ސިޓީ ކައުންސިލުން ދެއްވަމުން ގެންދެވި ޚިދުމަތްތަކުގެ ތެރެއިން، ޤަބުރުސްތާނުތައް ބެލެހެއްޓެވުމާއި، ކަށުކަމާކެމީގެ ކަންކަން ހަމަޖެއްސެވުން މިނިސްޓްރީ އޮފް އިސްލާމިކް އެފެއާރޒަށް ބަދަލުކުރެއްވުމަށް ސަރުކާރުން ނިންމެވުމުން، އެކަމަށް އެކަށީގެންވާ އިންތިޒާމްތައް ކުރައްވާނެކަމަށް އިސްލާމިކް މިނިސްޓަރ ވިދާޅުވެއްޖެއެވެ.
ޑރ. އަޙުމަދު ޒިޔާދު ވިދާޅުވީ، މިކަމަކީ ވަރަށް އަވަހަށް ޙައްލުކުރައްވަން ޖެހިފައިވާ ކަމަކަށްވާތީ، އެކަމަށް ހަމަޖައްސަވަން ޖެހިވަޑައިގަންނަވާ ލޮޖިސްޓިކް އަދި އިންސާނީ ވަޞީލަތްތަކާއި އެހެން އިންތިޒާމްތައް ވަރަށް އަވަހަށް ހަމަޖައްސަވާނެކަމަށެވެ.
ވަޒީރުންގެ މަޖިލީހުގެ ނިންމެވުމާ ގުޅިގެން، އިސްލާމިކް މިނިސްޓްރީގެ މަސައްކަތްތައް ބައްޓަން ކުރެވިފައިވާ ގޮތާ ބެހޭގޮތުން ރޭ ޓީ.ވީ.އެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން މިނިސްޓަރ ވިދާޅުވީ، މިފަދަ ބަދަލެއް ގެންނަން ޖެހުނީ މީގެ ކުރިން އަތޮޅުތެރޭގައި ކަށުކަމާކެމީގެ ކަންކަން ކުރިޔަށް ގެންދިއުމުގައި ހުރި ދަތިތައް ޙައްލުކުރެއްވުމުގެ ގޮތުން ކަމަށެވެ. އަދި މި ގެންނެވި ބަދަލާއެކު، އަތޮޅުތެރޭގައި ކަށުކަމާކެމީގެން ކަންކަން މިހާރަށްވުރެ ފުރިހަމަ ވެގެންދާނޭ ކަމަށް އުންމީދު ކުރައްވާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ވަޒީރުންގެ މަޖިލީހުގެ ނިންމެވުމާ ގުޅިގެން، ވަރަށް އަވަހަށް އައްޑޫ ސިޓީގައި މިނިސްޓްރީގެ ސެޓަޕެއް ޤާއިމްކުރެވި، މިހާރަށްވުރެ ފުރިހަމަޔަށް ކަށުކަމާ ކެމީގެ ކަންކަން ހަމަޖެހިގެންދާނޭކަމަށެވެ.