޢުލީމަށް ދެއްވާ އަހަމިއްޔަތު ދޭހަކޮށްދޭ ކަމެއްކަމަށާއި، ވިހާވެސް އަވަސް ދުވެލީގައި ތަޢުލީމީ ދާއިރާ ކުރިއެރުވުމަށް ރައީސް އިސްކަންދެއްވާ ކަމަށް ވިދާޅުވިއެވެ. img:http://s2.psmnews.mv/images/660x400/14624566550959.jpg|އިސްލާމިކް ޔުނިވަރސިޓީގެ ލައިބްރަރީ ހުޅުވުމުގެ ރަސްމިއްޔާތުގެ ތެރެއިން ފިނޭންސް މިނިސްޓަރ ޢަބްދުﷲ ޖިހާދު - ފޮޓޯ: ޕިއެސްއެމް

މިޒަމާނަކީ ޓެކްނޮލޮޖީގެ އެހީގައި ކިޔަވާ ޒަމާނެއް ކަމަށާއި އެފަދަ ގޮތަކަށް އިސްލާމިކް ޔުނިވަރސިޓީން ވެސް ކިޔެވޭނެ އިންތިޒާމްތައް ހަމަޖައްސަންޖެހޭ ކަމަށް ވިދާޅުވެ، މި ކުތުބުޚާނާގެ ސަބަބުން ޓީޗަރުންނާއި ދަރިވަރުންގެ ދެމެދު އޮންނަ ގުޅުން ގާތްވެ، ޔުނިވަރސިޓީއާއި ދަރިވަރާ އޮންނަ ގުޅުންވެސް ހަރުދަނާވެގެން ދާނެކަމަށް ވިދާޅުވިއެވެ. ދާދި ފަހުން ރައީސުލްޖުމްހޫރިއްޔާ ޤާއިމްކުރެއްވި އިސްލާމިކް ފައިނޭންސް ސެންޓަރުގެ ބޭނުމަކީ އިސްލާމިކް ފައިނޭސް ރައްޔިތުންނަށް ފޯރުކޮށްދެއްވުން ކަމަށްވާއިރު މިދާއިރާއިން ތަޢުލމް ޙާޞިލްކުރައްވިގެން ތިއްބެވި ބޭފުޅުން ރާއްޖޭގައި މަދުކަން ފިނޭންސް މިނިސްޓަރ ފާހަގަކުރެއްވިއެވެ.  އެހެންކަމުން އެދާއިރާއިން ދިވެހިން ތަމްރީންކުރެއްވަން އިސްކަންދެއްވާނެ އުއްމީދުކުރައްވާކަމުގައި ވިދާޅުވިއެވެ. މިރަސްމިއްޔާތުގައި އިސްލާމީ ޔުނިވަރސިޓީގެ ޗާންސެލަރ ޑރ. މުޙައްމަދު ޒާހިރު ޙުސައިން ދެއްކެވި ވާހަކާގައި، ކުތުބުޚާނާއަކީ ޔުނިވަރސީޓީގެ އެންމެ މުހިންމު ރުކުންކަމަށް ވިދާޅުވިއެވެ. އަދި އެއީ ޤައުމުގެ ކުރިއެރުމަށް މުހިންމު ކަމެއްކަމަށާއި، ރާއްޖޭގައި ކުތުބުޚާނާތަކަށް ޤަދަރުކުރެވި އެތަންތަނާމެދު ދެކޭގޮތް ބަދަލުކުރަންޖެހޭ ކަމަށް ޗާންސެލަރ ވިދާޅުވިއެވެ. އަދި ހުރިހާ އިންސްޓިޓިއުޓްތައް ގުޅިގެން ދަރިވަރުން ގިނައިން ފޮތްކިއުމަށް ބާރުއަޅަންޖެހޭ ކަމަށް ވިދާޅުވިއެވެ. img:http://s1.psmnews.mv/images/660x400/14624565467335.jpg|އިސްލާމިކް ޔުނިވަރސިޓީގެ ޗާންސެލަރ ޑރ. މުޙައްމަދު ޒާހިރު ޙުސައިން - ފޮޓޯ: ޕިއެސްއެމް

ޔުނިވަރސިޓީގެ ވައިސް ޗާންސެލަރ ޑރ.މުޙައްމަދު ޝަހީމް ޢަލީ ސައީދު ވަނީ ރައީސުލްޖުމްހޫރިއްޔާ އިސްލާމީ ތަޢުލީމަށް ދެއްވާ އަހަމިއްޔަތު މި ޔުނިވަރސިޓީން ރަމްޒުކޮށްދޭކަމަށް ވިދާޅުވެފައި. އަދި އަންނަ އަހަރު އައު ކޯސްތައް ފަށްޓަވައި، އޮންލައިންކޮށް ކިޔެވޭނެ މަގު، އަންނަ އަހަރުގެ މެދުތެރޭގައި ފަހިކުރައްވާނެކަމަށްވެސް ވިދާޅުވިއެވެ. img:http://s2.psmnews.mv/images/660x400/14624565902180.jpg|އިސްލާމިކް ޔުނިވަރސިޓީގެ ވައިސް ޗާންސެލަރ ޑރ. މުޙައްމަދު ޝަހީމް ޢަލީ ސައީދު - ފޮޓޯ: ޕިއެސްއެމް މިރަސްމިއްޔާތުގައި ވަނީ ޔުނިވާސިޓީގެ ވެބްސައިޓް ޑިޒައިންކުރި ފަރާތްތަކަށް ހަނދާނީ ލިއުންދީފައެވެ.